ԱՅՍՕՐ՝ ԱԹԼԵԹԻՔՕ ՄԱՏՐԻՏ – ՊԱՐՉԵԼՈՆԱ

0
124

ՉԵՄՓԻԸՆԶ  ԼԻԿ

Այսօր՝   Չորեքշաբթի, Եւրոպայի Ախոյեան Ակումբներու Ախոյեանութեան «Չեմփիընզ Լիկ»  մրցաշարքի  քառորդ աւարտական հանգրուանի  դարձի  մրցումներուն գծով  տեղի պիտի ունենան երկու  հետաքրքրական   հանդիպումներ:  Առաջինը, Մատրիտի  Վիչենթէ Գալտերոն մարզադաշտին մէջ  իրարու դէմ պիտի  հանէ  Աթլեթիքօ Մատրիտը եւ  Պարչելոնան:  Երթի   հանդիպումը երկու   խումբերուն միջեւ  վերջ գտած էր  1-1  հաւասարութեամբ: Հետաքրքրական  է, որ  զոյգ  խումբերուն միջեւ սուր մրցակցութիւն մը  ծաւալած է ընթացիկ  տարուան Սպանիոյ ֆութպոլի ախոյեանութեան տիտղոսին համար:  Աթլեթիքօ  մէկ կէտի առաւելութիւն մը կը վայելէ  գաթալոնական խումբին  նկատմամբ:

«Չեմփիընզ Լիկ»ի  քառորդ աւարտականի  երկրորդ  հանդիպումը իրարու դէմ պիտի  հանէ  տիտղոսակիր Պայերն Միւնիխը եւ Մանչեսթըր  Եունայթըտը:  Երթի  ճակատումը Օլտ  Թրեֆորտ   մարզադաշտին մէջ  վերջ գտաւ  1-1  հաւասարութեամբ:  Երկու  խումբերն ալ մարտական  տրամադրութեամբ  նախապատրաստուած են սոյն  հանդիպումին:  Անգլիական խումբէն  վնասուածքի հետեւանքով  պիտի  բացակայի  Ռոպին Վան Փըրսին:   Ուէյն Ռունիի  մարզավիճակը կը մնայ  հարցական:  Պայերն  դաշտ պիտի ներկայանայ առանց իր առանցքային  միջնապահ  Պասթիան  Շուայնշթայկըրին:

Աթլեթիքօ եւ Պայերն կրնան  նուազագոյն՝ 0-0  հաւասարութիւն արձանագրելով    անցնիլ  կիսաւարտականին, սակայն դժուար թէ հաւասարութիւնները վճռեն  զոյգ հանդիպումներուն  ելքը:

Մեր մարզասէր  ընթերցողները, այսօր երեկոյեան,  Պէյրութի  ժամով՝ 21.45-ին, պիտի  վայելեն   ֆութպոլի  երկու  յիշատակելի   հանդիպումներ:

LEAVE A REPLY

Please enter your comment!
Please enter your name here