ԸՍՏ «ՈՒԱՇԻՆԿԹԸՆ ՓՈՍԹ»Ի ԹՈՒՐՔԻԱ ՍԽԱԼ ՀԱՇԻՒՆԵՐ ԸՐԱԾ Է ՍՈՒՐԻՈՅ ՀԱՐՑՈՎ

0
121

Ամերիկեան «Ուաշինկթըն Փոսթ» թերթը նշած է, որ Անգարա լուրջ սխալներ գործած է Սուրիոյ հարցով, իսկ ներկայիս դէմ յանդիման մնացած է այդ սխալներու արդիւնքներուն հետ։ Թերթը կը յիշեցնէ, որ տակաւին Մայիսին Սպիտակ տան մէջ հանդիպման ընթացքին, նախագահ Պարաք Օպամա Թուրքիոյ վարչապետ Ռեճէպ Թայիփ Էրտողանի յորդորած էր, որ Թուրքիա արգելք հանդիսանայ իր երկրի տարածքով հազարաւոր օտարերկրեայ մարտիկներուն դէպի Սուրիա հոսքին: «Սուրիոյ դէմ Թուրքիոյ գործողութիւնները այն արդիւնքին հասցուցին, որ «Քայիտա» ահաբեկչական կազմակերպութիւնը առաջին անգամ ըլլալով տեղակայուեցաւ ՆԱԹՕ-ի անդամ երկրի մը տարածքին մէջ։ Արձանագրուած զարգացումները բացորոշ կերպով ցոյց տուին, թէ որքա՛ն սխալ են այն ջանքերը, զորս Թուրքիա կը գործադրէ Պաշշար Ասատը իշխանութենէն հեռացնելու ուղղութեամբ», գրած է թերթը։
Թերթը դիտել կու տայ, որ Թուրքիա ո՛չ մէկը կրնայ մեղադրել ներկայ զարգացումներուն համար, որովհետեւ Անգարա ճամբայ բացած է ահաբեկիչներուն առջեւ, ապահոված է անոնց միջեւ հաղորդակցութիւնը եւ զէնք տրամադրած է ահաբեկիչներուն։ Թերթը նաեւ կը նշէ, որ Էրտողան այժմ մեղմացուցած է Ասատի հասցէին իր յայտարարութեանց ոճը ու «այժմ նաեւ սկսած է քննադատելու ճիհատական այն խմբաւորումները, որոնք ներկայիս կը գտնուին Սուրիոյ մէջ՝ խստացնելով Սուրիոյ հետ սահմանակէտերու հսկողութիւնը»։
Թրքական ընդդիմադիր մամուլը ամիսներ առաջ գրած էր, որ Սուրիոյ հարցին մէջ սխալ քաղաքականութիւն կը գործադրուի եւ այդ պատճառով ալ՝ Էրտողան առանձինն մնացած է քաղաքական ներքին բեմին վրայ։

 

LEAVE A REPLY

Please enter your comment!
Please enter your name here