ԻՐԱՆ- ՎԵՑԵԱԿ ՊԱՏՄԱԿԱՆ ՀԱՄԱՁԱՅՆՈՒԹԻՒՆ ՄԸ

0
105

Երկարատեւ բանակցութիւններէ ետք,  Ժընեւի մէջ,  Իրան եւ Վեցեակը  համաձայնութիւն  գոյացուցին  Թեհրանի միջուկային  ծրագիրներուն վերաբերեալ:   Իրանի արտաքին գործոց նախարար Մուհամմէտ Ճաուատ  Զարիֆ  յայտարարեց, թէ   համաձայնութիւն գոյացած է Վեցեակին հետ:  «Ինթէրֆաքս» լրատուական գործակալութիւնը հաղորդեց, թէ  Վեցեակի հետ համաձայնութեան մէջ, միջազգային  հասարակութիւնը  ընդունած է ուրանիոմ հարստացնելու Իրանի   իրաւունքը:  Իրան կէս տարիով պիտի սառեցնէ  իր միջուկային ծրագիրները եւ պիտի դադրեցնէ Արաքայի մէջ կառուցուող  ուժանիւթի կեդրոնին շինարարութիւնը:  Ռուսիոյ արտաքին  գործոց նախարար Սերկէյ Լաւրով  յայտարարեց, թէ  համաձայնութիւնը պիտի  դառնայ   հիմնական նպատակներու իրականացման առաջին հանգրուանը:

 Միացեալ յայտարարութեան մը մէջ, Եւրոպայի արտաքին քաղաքականութեան  գլխաւոր բանագնաց  Քաթրին Աշթըն  եւ Իրանի արտաքին գործոց նախարար  Մուհամմէտ Ճաուատ  Զարիֆ  նշեցին, թէ  Իրանի եւ Վեցեակի միջեւ   համաձայնութիւնը  կը  կրէ միջանկեալ  բնոյթ:  Կողմերը պիտի  ձգտին  համապարփակ  համաձայնութեան:  Յայտարարութիւնը կ’աւելցնէ, թէ  տուեալ   պայմանագրութիւնը «կարեւոր քայլ կը հանդիսանայ  կողմերու միջեւ կառուցողական յարաբերութիւններու  զարգացման գործընթացի մէջ»:   Ձեռք բերուած համաձայնութեան մէջ, Իրան պիտի ստանայ  4.2  միլիառ տոլար  գումար մը:

Նախագահ  Պարաք Օպամա  Գոնկրէսէն  պահանջեց  նոր պատժամիջոցներ  չսահմանել Իրանի դէմ:  Ան դիտել տուաւ, թէ Իրանի հետ  համաձայնութիւնը հիմնախնդրի լուծման առաջին քայլն է:

Իրանի նախագահ  Հասան Ռոհանի  կոչ ըրաւ անյապաղօրէն շարունակելու   միջուկային ծրագիրի  շուրջ համապարփակ  համաձայնութեան   բաանկցութիւնները:  Միացեալ  Նահագներու  պետական  քարտուղար  Ճոն Քերրի  յայտնեց, թէ  Իրանի հետ  համաձայնութիւնը պիտի ապահովէ  Իսրայէլի եւ Միջին Արեւելքի արաբական  երկիրներու անվտանգութիւնը: Քերրի նաեւ հաստատեց Իրանի հետ գաղտնի բանակցութիւններ վարելու փաստը:

Սուրիոյ արտաքին  գործոց նախարարութիւնը յայտարարեց, թէ  Իրանի հետ  համաձայնութիւնը ցոյց կու  տայ հակամարտութիւններու  քաղաքական լուծման անհրաժեշտութիւնը: Իսրայէլի  վարչապետ Պենիամին  Նեթանիահու « Գէշ  գործառք» որակեց  Իրանի հետ  համաձայնութիւնը:

LEAVE A REPLY

Please enter your comment!
Please enter your name here