ԻՊՐԱՀԻՄԻ՝ «ԺԸՆԵՒ -2» ԽՈՐՀՐԴԱԺՈՂՈՎԻ ՄԱՍՆԱԿՑՈՂՆԵՐՈՒՆ ՑԱՆԿԸ ՉԷ ՅՍՏԱԿԱՑԱԾ ՏԱԿԱՒԻՆ

0
108

 Սուրիոյ  հարցով  ՄԱԿ-ի եւ Արաբական  Լիկայի   պաշտօնակատար  Լախտար Իպրահիմի  չկրցաւ յստակ պատասխանել Իրանի եւ Սէուտական Արաբիոյ մասնակցութեան մասին տրուած  հարցումի  մը, փոխարէնը  նշեց, թէ   բանակցութիւններուն  մասնակիցներուն վերջնական ցուցակը չէ կազմուած  տակաւին:   Այս առիթով,  Իրանի արտաքին գործոց նախարարութիւնը յայտարարեց, թէ պատրաստ է  հրաւէր  ստանալու պարագային, առանց նախապայմանի մասնակցելու  «Ժընեւ -2» խորհրդաժողովին:

Սուրիոյ   փոխարտաքին գործոց նախարար  Ֆայսալ Միքտատ յայտարարեց, թէ   Սուրիա  չակնկալեր, որ միջազգային  ընտանիքը  ճնշում բանեցնէ  նախագահ Պաշշար Ասատի հրաժարականին համար, որովհետեւ   բոլոր պետութիւնները անդրադարձած են, թէ իրենց փոխարէն  Սուրիա  միայնակ կը  դիմակալէ  ահաբեկչութեան արշաւը:

 Ֆրանսայի արտաքին գործոց նախարար Լորան Ֆապիւս  դիտել տուաւ, թէ  նախագահ Պաշշար Ասատ պիտի  չմասնակցի «Ժընեւ-2»  խորհրդաժողովին: « Քրիշչըն Սայընս Մոնիթըր»  օրաթերթին  կարծիքով,   բաւական դժուար  պիտի  ըլլայ  Սուրիոյ  հարցով, Իրանի եւ Միացեալ Նահանգներու միջեւ  համաձայնութիւն մը:  Ռուսիոյ արտաքին գործոց նախարարութիւնը   լոյս  ընծայեց հաղորդագրութիւն մը, որուն մէջ կը նշէ, թէ  պիտի շարունակէ Սուրիոյ հակամարտութեան կողմերուն միջեւ  միջնորդական առաքելութիւնը՝ փորձելով  դրական արդիւնքներու հասնիլ «Ժընեւ -2» խորհրդաժողովին:

 Սէուտական Արաբիոյ մէջ լոյս տեսնող «Օքազ»  օրաթերթը, խօսքը   ընդդիմութեան  ուղղելով  կը գրէ.« Մի հաւատաք, որ  Ժընեւ-2, 3-ը կամ՝  4-ը   ընդդիմութիւնը կրնայ    հասցնել իշխանութեան»:

Համաշխարհային Առողջապահական Կազմակերպութիւնը  համաճարակի  դէպքեր արձանագրեց  Հալէպի եւ Դամասկոսի մօտակայ  շրջաններու մէջ:

Սուրիոյ ընդդիմութեան   զինուորական  պարագլուխներէն  Սալիմ Իտրիս   յայտարարեց, թէ  պատերազմը պիտի  չդադրեցնէ, նոյնիսկ՝ «Ժընեւ -2»   բանակցութիւններու  ընթացքին: Հալէպի՝  Ճեմիլիյա, Զըրպէն, Քասթիլիօ,  Հանթարաթ, Մանսուրա,  Հայիթան   շրջաններու մէջ  ծայրայեղականները կը  կրեն  լուրջ կորուստներ:  Բախումները կը շարունակուին նաեւ Դամասկոսի մերձակայ  գիւղերու մէջ: Սուրիական  բանակը նաեւ կարեւոր դիրքեր կը գրաւէ  Քալամունի Տէր Աթիյէի ուղղութեամբ:

Հալէպի մէջ  երէկ տեղի ունեցաւ 23-ամեայ  երիտասարդ  Տիգրան  Մանուկեանի յուղարկաւորութիւնը: Օր մը առաջ, կատարուեցաւ սուրիական բանակի ծառայող Յակոբ Տէր Ղազարեանի  յուղարկաւորութիւնը:  Ծայրայեղականները առեւանգեցին  երկու  շուէտ լրագրողներ:  2011  Մարտէն ի վեր, Սուրիոյ  մէջ սպաննուած  է առնուազն   50  լրագրող, իսկ  30-է աւելի լրագրողներ կը մնան առեւանգուած:

LEAVE A REPLY

Please enter your comment!
Please enter your name here