ՎԵՑԵԱԿԻ ԱՐՏԱՔԻՆ ԳՈՐԾՈՑ ՆԱԽԱՐԱՐՆԵՐԸ ՄԻԱՑԱՆ ԺԸՆԵՒԻ ԲԱՆԱԿՑՈՒԹԻՒՆՆԵՐՈՒՆ

0
99

Ժընեւի  բանակցութիւնները կ’արձանագրեն  յառաջընթաց:  Այս հաստատումը կատարեցին  Իրանի  հետ  բանակցող  Վեցեակի  ներկայացուցիչները:  Գերմանիոյ արտաքին  գործոց նախարար Կիւտօ  Ուեսթերվելէ  հաւաստեց, թէ բանակցութիւնները  կը գտնուին  ճիշդ  ճանապարհի վրայ: Ռուսիոյ արտաքին գործոց նախարար Սերկէյ Լաւրով  եւ  Միացեալ Նահանգներու պետական քարտուաղար  Ճոն Քերրի, Չինաստանի արտաքին գործոց նախարար Ուանկի Յի  եւ Վեցեակի  անդամ  մնացեալ պետութիւններու արտաքին գործոց  նախարարները   ժամանեցին Ժընեւ՝  միանալու համար Չորեքշաբթի օր սկսած Իրանի ու Վեցեակին միջեւ բանակցութեանց: Ժընեւէն  լոյս  ընծայուած հաղորդագրութիւն մը  յայտնեց, թէ բանակցութիւնները կը մօտենան   վերջին հանգրուանին:  Քերրի եւ Լաւրով  կէս ժամ տեւողութեամբ առանձնազրոյց մը ունեցան  ժողովի  ընթացքին:
ՄԱԿ-ի Ապահովութեան խորհուրդի մնայուն հինգ անդամներուն եւ Գերմանիայէն բաղկացած Վեցեակին հետ Իրանի բանակցութիւնները՝ Եւրոպական Միութեան արտաքին յարաբերութեան գլխաւոր յանձնակատար Քաթրին Աշթընի բանբերին կողմէ «յատկանշական ու մանրամասն», ինչպէս նաեւ «օգտակար» որակուած էին:
Իր կարգին, Իրանի արտաքին գործոց նախարար Մուհամմէտ Ճաուատ Զարիֆ յայտնեց, որ բանակցութիւնները «լաւապէս յառաջ կ՛երթան, սակայն սահմանափակ թիւով հարցերու շուրջ տարակարծութիւն գոյութիւն ունի»:
Կողմերը երեք օրերու ընթացքին չորս նիստեր գումարեցին, իսկ Ուրբաթ երեկոյեան խորհրդակցութիւնները աւարտեցան, զանոնք ներքին ձեւաչափով շարունակելու նպատակով:
Միւս կողմէ,  Իսրայէլի  պաշտպանութեան նախարար Մոշէ Եյէալոն  Նեթանիահու յայտարարեց, թէ  վստահութիւնը կորսնցուցած է Միացեալ Նահանգներու եւ Իրանի  հանդէպ: Իսրայէլ եւ Սէուտական Արաբիա կտրականապէս կը մերժեն  Իրան- Վեցեակ  բանակցութիւններու  ընթացքը:

LEAVE A REPLY

Please enter your comment!
Please enter your name here