ՖՐԱՆՍԱ ԵՒ ՓՈՐԹՈՒԳԱԼ ՀԱՍԱՆ ՄՈՆՏԻԱԼ 2014-Ի ԵԶՐԱՓԱԿԻՉՆԵՐՈՒՆ

0
145

 Ֆութպոլի պատմական  երեկոյի մը   ընթացքին, Ֆրանսա  եւ Փորթուգալ    հասան  Մոնտիալ 2014-ի եզրափակիչներուն: Արդարեւ, Մոնտիալ  2014-ի  լրացուցիչ  հանդիպումներու  դարձի  մրցումներուն գծով,  Ֆրանսայի  հաւաքականը  Փարիզի  մէջ ընդունեց Ուքրանիան: Քանի մը օրեր առաջ, Քիեւի մէջ կայացած երթի հանդիպումը  վերջ գտած էր  2-0 արդիւնքով՝  ուքրանացիներու  յաղթանակով:  Տիտիյէ Տեշանի տղաքը  բարձր  լեռ մը   նուաճելու  լուրջ  մարտահրաւէրին առջեւ կը   գտնուէին:  Այսուհանդերձ,  Ֆրանսայի հաւաքականը  բացառիկ  խաղ մը  ցուցադրեց եւ 3-0 արդիւնքով պարտութեան մատնեց Ուքրանիան:  Մամատու Սախօ եւ Քարիմ  Պենզեմա հաւասարեցուցին հաշիւը:  Հանդիպման 74-րդ  վայրկեանին,  Ուքրանիոյ հաւաքականի  յետսապահ Օլեկ Կուսեւ սեփական  բերդէն ներս նշանակեց Ֆրանսացիներուն  երրրոդ եւ յաղթանակի կոլը:  Ֆրանսացիները   յաջորդաբար երկրորդ անգամ ըլլալով՝ 2010 եւ 2014,  Մոնտիալի եզրափակիչներուն  իրենց ուղեգիրը ապահովեցին  լրացուցիչ  խաղերու  միջոցաւ:

Յատկանշական պարագայ  մը. չորս տարի առաջ, Ֆրանսա՝  Հարաւ Ափրիկէյի  մէջ կազմակերպուած  Մոնտիալի եզրափակիչներուն հասաւ Թիէրի Հենրիի  նշանաւոր «Հենտպոլ»ին շնորհիւ….: Իրաւարարը  ոչ մէկ առարկութիւն կատարեց: Այս անգամ, Քարիմ Պենզեմա՝ բացայայտ  «օֆ- սայտ»  դիրքէ մը  նշանակեց Ֆրանսայի երկրորդ եւ հաւասարութեան կոլը… դարձեալ ոչ մէկ առարկութիւն:

Սթոքհոլմի մէջ,  Քրիսթիանօ Ռոնալտոյի եւ Զլաթան Իպրահիմովիչի  միջեւ ճակատումը վերջ գտաւ առաջինին յաղթանակով, երբ  Փորթուգալ՝ 3-2 արդիւնքով  պարտութեան մատնեց  Շուէտը:   Ռոնալտօ   նշանակեց Փորթուգալի   երեք  կոլերը:

Խրուաթիա՝ 2-0 արդիւնքով  պարտութեան մատնեց  Իսլանտան եւ  ապահովեց  իր ուղեգիրը, մինչ  Յունաստան՝ 1-1 արդիւնքով  հաւասարութիւն մը արձանգրեց Ռումանիոյ դէմ եւ եզրափակեց  եւրոպական գօտիէն  Մոնտիալ 2014-ի մասնակցող հաւաքականներուն ցանկը:

Ստորեւ,  Մոնտիալ 2014-ի եզրափակիչներուն  մասնակցելու ուղեգիր ապահոված  32  հաւաքականներուն ցանկը.

Եւրոպա՝   Սպանիա, Իտալիա, Անգլիա, Գերմանիա, Հոլանտա, Ֆրանսա,  Փորթուգալ, Պելճիքա, Պոսնիա, Յունաստան, Ռուսիա, Խրուաթիա, Զուիցերիա:

 Հարաւ  Ամերիկա՝  Արժանթին,  Պրազիլ,  Գոլոմպիա, Չիլի, Էքուատոր,  Ուրուկուէյ:

 Ափրիկէ՝  Փղոսկրեայ Ափունք,  Նիճերիա,  Գամերուն, Ղանա, Ալժերիա:

 Ասիա՝ Իրան,  Հարաւային Քորէա, Ճափոն,  Աւստրալիա:

Հիւսիսային  Ամերիկա՝ Միացեալ Նահանգներ,  Հոնտուրաս,  Գոսթա Ռիքա, Մեքսիքօ:

LEAVE A REPLY

Please enter your comment!
Please enter your name here