ԵՈՒՎԵՆԹՈՒՍ, ԱՐՍԵՆԱԼ, ՊԱՐՉԵԼՈՆԱ ԵՒ ՊԱՅԵՐՆ ԿԸ ՍՈՒՐԱՆ

0
130

Անգլիոյ  ֆութպոլի ախոյեանութեան 12-րդ հանգրուանի մրցումներուն,  Լոնտոնի Արսենալը  սեփական դաշտին մէջ 2-0 արդիւքով պարտութեան մատնեց Սաութեմթընը: «Սուրբ»երուն  բերդապահը աններելի սխալ մը  գործելով Արսենալի  յարձակող Օլիվիյէ  Ժիրույին   շնորհեց  կոլ մը: Բ.  Կիսախաղին,  Ժիրու կրկնապատկեց  Արսենալի առաւելութիւնը եւ  նշանակած  կոլերուն  թիւը: Մրցումէն ետք,  Ժիրու յայտարարեց, թէ նշանակած կոլերը  նուիրած էր մեծ  հօրը յիշատակին:  Չելսի՝  3-0 արդիւնքով պարտութեան մատնեց Ուեսթ Համ Եունայթըտը:  Ֆրենք Լամփարտ (2) եւ  Օսքար նշանակեցին Ժոզէ Մուրինիոյի խումբին կոլերը:  Շնորհիւ Լուաք  Ռեմիի եւ  Իոհան Կիւֆրանի նշանակած կոլերուն,  Նիուքասլ Եունայթըտ՝ 2-1 արդիւնքով պարտութեան մատնեց  Նորուիչ Սիթին:  Գրիսթալ Փալաս, մրցակիցի  դաշտի մէջ՝ 1-0արդիւնքով   պարտութեան մատնեց Հոլ Սիթիին:  Լիվըրփուլի եւ Էվըրթընի միջեւ Լիվըրփուլ քաղաքի «Տըրպի»ն  վերջ գտաւ  3-3  հաւասարութեամբ: Քեւին  Միրալիս, Ռոմելու Լուքաքու(2)  նշանակեցին  Էվըրթընի կոլերը,  Ֆելիփէ Քութինիօ, Լուիս Սուարէզ եւ Տանիէլ Սթարիճ՝ «Կարմիրներ»ուն  կոլերը:  Գարտիֆ Սիթի՝ մրցումի հաշուած  վայրկեաններուն  հաւասարութեան  կոլ մը  նշանակեց Մանչեսթըր  Եունայթըտի   բերդին մէջ  եւ   երեք  ստոյգ  կէտերէ  զրկեց  Եունայթըտը: Ուէյն Ռունի եւ   Փաթրիք  Էվրա  նշանակեցին  «Կարմիր Սատանաներ»ուն կոլերը: Օրուան մեծագոյն  յաղթանակը արձանագրեց  Մանչեսթըր Սիթին, որ  իւրաքանչիւր  կիսախաղին երեք անպատասխան  գնդակ  նշանակելով,  6-0 արդիւնքով  ծանր  պարտութեան մատնեց Թոթենհամը:  Խեսուս Նավազ (2),  Սանտրօ( սեփական բերդէն ներս),  Սերժիօ Ակուերօ (2) եւ Ալվարօ Նեկրետօ  նշանակեցին Սիթիի  կոլերը:

ԸՆԴՀԱՆՈՒՐ  ԴԱՍԱՒՈՐՈՒՄ

1-     Արսենալ՝  12 մրց.  28  կէտ

2-     Չելսի՝ 12 մրց.  24  կէտ

3-     Լիվըրփուլ՝  12 մրց.  24 կէտ

4-     Մանչեսթըր Սիթի՝  12  մրց. 22 կէտ

Սպանիոյ ֆութպոլի ախոյեանութեան  14-րդ հանգրուանի մրցումներուն ,  Պարչելոնայի կազմը, առանց Լիոնէլ Մեսիիի՝  4-0 արդիւնքով պարտութեան մատնեց  Կրանատան:   Անտերս Ինիյէսթա,  Սեսք  Ֆապրեկաս,   Ալեքսիս Սանչէս  եւ Փետրօ նշանակեցին  գաթալոնական  խումբին  կոլերը:  Մրցումէն ետք,  Լիոնէլ Մեսի,  լրագրողներու հարցումներուն պատասխանելու   ընթացքին յայտարարեց, թէ կը  փափաքի Պարչելոնայի   հետ աւարտել ֆութպոլային ասպարէզը: Ռէալ Մատրիտ՝  5-0 արդիւնքով պարտութեան մատնեց Ալմէյրան:  Քրիսթիանօ Ռոնալտօ,  Քարիմ Պենզեմա,  Կարէթ Պէյլ,  Իսկօ  եւ Ալվարօ Մորաթա  նշանակեցին  արքայական ակումբին կոլերը:  Սպանական  մարզաթերթեր կը գրեն, թէ Ռէալ Մատրիտ   բանակցութիւններ կը վարէ  Պորուսիա Տորթմունտ ակումբին հետ, Ռոպերթ  Լեվանտովսքիի  փոխանցման իրաւունքները  ձեռք բերելու համար: Միւս կողմէ, Ռէալի մարզիչ Գառլօ Անճելոթի   հերքեց  միջնապահ  Զապի Ալոնզոյի  հեռանալու մասին  տեղեկութիւնները:  Անճելոթի  ըսաւ, թէ Ալոնզօ  պիտի մնայ Ռէալի հետ: Այլ գետնի վրայ,  Ռէալի  փորթուգալացի  յետսապահ Ֆապիօ Գուենթրաու նոր պայմանագրութիւն մը պիտի կնքէ  սպանական ակումբին հետ: 25-ամեայ  յետսապահին  ծառայութիւններով հետաքրքրուած են  բազմաթիւ ակումբներ:  Էսփանիոլը  Մատրիտի մէջ  4-1արդիւնքով յաղթեց Ռայօ Վալեքանոյին:

Աթլեթիքօ  Մատրիտ  եօթ անպատասխան  գնդակ  զետեղեց  Կեթաֆէի  բերդին մէջ:  Ռաուլ Կարսիա (2), Տաւիտ Վիլլա (2), Տիեկօ Գոսթա, Ատրիան Լոփէզ եւ Ալպերթօ Լոփօ   նշանակեցին  մատրիտեան կազմին կոլերը:  Գոսթա նշանակեց եղանակի  14-րդ կոլը:  Ռէալ Սոսիետատ՝ 4-3 արդիւնքով  պարտութեան մատնեց  Չելթա Վիկօն:

ԸՆԴՀԱՆՈՒՐ  ԴԱՍԱՒՈՐՈՒՄ

1-     Պարչելոնա՝  14 մրց.  40 կէտ

2-     Աթլեթիքօ  Մատրիտ 14 մրց.  37  կէտ

3-     Ռէալ Մատրիտ ՝ 14  մրց.  34 կէտ

4-     Վիլառէալ՝ 14 մրց.  27  կէտ

 

Իտալիոյ ախոյեանութեան  13-րդ  հանգրուանի մրցումներուն,   Եուվենթուս՝ մրցակիցի  դաշտին մէջ 2-0 արդիւնքով պարտութեան մատնեց  Լիվորնոյին: «Եուվէ»ի կոլերը նշանակեցին  Գարլոս Թեվէզ եւ  Ֆեռնանտօ  Լիորենթէ: Նափոլի՝ սեփական դաշտին մէջ   1-0 արդիւնքով անակնկալ պարտութիւն մը  կրեց Փարմայէն:  Հանդիպման  միակ կոլը նշանակեց Անթոնիօ Գասանօ՝  մրցումի  81-րդ վայրկեանին:  Ա. Սէ. Միլան նոյնպէս, սեփական դաշտին մէջ  չկրցաւ պարտութեան մատնել  Ճենովան եւ  գոհացաւ  1-1  հաւասարութեամբ: Քաքա՝  4-րդ  վայրկեանին յառաջ  մղեց Միլանը,  սակայն  8-րդ վայրկեանին Ալպերթօ  Ճիլարտինօ հաւասարեցուց  հաշիւը: Մրցումի  ընթացքին, Մարիօ Պալոթելի  չկրցաւ  կոլի վերածել  իրաւարարին  շնորհած  փենալթի  հարուածը: 23-ամեայ  ֆութպոլիստը երկրորդ անգամ ըլլալով կը վրիպէր  փենալթի  հարուածներէն:  Ֆիորենթինա՝ 1-0 արդիւնքով  խոնարհեցաւ  Սամտորիայի առջեւ:

ԸՆԴՀԱՆՈՒՐ  ԴԱՍԱՒՈՐՈՒՄ

1-     Եուվենթուս՝   13 մրց. 34 կէտ

2-      Ռոմա՝ 12  մրց.  32 կէտ

3-     Նափոլի՝  13  մրց. 28 կէտ

4-     Ինթէր՝  12  մրց.  25 կէտ

Ֆրանսայի ախոյեանութեան  14-րդ  հանգրուանի  մրցումներուն, Փարի Սէն Ժերմէն՝  3-0 արդիւնքով պարտութեան մատնեց  զինք  հիւրընկալող Ռիմը:  Լուքաս Մոուրա,  Ճերեմի  Մենէզ եւ  Զլաթան  Իպրահիմովիչ   նշանակեցին մայրաքաղաքի  խումբին կոլերը: Լիոն՝ սեփական դաշտին մէջ   1-1 արդիւնքով հաւասարութիւն մը արձանագրեց Վալենսիէնի դէմ:

ԸՆԴՀԱՆՈՒՐ ԴԱՍԱՒՈՐՈՒՄ

1-Փարի Սէն Ժերմէն՝  14 մրց.  34 կէտ

2- Լիլ՝   14  մրց. 30 կէտ

3- Մոնաքօ՝ 13 մրց. 26 կէտ

 

Գերմանիոյ ախոյեանութեան 13-րդ  հանգրուանի ամենասպասուած հանդիպումը կայացաւ Տորթմունտի մէջ, ուր  տեղւոյն կազմը ընդունեց Պայերն  Միւնիխը:  Վաղեմի  մրցակիցներուն  ճակատումը   վերջ գտաւ պաւարիական խումբին յաղթանակով՝ 3-0: Առաջին կիսախաղը  հաւասարութեամբ աւարտելէ ետք,  երկրորդ կիսախաղին՝  Մարիօ  Կէոցէ,  Արիան  Ռոպեն եւ Թոմաս Միւլըր երեք  անպատասխան գնդակ զետեղեցին վիրաւոր  մարզիկներով դաշտ ներկայացող  Տորթմունտի  բերդին մէջ:   Պայերնի մարզիչ  Փեփ Կուարտիոլա  գնահատեց իր  խումբին արձանագրած  յաղթանակը: Սակայն ան աւելցուց, թէ   այժմու կազմը տակաւին «Իր   փնտռած  Պայերնը չէ…»:  Պայեր  Լեվերքուզեն՝  1-0 արդիւնքով պարտութեան մատնեց  Հերթա Պերլինը, այս  վերջնոյն դաշտին մէջ:   Սթեֆան  Քիսլինկ  նշանակեց  Պայերի  յաղթանակի կոլը:   Պայերն Միւնիխի եւ Ֆրանսայի հաւաքականի միջնապահ Ֆրանք Ռիպերի յայտարարեց, թէ  Քրիսթիանօ Ռոնալտօ  «գեր ֆութպոլիստ» մըն է եւ արժանի է  Ոսկէ Գնդակ  տիտղոսին:

ԸՆԴՀԱՆՈՒՐ ԴԱՍԱՒՈՐՈՒՄ

1-     Պայերն Միւնիխ՝ 13 մրց. 35 կէտ

2-     Պայեր  Լեվերքուզեն՝  13 մրց.  31  կէտ

3-     Պորուսիա  Տորթմունտ՝  13  մրց.  28 կէտ

Ռուսիոյ ախոյեանութեան  17-րդ  հանգրուանի մրցումներուն, Մոսկուայի Սպարտակը  1-0 արդիւնքով պարտութիւն մը կրեց   Մոսկուայի  Բանակայիններէն:  Մրցումի ընթացքին, Սպարտակի եւ Հայաստանի հաւաքականի  յարձակող Եուրա Մովսիսեան ծունկէն հարուած մը ստանալով   հեռացաւ դաշտէն:  Մովսիսեան պիտի բացակայի Սպարտակի  յառաջիկայ մրցումերէն:  Դարձեալ Մոսկուայի մէջ,  տեղւոյն Լոքոմոթիվը  1-0 արդիւնքով պարտութեան մատնեց  Տինամօն: Ներկայիս,   Զենիթ եւ Լոքոմոթիվ՝ 36 կէտով կը գրաւեն ընդհանուր դասաւորման  առաջին եւ  երկրորդ  դիրքերը:

Հայաստանի  ֆութպոլի ախոյեանութեան 13-րդ հանգրուանի մրցումներուն, Երեւանի Արարատը ՝ 3-0 արդիւնքով պարտութեան մատնեց Ալաշկերտը: Արարատ ներկայիս  27 կէտով կը  գլխաւորէ ախոյեանութեան ընդհանուր դասաւորումը:  Երկրորդ դիրքի վրայ գտնուող Գանձասար ունի  19 կէտ:  Վերջինս՝  2-1 արդիւնքով պարտութեան մատնեց Բանանցը:  Կիւմրիի Շիրակը,  Երեւանի մէջ  2-1 արդիւնքով յաղթեց Փիւնիկին:

ՍԵՊԱՍԹԻԱՆ  ՎԵԹԷԼ  ՇԱՀԵՑԱՒ ՊՐԱԶԻԼԻ  ԿՐԱՆ ՓՐԻՆ

Ֆորմիւլա 1  ինքնաշարժներու  օրացոյցային  վեջին կրան փրին  վերջ գտաւ աշխարհի ախոյեան Սեպասթիան Վեթէլի  յաղթանակով:  Երկրորդ  իրքը գրաւեց Վեթէլի խմբակից Մարք Ուեպէրը:   Ֆեռնանտօ Ալոնզօ երրորդ   հանդիսագաւ:

ՄԱԿՆՈՒՍ ԳԱՐԼՍԸՆ ԱՇԽԱՐՀԻ ԱԽՈՅԵԱՆ

Նորվեկիացի Մակնուս Գարլսըն  շահեցաւ  ճատրակի աշխարհի ախոյեանութեան  տիտղոսը:  Եզրափակիչ   մրցումին,  երիտասարդ  նորվեկիացին  6.5 – 3.5  արդիւնքով  առաւելութեան հասաւ աշխարհի  գործող ախոյեան, հնդիկ Վեշուանաթան Անանտի  դէմ: Ճակատումը   տեղի ունեցաւ Հնդկաստանի  Չենայ քաղաքի մէջ: 22-ամեայ նորվեկիացին,  դափնեպսակին  կողքին ստացաւ 600 հազար  եուրօ արժողութեամբ վճարագիր մը:

 

ՓԱՔԱՅՈՅԻ  ԳԵՂԵՑԻԿ  ՅԱՂԹԱՆԱԿԸ

 Արհեստավարժ  բռնցքամարտի ութ տարբեր կարգերու աշխարհի նախկին ախոյեան Մենի Փաքայու  հերթական  յաղթանակը տարաւ՝ պարտութեան մատնելով ամերիկացի Պրենտըն Ռիոսը:  Մրցամարտը տեղի ունեցաւ Չինաստանի Մաքաօ քաղաքին մէջ: Ֆիլիփինցի  բռնցքամարտիկը  մրցավարներու  միաձայն որոշումով   յաղթեց  Ռիոսին: 34-ամեայ  Փաքայու, նախապէս  երկու անգամ պարտուած էր Ռիոսէն:

Սոյն   մրցամարտին ներկայ  գտնուեցան  Անգլիոյ հաւաքականի  նախկին խմբապետ Տէյվիտ Պեքհամը,  դերասան Ճորճ Գլունին,  Փերիս  Հիլթընը եւ Ալիսա  Քիզը:

ԱՇՈՏ  ԴԱՆԻԷԼԵԱՆ ԱՇԽԱՐՀԻ ԱԽՈՅԵԱՆ

 Սան Փեթերսպուրկի մէջ  տեղի ունեցող Սամպայի աշխարհի ախոյեանութեան  մրցումներուն, Հայաստանը ներկայացնող Աշոտ  Դանիէլեան ոսկէ մետալ մը ապահովեց  82 քկ. կարգի  մէջ, պարտութեան մատնելով իր բոլոր   մրցակիցները: Երջանիկ  Կարապետեան,  Սօսէ Բալասանեան, Տիգրան  Կիրակոսեան  եւ Մավրիկ  Նասիպեան  պրոնզէ  մետալ ապահովեցին տարբեր կարգերու մէջ:

LEAVE A REPLY

Please enter your comment!
Please enter your name here