ԵՐԵՒԱՆ՝ ՍԵՒ ԾՈՎԻ ՏՆՏԵՍԱԿԱՆ ՀԱՄԱԳՈՐԾԱԿՑՈՒԹԵԱՆ ԺՈՂՈՎԻՆ ՄԱՍՆԱԿՑԵԼՈՒ ՀՐԱՒԷՐՆԵՐ ԿԸ ՅՂԷ ԱՆԳԱՐԱՅԻՆ ԵՒ ՊԱՔՈՒԻՆ

0
125

 Երեւանի մէջ  12  Դեկտեմբերին  պիտի գումարուի Սեւծովեան տնտեսական համագործակցութեան անդամ երկիրներու արտաքին գործոց նախարարներու ժողովը, որուն հրաւիրուեցան այս կազմակերպութեան անդամակցող երկիրներու նախարարները։
Թրքական մամուլը կը նշէ, թէ այս հաւաքին հրաւիրուած է նաեւ Թուրքիոյ արտաքին գործոց նախարար Ահմէտ Տաւուտօղլու եւ Հայաստանի արտաքին գործոց նախարարութիւնը այս հրաւէրին առընթեր՝ մասնաւոր կերպով շեշտած է, թէ հայկական կողմը շատ գոհ պիտի մնայ, եթէ Տաւուտօղլու  ընդառաջէ  հրաւէրին:
 Թրքական մամուլը կը հաղորդէ, որ Տաւուտօղլու հրաւէրը ընդունելու տրամադրութիւն ունի, բայց վերջնական որոշումը պիտի տայ՝ տեսնելէ ետք Հայաստանի ու Ատրպէյճանի նախագահներու հանդիպումին արդիւնքը։ Այդ հանդիպումը արդէն իսկ կայացաւ, եւ հանդիպման աւարտին Սերժ Սարգսեան ու Իլհամ Ալիեւ համաձայնեցան երկխօսութիւնը շարունակելու շուրջ, ինչ որ կրնայ նպաստել, որ Տաւուտօղլու ընդունի Երեւանի հրաւէրը։
Այս առթիւ, դիւանագիտական աշխարհը կը յիշեցնէ, որ Տաւուտօղլու անցեալ ամիս յայտնած էր, թէ Թուրքիա ստեղծագործական կարգ մը միջոցներու մասին կը մտածէ Հայաստանի հետ յարաբերութիւններու վերահաստատման ուղղութեամբ։ Անոր այս խօսքերը տեղի տուած էին զանազան մեկնաբանութիւններու, բայց Տաւուտօղլու նաեւ ըրած էր յայտարարութիւն մը, որ լաւատեսութիւն չէր ներշնչեր։ Ան ըսած էր, որ Թուրքիա պատրաստ է Հայաստանի հետ յարաբերութիւններ հաստատելու, բայց նախ պէտք է լուծուի Արցախի հարցը։ Այս պայմանադրութիւնը այսօրուան պայմաններուն մէջ, կը նշանակէր, որ Թուրքիա տակաւին երկար ժամանակ չի կրնար բանալ Հայաստանի սահմանադուռը։
 Քանի մը  օր առաջ, Տաւուտօղլու, Ուաշինկթընի մէջ, ժամանակի անբաւարարութեան պատճառաւ, խօսեցաւ միայն ամերիկացի լրագրողներու հետ եւ պատասխանեց Սուրիոյ մասին անոնց հարցումներուն։ Լրագրողները Թուրքիան կը մեղադրէին՝ պնդելով, որ այս երկիրը ընթացք կու տայ, որպէսզի ահաբեկչական ուժեր սահմանէն Սուրիա անցնին ու միանան նախագահ Պաշշար Ասատի դէմ կռուող ապստամբ ուժերուն։
Տաւուտօղլու ժխտեց այս պնդումը: Ան ըսաւ, որ Թուրքիա երբեք չ՛արտօներ, որ ծայրայեղական խմբակներ Թուրքիայէն Սուրիա անցնին, բայց Թուրքիա նաեւ չի կրնար արգելք հանդիսանալ մարդոց ճամբորդելու ազատութեան։ Տաւուտօղլու Թուրքիա-Սուրիա սահմանագիծի ներկայ վիճակը նմանցուց Ամերիկա-Մեքսիքա սահմանագիծին, որ դժուարութիւններու տեղի տուող սահմանագիծ մըն է։ Խորհրդաժողովին նաեւ հրաւիրուած է  Ատրպէյճանի արտաքին գործոց նախարար Էլմար Մամետիարովը:

 

LEAVE A REPLY

Please enter your comment!
Please enter your name here