ԼԱՒՐՈՎ ՔԻԵՒԷՆ ԿԸ ՊԱՀԱՆՋԷ ԶՕՐՔ ՉԿՈՒՏԱԿԵԼ ՈՒՔՐԱՆԻՈՅ ՀԱՐԱՒԱՐԵՒԵԼԵԱՆ ՍԱՀՄԱՆԱԳԻԾԻՆ ՎՐԱՅ

0
99

Ռուսիոյ արտաքին գործոց նախարարութիւնը Քիեւէն   պահանջեց  զօրքեր չկուտակել Ուքրանիոյ հարաւարեւելեան շրջաններուն մէջ:  Մոսկուայի մէջ  արտաքին գործոց նախարար Սերկէյ  Լաւրով  ընդունեց Անկոլայի  իր պաշտօնակիցին Ճորճ  Ռեպելօ  Չիքոթիին:  Լաւրով  յայտնեց, թէ  Ուքրանիոյ նոր կառավարութիւնը Արեւմուտքին խոստումներէն խանդավառուելով  մագլցումի կը մղէ  Ռուսիոյ  հետ յարաբերութիւնները: Ան  ընդգծեց, թէ  Ռուսիոյ  դէմ միակողմանի  պատժամիջոցները պիտի  վնասեն  համաշխարհային համերաշխութեան: Այս առիթով, Լաւրով յայտնեց, թէ    հեռախօսային  խորհրդակցութիւններ կ’ունենայ  Միացեալ Նահանգներու իր պաշտօնակիցին Ճոն Քերրիի հետ:

Միացեալ Նահանգներու պետական  քարտուղար Ճոն Քերրի  յայտարարեց, թէ  յառաջիկայ տասը  օրերուն  ընթացքին    հանդիպումներ պիտի ունենայ Ուքրանիոյ ղեկավարութեան հետ՝ Ռուսիոյ  հետ   լարուածութիւնը    մեղմացնելու   նպատակով :

Ռուսական «Կազփրոմ» ընկերութիւնը  յայտարարեց, թէ  Ուքրանիա ձախողած է վճարելու  ներածած  կազին  Մարտ ամսուան պարտամուրհակը:  Աղբիւրը նշեց,թէ  Ուքրանիոյ ընդհանուր պարտքը  «Կազփրոմ»ին կը գնահատուի  2.2  միլիառ  տոլար:

Եւրոպայի Տիեզերական Գործակալութիւնը յայտարարեց, թէ իր   գործակցութիւնը պիտի  շարունակէ  Մոսկուայի հետ: Նշենք, թէ ՆԱՍԱ  պաշտօնապէս  խզեց իր  յարաբերութիւնները  Ռուսիոյ հետ:  Միւս կողմէ,  Եւրոպական Խորհուրդի Խորհրդարանական Վեհաժողովը  որոշած է  յատուկ  նիստ մը   գումարել Հինգշաբթի,  10 Ապրիլին: Լեհաստան եւ  Պալթեան երկիրներ պիտի  փորձեն  սառեցնել Ռուսիոյ անդամակցութիւնը վերոյիշեալ կազմակերպութեան մէջ:

Ռուսիոյ   տարբեր  քաղաքներու  մէջ  ապահովական  լուրջ  քայլամիջոցներ  ձեռնարկուեցան՝ ահաբեկչական գործողութիւններու առաջքը առնելու մտահոգութեամբ:  Փիաթիկորսքի եւ Վոլկոկրատի մէջ  ձերբակալուեցան տասնեակէ  աւելի կասկածելիներ:

Ուքրանիոյ առողջապահութեան նախարարութիւնը հաղորդեց, թէ  Քիեւի  մէջ   բախումներու ընթացքին  մահացած է   104  մարդ:

LEAVE A REPLY

Please enter your comment!
Please enter your name here