ԵՒՐՈՊԱԿԱՆ ՄԻՈՒԹԻՒՆԸ ԿԸ ԴԱՏԱՊԱՐՏԷ ՈՒՔՐԱՆԻՈՅ ՇՐՋԱԴԱՐՁԸ

0
137

Եւրոպական Միութեան բարձրաստիճան պաշտօնատարներ՝ Եւրոպական խորհուրդի նախագահ Հերման Վան Ռոմփոյ եւ Եւրոպական յանձնաժողովի նախագահ Ժոզէ Մանուէլ Պարոսօ, միացեալ հաղորդագրութիւն մը հրապարակելով՝ սուր կերպով քննադատեցին Ռուսիան՝ Ուքրանիոյ վրայ ճնշում բանեցնելուն եւ զայն Եւրոպական Միութեան հետ ընկերակցութեան համաձայնութեան ստորագրումէն հրաժարելու մղելուն համար: «Ուքրանիա պէտք է ազատ կերպով որոշէ, թէ Եւրոմիութեան հետ ինչպիսի՛ կապ կ՛ուզէ հաստատել: Ուստի, բուռն կերպով կ՛ընդդիմանանք ռուսական դիրքորոշման եւ քայլերուն», ընդգծեցին եւրոպացի երկու բարձրաստիճան պաշտօնատարները:
Մինչ այդ, Ուքրանիոյ մայրաքաղաք Քիեւի մէջ եւրոպամէտ ցուցարարներու եւ ոստիկանութեան միջեւ նոր բախումներ արձանագրուեցան: Ուքրանական ոստիկանութիւնը արցունքաբեր կազ օգտագործեց: Ուքրանացի ընդդիմադիր ղեկավարներ, ներառեալ՝ բռնցքամարտի աշխարհի ախոյեան Վիթալի Քլիչքօ, կառավարութեան անակնկալ շրջադարձը «ամօթալի» նկատեցին եւ խոստացան ցուցարար բազմութիւնը անժամկէտ պահել կեդրոնական Քիեւի մէջ: Ցոյցին մասնակից գործիչներու շարքին էին բանտարկուած ընդդիմադիր ղեկավար Եուլիա Թիմոշենքոյի համակիրները: Հարիւրաւոր ցուցարարներ հրապարակին վրայ գիշերեցին վրաններու մէջ, հակառակ իշխանութիւններուն կողմէ այդ քայլը արգիլող հրամաններուն:

 

LEAVE A REPLY

Please enter your comment!
Please enter your name here