ՕՊԱՄԱ ԿԸ ՊԱՀԱՆՋԷ ՌՈՒՍԱԿԱՆ ԶՕՐՔԵՐԸ ՀԵՌԱՑՆԵԼ ՈՒՔՐԱՆԻԱՅԷՆ

0
132

Նախագահ Պարաք  Օպամա  եւ  վարչապետ Անկելա Մերքէլ շեշտեցին Ուքրանիոյ հարցով  շփման խումբ ստեղծելու  անհրաժեշտութիւնը:  Օպամա  պահանջեց ռուսական   զօրքերու հեռացումը  Ուքրանիայէն: Ան   միա’ամանակ  պահանջեց   Խրիմի մէջ  գործելու  կարելիութիւններ ստեղծել  միջազգային  դիտորդներուն  առջեւ  եւ աջակցիլ  Մայիսին կայանալիք   նախագահական  ընտրութիւններուն: Օպամա, քննարկումներ  ունեցաւ Ֆրանսայի նախագահ Ֆրանսուա Հոլանտի,  Բրիտանիոյ վարչապետ  Տէյվիտ  Գամերոնի, Իտալիոյ վարչապետ Մաթէօ   Ռենցիի, Լաթվիոյ եւ  Լիթվայի  ղեկավարներուն հետ: Պետական քարտուղար Ճոն Քերրի, Մոսկուայէն  պահանջեց  առանց որեւէ հակադարձութեան   դիւանագիտական լուծումի կարելիութիւն ստեղծել Խրիմի  հարցով:

Ռուսիոյ արտաքին գործոց  նախարար Սերկէյ Լաւրով   պատրաստակամութիւն յայտնեց Արեւմուտքի հետ երկխօսութեան, աւելցնելով  թէ  Մոսկուա պիտի  չհանդուրժէ,  Ուքրանիոյ հակամարտութեան մէջ  զինք  կողմ   ներկայացնելու փորձերը . «Մենք  պատրաստ ենք անկողմնակալ եւ ազնիւ երկխօսութեան». դիտել տուաւ Լաւրով, աւելցնելով  որ  Քիեւի նոր իշխանութիւնները  ենթակայ կը մնան  ծայրայեղական  հոսանքներու: Ռուսիոյ արտաքին գործոց նախարարը  հանդիպում մը ունեցաւ Մոսկուայի մօտ  Ուքրանիոյ  դեսպանին հետ  եւ քննարկեց  երկկողմ  յարաբերութիւնները:

Քիեւի  դատարանը ապօրէն  յայտարարեց   Սեւաստափոլը Ռուսիոյ   մաս դառնալու   ձգտումները:   Արգելարանէն   ազատ արձակուած Եուլիա Թիմոշենքօ  բուժման ենթարկուելու  նպատակով  մեկնեցաւ  Գերմանիա: ԵԱՀԿ  փորձագէտներու  պատուիրակութիւն մը այսօր պիտի այցելէ Քիեւ:

Միւս կողմէ,  Ուքրանիոյ   կառավարութիւնը խնայողական արտակարգ քայլերու  դիմեց՝  տնտեսական  անելէն դուրս գալու  մտահոգութեամբ:

LEAVE A REPLY

Please enter your comment!
Please enter your name here