ՌՈՒՍԻԱ ՊԱՇՏՊԱՆՈՒԹԵԱՆ ՀՐԹԻՌԱՅԻՆ ՀԱՄԱԿԱՐԳԵՐ ԿԸ ՄՏԱԴՐԷ ՏԵՂԱԿԱՅԵԼ ՀԱՅԱՍՏԱՆԻ ՄԷՋ

0
106

Ռուսիա մտադիր է զօրացնել հակաօդային պաշտպանութեան միացեալ համակարգը Պելոռուսի հետ եւ պիտի նախաձեռնէ Հայաստանի եւ Ղազախստանի հետ համանման համակարգերու հաստատման: Սոյն  յայտարարութիւնը կատարեց  Ռուսիոյ նախագահ Վլատիմիր Փութին, Մոսկուայի մէջ կայացած բարձրաստիճան սպաներու ներկայացման արարողութեան ընթացքին:
Ըստ ռուսական «Ռիա Նովոսթի»ին՝ Փութին աւելցուցած է, թէ Հայաստանի եւ Ղազախստանի հետ նման տարածաշրջանային համակարգերու շնորհիւ, պիտի զօրանայ Ռուսիոյ եւ անոր գործընկերներու պաշտպանական ներուժը՝ նպաստելով եւրասիական տարածքէն ներս խաղաղութեան եւ կայունութեան ամրապնդման:
Ան յիշեցուցած է, թէ այս տարուան ընթացքին յաջողութեամբ ամբողջացած են ռուս-պելոռուսական՝ «Արեւմուտք-2013» ռազմավարական զօրավարժութիւնները, ինչպէս նաեւ նախնական քայլեր առնուած են տարածաշրջանային զօրախումբերու ստեղծման համար՝ Հայաստանի, Պելոռուսի, Ղազախստանի եւ Տաճիկիստանի մասնակցութեամբ:
«Պիտի ընդարձակենք գործակցութիւնը մեր աւանդական գործընկերներուն ու դաշնակիցներուն հետ՝ առաջնահերթութիւն տալով ՀԱՊԿ-ի, ՇՀԿ-ի եւ ԱՊՀ-ի մասնակից պետութիւններուն», աւելցուցած է Ռուսիոյ նախագահը:

Նշենք, թէ  Ուաշինկթընի մէջ,  Միացեալ Նահանգներու պետական  քարտուղար Ճոն Քերրի իր թուրք պաշտօնակիցին Ահմէտ Տաւուտօղլուի  հետ քննարկած է  Թուրքիոյ հողերուն  վրայ   պաշտպանութեան հրթիռային համակարգեր  տեղադրելու հարցը:  Տաւուտօղլու   ժամանակ խնդրած է՝ պատասխանելու  Ուաշինկթընի առաջարկին:

 

LEAVE A REPLY

Please enter your comment!
Please enter your name here