ԼԻԲԱՆԱՆԵԱՆ ԿԱՐՃ ԼՈՒՐԵՐ

0
126

–         Ներքին գործոց նախարարի պաշտօնակատար  Մարուան Շարպէլ յայտնեց, թէ  իրանեան  դեսպանատան  առջեւ պատահած պայթումերուն հետաքննութիւնները կը   շարունակուին:  Նախարարը խոստացաւ  հետաքննութիւնները աւարտելէ անմիջապէս ետք  հանրութեան ներկայացնել  գործողութեան մանրամասնութիւնները: Շարպէլ  երէկ ընդունեց Լիբանանի մօտ Քաթարի դեսպան  Ապտէլ Ալ  Ղինաային:  

–         Պիր Հասանի պայթումին  հետաքննութեան    թելերը կը մօտենան Այն Հելու  գաղթակայանին:  Ցարդ  ստոյգ  հաւաստիքներ  չկան  անոնց ետին կեցող ահաբեկչական  կազմակերպութեան անուանվերաբերեալ: Հետաքննութիւնները այն  եզրակացութեան յանգած  են, թէ անձնասպանական գործողութիւնը  նպատակադրած էր  քանդելու   իրանեան  դեսպանատունը: Կասկածներ յառաջացած են,որ պայթումը   կրնայ կազմակերպած  ըլլալ Ահմէտ Ասիրը՝ Ալ Քայիտայի անուան տակ..: Սակայն ապահովական այլ աղբիւրներ  կը հաղորդեն,  թէ   դեսպանատան դէմ միջադէպը  Ասիրի եւ Ալ Քայիտայի ուժերէն   շատ աւելի բարձր  կազմակերպութեան մը  գործը կրնայ ըլլալ:

–         Խորհրդրանի նախագահ Նեպիհ Պըրրի  Թեհրանի մէջ հանդիպում մը ունեցաւ Իրանի ազգային անվտանգութեան խորհուրդի  պետ Ալի Շամախանիի հետ  եւ անոր հետ քննարկեց Շրջանը դիմակալող մարտահրաւէրները:  Պըրրի՝  Շրջանը հարուածող  դաւադրութիւներու դէմ  միասնականութեան   կոչ ուղղեց  արաբական պետութիւններուն,  ընդգծելով որ  Լիբանան  նոյնպէս կը գտնուի դաւադրութեան սպառնալիքներուն տակ:

–         Հրաժարեալ վարչապետ  Նեժիպ Միքաթի Մոնաքոյի մէջ մասնակցեցաւ  Լիբանանի անկախութեան  70-ամեակին  նուիրուած հանդիսութեան:  Միքաթի՝   զգուշացուց   Լիբանանը հարուածող   փոթորիկներէն եւ միասնականութեան կոչ ուղղեց  լիբանանցիներուն:

–         Ներքին գործոց նախարարի պաշտօնակատար  Մարուան Շարպէլ եւ ընդհանուր անվտանգութեան ընդհանուր տնօրէն, հազարապետ Ապպաս Իպրահիմ,   հրաժարեալ վարչապետ Նեժիպ Միքաթիի  ընկերակցութեամբ պիտի մեկնին Քաթար՝ Հալէպի մէջ առեւանգուած  երկու եպիսկոպոսները  ազատ արձակելու նորագոյն զարգացումներուն հետեւելու նպատակով: 

 

LEAVE A REPLY

Please enter your comment!
Please enter your name here