ԼԻԲԱՆԱՆԵԱՆ ԿԱՐՃ ԼՈՒՐԵՐ

0
143

–         Մուսթաքպալ Հոսանքի պետ Ֆուատ  Սինիորա վերահաստատեց  Պաապտայի  Յայտարարութեան կառչելու եւ  Սուրիոյ հակամարտութեան  միջամուխ  չդառնալու անհրաժեշտութիւնը:  Սինիորա  նշեց, թէ  գարտինալ Ռաայի հետ  հանդիպման  ընթացքին, վերջինս  զօրակցութիւն  յայտնած է   իր տեսակէտներուն:

–         Իսրայէլեան   զինուորական աղբիւրներ  յայտնեցին, թէ  Հըզպալլայի դէմ   յառաջիկայ  պատերազմը  աւելի  բուռն պիտի  ըլլայ քան՝ 2006-ի պատերազմը եւ պիտի գերազանցէ իր   նախորդները: « Ճերուզալեմ Փոսթ» օրաթերթը կը գրէ,թէ  հարաւային Լիբանանի մէջ տիրող հանդարտութիւնը,  որեւէ մէկ պահուն փոփոխութեան կրնայ ենթարկուիլ:

–          Սայտայի   մօտ գտնուող պաղեստինեան  գաղթակայաններուն մէջ կը տիրէ  սպասողական  վիճակ:  Շրջանի բոլոր  կրթական հաստատութիւնները կը մնան փակ:  Պաղեստինեան աղբիւրներ  յայտնեցին,թէ կացութիւնը  կը մնայ  պայթուցիկ:

–         Բարգաւաճում եւ  Ազատագրութիւն խորհրդարանական խմբաւորումի անդամ Ալի Խրէյս դիտել  տուաւ, թէ 9-9-6  տարազով կառավարութիւն մը, խորքին մէջ 13-11 տարազին մէկ   տարբերակն է, ուր Մարտ 14-ի ուժերը պիտի ունենան  13  նախարար, Մարտ 8-ն՝ 11:  Խրէյս  ակնկալեց, որ Մարտ  14-ի ուժերը  ընթացք տան սոյն նախաձեռնութեան:

–         Զինուորական ատեանը  մինչեւ 30  Մայիս 2014 յետաձգեց նախկին նախարար Միշէլ Սըմեհայի  դատավարութիւնը՝  ամբաստանեալ Ալի Մամլուքին ուղղուած  հարցաքննութեան  յայտը  փոխանցուած չըլլալու պատճառով:

–         Լիբանանի  համար ստեղծուած Միջազգային Ատեանի  խօսնակ Մարթին Եուսէֆ յայտնեց, թէ  Լիբանան տակաւին չէ  կատարած    ընթացիկ տարուան իր  նիւթական  յանձնառութիւնը:

–         Մուսթաքպալ  Հոսանքի եւ Փաղանգաւոր Կուսակցութեան միջեւ  հանդիպում մը տեղի ունեցաւ, վերջինիս Սայֆիի  կեդրոնատեղիին  մէջ: Հանդիպման ընթացքին  քննարկուեցան   լիբանանեան  բեմի  վերջին զարգացումներ,  ինչպէս նաեւ՝ սահմանադրութեան կարգ մը յօդուածներ բարեփոխութեան  ենթարկելու Փաղանգաւոր Կուսակցութեան կողմէ առաջարկ մը:

 

LEAVE A REPLY

Please enter your comment!
Please enter your name here