ՈՒՔՐԱՆԻՈՅ ՑՈՒՑԱՐԱՐՆԵՐԸ ԿԱՌԱՎԱՐՈՒԹԵԱՆ ՀՐԱԺԱՐԱԿԱՆԸ ԿԸ ՊԱՀԱՆՋԵՆ

0
136

Եւրոպական Միութեան հետ Ընկերակցութեան համաձայնագիրը չստորագրելու  Ուքրանիոյ կառավարութեան քայլէն զայրացած ցուցարարներ, Երկուշաբթի, Դեկտեմբեր 2-ին շարունակեցին իրենց ցոյցերը՝ պահանջելով կառավարութեան հրաժարականը ու խորհրդարանին լուծարումը:
Ցուցարարները նաեւ մայրաքաղաքի որոշ շրջանները իրենց հակակշիռին տակ առին, մինչ ոստիկանութիւնը ցարդ որդեգրած կը թուի ըլլալ ընդհանրապէս չհակադարձելու քաղաքականութիւն մը:
Արդարեւ, Կիրակի օր հարիւր հազարաւոր ցուցարարներ դէպի Քիեւի Անկախութեան հրապարակ քայլարշաւ մը կատարեցին՝ անտեսելով ցոյցերը արգիլող կառավարութեան որոշումը: Անոնք կը բացագանչէին՝ «Քիեւը մերն է»:
Ցուցարարները ներխուժեցին Քիեւի քաղաքապետարանի շէնքը եւ թիրախ դարձուցին քաղաքապետարանէն շուրջ մէկ քիլոմեթր հեռու գտնուող նախագահական նստավայրը, ուր ոստիկանութիւնը արցունքաբեր կազ օգտագործելով՝ ամբոխը ետ մղեց:
Միւս կողմէ, նախագահ Վիքթոր Եանուքովիչ յայտարարեց, որ Ուքրանիա չի կրնար Ռուսիոյ հետ իր առեւտրական կապերը խզել. արգելափակուած ընդդիմադիր ղեկավար Եուլիա Թիմոշենքօ ուքրանացիներուն կոչ ուղղեց՝ «իշխանութեան քայլերը անպատասխան չձգելու»: Ան անցեալ Երկուշաբթի օրուընէ ի վեր այս հարցով հացադուլի դիմած է:
Նշենք, որ անցնող շաբաթավերջին Վրաստան եւ Մոլտովիա Եւրոմիութեան հետ Ընկերակցութիւնը հաստատելու առաջին քայլը առին:

 

LEAVE A REPLY

Please enter your comment!
Please enter your name here