ՊԱՐՉԵԼՈՆԱ ՃԱՇԱԿԵՑ ԵՂԱՆԱԿԻ ԱՌԱՋԻՆ ՊԱՐՏՈՒԹԻՒՆԸ

0
162

Անգլիոյ   ֆութպոլի ախոյեանութեան  13-րդ  հանգրուանի մրցումներուն,  Արսենալ ամրապնդեց  ընդհանուր դասաւորման յառաջատարի  դիրքը՝  Գարտիֆ Սիթիի  դէմ արձանագրելով 3-0 արդիւնքով  յաղթանակ մը: Աարոն Ռամզի  (2) եւ  Մաթիու  Ֆլամինի նշանակեցին « Կանըրզ»ներուն կոլերը:  Թոթենհամ՝ որուն մարզիչը Անտրէա  Վիլաշ Պոաս կը գտնուի  լուրջ ճշնումներու տակ, սեփական   դաշտին մէջ 2-2 արդիւնքով հաւասարութիւն մը արձանագրեց Մանչեսթըր Եուանյթըտի դէմ: Ուոքըր եւ Սանտրօ նշանակեցին Թոթենհամի կոլերը,  Ուէյն  Ռունի՝ Եունայթըտի:  Թոթենհամի  մարզիչ  Վիլաշ Պոաս՝ ամառնային  փոխանցումներու  ընթացքին  107   միլիոն սթերլին գումար մը  ծախսեց խումբը նոր մարզիկներով  համալրելու  նպատակով, սակայն ախոյեանութեան  մրցումներու  ընթացքին անոր խումբը  ցարդ նշանակած է   տասնմէկ կոլ..:   

Նիուքասըլ Եունայթըտ արձանագրեց   չորրորդ  անընդմէջ  յաղթանակը, երբ  2-1 արդիւնքով պարտութեան մատնեց  Ուեսթ Պրումուիչ Ալպիոնը:  Եոհան  Կուֆրան եւ  Մուսա Սիսոքօ նշանակեցին «Տը Մեկփայզ»ներուն կոլերը: Լիվըրփուլ՝  3-1 արդիւնքով պարտութիւն մը կրեց Հոլ Սիթիէն:  Մանչեսթըր Սիթի՝  3-0 արդիւնքով   յաղթեց Սուանսիին:  Ալվարօ  Նեկրետօ եւ   Սամիր  Նասրի (2) նշանակեցին Սիթիի կոլերը: Չելսի՝  3-1 արդիւնքով յաղթեց  Սաութեմթընին:  Կերի  Գէյհիլ,  Ճոն Թերրի եւ  Տեմպա Պա  նշանակեցին «Կապոյտներ»ուն  կոլերը: Բրիտանական    օրաթերթերուն կարծիքով,  լոնտոնեան կազմը  ձմեռնային  փոխանցումներու  շրջանին մտադրած է  հրաժարիլ  պրազիլիացի  յետսապահ  Տաւիտ  Լուիսի  ծառայութիւններէն:  Պարչելոնա շատ հաւանաբար օգտուի այս  առիթէն:  Փըրըմիյէրշիփի  Ֆուլամ ակումբը   պաշտօնազրկեց մարզիչ  Մարթին  Եոլը՝  խումբին արձանագրած    ձախող արդիւնքներուն պատճառով:

Միւս  կողմէ, Անգլիոյ  ազգային խումբի նախկին անդամ՝ Փօլ Սքոլզ յայտարարեց, թէ երկրին  հաւաքականը  կարելիութիւն չունի  շահելու Մոնտիալ  2014-ի  բաժակը.« Ճիշդ է մենք ունինք Ճեռարտի եւ Ռունիի նման ֆութպոլիստներ, սակայն խմբային առումով  մենք այնքան ալ  չենք տպաւորեր».ըսաւ  Անգլիոյ ազգային  շապիկը  66 անգամ  կրած միջնապահը:

ԴԱՍԱՒՈՐՈՒՄ

1-     Արսենալ՝  13  մրց.  31 կէտ

2-      Չելսի՝ 13 մրց. 27 կէտ

3-     Մանչեսթըր Սիթի՝  13  մրց.  25 կէտ

Սպանիոյ ախոյեանութեան  15-րդ   հանգրուանի  մրցումներուն, Պարչելոնա  ճաշակեց եղանակի առաջին պարտութիւնը, երբ   1-0 արդիւնքով խոնարհեցաւ  Աթլեթիք Պիլպաոյի առջեւ:« Պասկ»երու   յաղթանակի  կոլը  նշանակեց Իկէր Մունիայինը: Պարչելոնայի կազմէն վնասուածքի  պատճառով բացակայեցան Լիոնէլ Մեսին, յետսապահներ  Գարլէս Փույոլը  եւ Տանիէլ  Ալվէզը: Աթլեթիքօ  Մատրիտ՝  2-0 արդիւնքով  պարտութեան մատնեց Էլչէն:  Քոքէ եւ Տիեկօ Գոսթա  նշանակեցին  Աթլեթիքոյի  կոլերը: Գոսթա՝ ախոյեանութեան գծով նշանակած կոլերուն թիւը  բարձրացուց  15-ի՝ երկու  կոլով զիջելով  ռմբարկուներու  ցուցակը  գլխաւորող Քրիսթիանօ Ռոնալտոյին: Իր  կարգին,  Ռէալ  Մատրիտ՝   4-0 արդիւնքով  տպաւորիչ   յաղթանակ մը արձանագրեց Վալատոլիտի  դէմ: Կարէթ  Պէյլ (3) եւ Քարիմ Պենզեմա  նշանակեցին  Ռէալի կոլերը,որուն կազմէն  վնասուածքի հետեւանքով կը բացակայէր  Քրիսթիանօ  Ռոնալտօն: Վալենսիա՝ շնորհիւ  Ժոնասի նշանակած երեք կոլերուն, 3-0 արդիւնքով պարտութեան մատնեց Օսասունան:

ԴԱՍԱՒՈՐՈՒՄ

1-      Աթլեթիքօ Մատրիտ՝   15 մրց.  40  կէտ

2-     Պարչելոնա՝   15  մրց 40 կէտ

3-     Ռէալ Մատրիտ՝  15 մրց.  37  կէտ

 Իտալիոյ   ֆութպոլի ախոյեանութեան  14-րդ հանգրուանի մրցումներուն,  Եուվենթուս՝   1-0 արդիւնքով  կարեւոր   յաղթանակ մը արձանագրեց   Ուտինեզէյի  դէմ:  «Եուվէ»յի   յաղթանակի կոլը նշանակեց  Ֆեռնանտօ   Լիորենթէն,  հանդիպման   վերջին վայրկեանին:  Ռոմա՝ 1-1 արդիւնքով   հաւասարութիւն մը արձանագրեց Պերկամոյի դէմ:  Ինթէր Միլան՝ սեփական  դաշտին մէջ նոյնպէս  1-1 արդիւնքով հաւասարութիւն մը արձանագրեց  Սամփտորիայի  դէմ:  Ա.Սէ.  Միլան՝   3-1 արդիւնքով   յաղթանակ մը արձանագրեց  Գաթանիայի դէմ, այս վերջնոյն դաշտին մէջ:  Ռիքարտօ Մոնթոլիվօ, Մարիօ  Պալոթելի եւ Գագա  նշանակեցին  Միլանի կոլերը:

Իտալական  մամուլը հերքեց Ա.Սէ.  Միլան ակումբի փոխնախագահ  Ատրիան»  Կալիանայի՝ ակումբէն   հեռանալու  մասին  տեղեկութիւնները:  Սակայն, քանի  մը օրեր առաջ, Կալիանի   յայտարարեց, թէ  մտադրած է   հեռանալ  Միլանէն:

ԴԱՍԱՒՈՐՈՒՄ

1-      Եուվենթուս՝  14 մրց. 37 կէտ

2-      Ռոմա՝ 14 մրց. 34 կէտ

3-     Նափոլի՝ 13 մրց. 28  կէտ

Գերմանիոյ  ֆութպոլի  ախոյեանութեան 14-րդ  հանգրուանի  մրցումներուն,  Պայերն  Միւնիխ եւ Պորուսիա Տորթմունտ  արձանագրեցին  յաղթանակ:  Շնորհիւ  Արիյէն  Ռոպէնի նշանակած զոյգ կոլերուն,  պաւարիական  խումբը  2-0 արդիւնքով պարտութեան մատնեց  Այնթրախթ  Պրունշուայքը:   Միւս կողմէ,  Պայէր Լեվերքուզեն՝  Սոն  Հին Մինի  (2) եւ  Շթեֆան  Քիսլինկի  կոլերուն շնորհիւ, 3-0 արդիւնքով պարտութեան մատնեց Նիւրենպերկը:  Տորթմունտ՝  3-1 արդիւնքով  յաղեց  Մայնցին՝ այս  վերջնոյն  դաշտին մէջ: Փիեռ   Էմերիք  Օպամէյանկ եւ  Ռոպերթ  Լեւանտովսքի (2)  նշանակեցին  հիւրերուն կոլերը: Շալքէ 04՝  երեք անպատասխան գնդակ  զետեղեց Շթութկարթի բերդին մէջ: Ճեֆըրսըն  Ֆարֆան (2) եւ Ճերմէյն  Ճոնս նշանակեցին Շալքէի կոլերը:

ԴԱՍԱՒՈՐՈՒՄ

1-     Պայերն  Միւնիխ՝ 14 մրց.  38 կէտ

2-     Պայեր Լեվերքուզեն  14 մրց.  34 կէտ

3-      Պորուսիա Տորթմունտ՝  14 մրց.  31  կէտ

Ֆրանսայի ախոյեանութեան  15-րդ  հանգրուանի  մրցումներուն, Մոնաքօ՝  2-0 արդիւնքով պարտութեան մատնեց  Ռէնը:  Ճէյմս  Ռոտրիկէս եւ Անթոնի Մարթիալ   նշանակեցին Մոնաքոյի  կոլերը:  Սէն Թեթիէն՝ 4-0 արդիւնքով  պարտութեան մատնեց  Ռիմը: Նանթ կրեց  երկրորդ անընդմէջ  պարտութիւնը, երբ  1-0 արդիւնքով խոնարհեցաւ Կենկանի  առջեւ:  Լիլ՝ մրցակիցի դաշտին մէջ, 1-0 արդիւնքով  պարտութեան մատնեց Վալանսիէնը:  Ռոնի Ռոտելի նշանակեց  Լիլի  յաղթանակի կոլը:  Փարի Սէն  Ժերմէն՝ 4-0 արդիւնքով  յաղթանակ մը տարաւ   Լիոնի դէմ:    Էտինսոն  Գաւանի,  Զլաթան Իպրահիմովիչ (2) եւ  Թիակօ Սիլվա  նշանակեցին    մայրաքաղաքի կազմին կոլերը:

 Երեքշաբթի երեկոյեան, Ֆրանսայի   ֆութպոլի ախոյեանութեան մրցումներու գծով,  Լիլ պիտի  ընդունի Մարսէյը (Պէյրութի ժամով՝ 20.00), իսկ  Նիս՝  Մոնաքօն(Պէյրութի  ժամով՝ 22.00):

ԴԱՍԱՒՈՐՈՒՄ

1-Փարի Սէն  Ժերմէն՝  15 մրց.  37 կէտ

2- Լիլ՝  15 մրց.  33 կէտ

3 –  Մոնաքօ՝  15  մրց.  32 կէտ

Փորթուգալի մէջ, 53  խաղ անպարտելի մնալէ ետք,  Փորթօ կրեց իր  առաջին պարտութիւնը, երբ  1-0 արդիւնքով խոնարհեցաւ Ակադեմիայի առջեւ: Փորթուգալի ախոյեանութեան գծով Փորթօ  վերջին պարտութիւնը կրած էր   29  Յունուար  2012-ին, Ժիլ  Վիսենթէի առջեւ՝  3-1:

Ռուսիոյ  ֆութպոլի ախոյեանութեան գծով   Զենիթ՝ 1-1 արդիւնքով հաւասարութիւն մը արձանագրեց  Թերեքի դէմ: Մոսկուայի Սպարտակը  6-1 արդիւնքով պարտութեան մատնեց  Վոլկան: Հայաստանի հաւաքականի  յարձակող Արազ  Օզիպիլիս  նշանակեց   երկու  կոլ:

 

Հայաստանի ֆութպոլի ախոյեանութեան  14-րդ   հանգրուանի    մրցումներուն, անցեալ տարուան ախոյեան,  Կիւմրիի Շիրակը  սեփական դաշտին մէջ  1-1 արդիւնքով հաւասարութիւն մը արձանագրեց  Միքայի հետ:  Երեւանի  Արարատը՝ 2-0 արդիւնքով  պարտութեան մատնեց Փիւնիկը:  Գէորգ Նռանեան  նշանակեց  երեւանցիներուն զոյգ  կոլերը: Բանանց եօթ անպատասխան գնդակ  զետեղեց  Ալաշկերտի   բերդը:

ԴԱՍԱՒՈՐՈՒՄ

1-     Արարատ՝  14 մրց.  30 կէտ

2-     Շիրակ՝  14 մրց.  22 կէտ

3-     Գանձասար՝  14. Մրց  20 կէտ

ԼԵՒՈՆ ԱՐՈՆԵԱՆ՝ ԱՇԽԱՐՀԻ  ԵՐԿՐՈՐԴԸ

 Ճատրակի    միջազգային  ֆետերասիոնը հրապարակեց     մարզիկներու  համաշխարհային   դասակարգումը՝  Դեկտեմբեր ամսուան լոյսին տակ:   Հայազգի  Լեւոն Արոնեան՝ 2803  կէտով կը գրաւէ    ընդհանուր  դասաւորման   երկրորդ դիրքը:  Առաջին դիրքը կը գրաւէ աշխարհի ախոյեան Մակնուս  Գարլսընը՝  2872  կէտ: Լաւագոյն  տասնեակին մէջ են Վլատիմիր  Քրամնիքը,  Հիկարու  Նաքամուրան,  Վեսելին Թոփալովը,  Ալեքսանտր  Քրիշչուքը, Ֆապիանօ  Քարուանան,  Պորիս  Կելֆանտը,  Վիշուանաթան Անանտը եւ  Փիոթր  Սվիտլէրը:

 Անգլիացի  «գրոյսմասթըր» Նայճըլ Շորթի  նախատեսութեամբ,   յառաջիկայ տարուան ճատրակի աշխարհի ախոյեանութեան  տիտղոսին  համար,  այժմու ախոյեան՝  Մակնուս  Գարլսընի (23 տարեկան)  ամենալուրջ   մրցակիցները   պիտի   դառնան  Լեւոն Արոնեանը (31 տարեկան) եւՎլատիմիր Գրամնիքը (38  տարեկան): 

Աշխարհի նախկին ախոյեան Վեշուանաթան Անանտ ( 44 տարեկան) յայտարարեց, թէ  մտադրութիւն չունի  լքելու ասպարէզը:

ՉԻՍՈՐԱՅԻ  ՀԵՐԹԱԿԱՆ  ՅԱՂԹԱՆԱԿԸ

Բռնցքամարտի գերծանր  կարգի վարկածով  Եւրոպայի ախոյեան Տերէք Չիսորա  այս տարուան  ընթացքին արձանագրեց  իր չորրորդ  յաջորդական յաղթանակը երբ « Նոք Աութ»ի ենթարկեց Օնտրէյ  Փալայը:

LEAVE A REPLY

Please enter your comment!
Please enter your name here