ՊԸՐՐԻ՝ՊԱՀԱՆՋՆԵՐԸ ԻՐԱԿԱՆՑՆԵԼՈՒ ՅԱՋՈՂՈՒԹԻՒՆԸ ԿԸ ԿԱՐՕՏԻ ԲՈԼՈՐԻՆ ՄԱՍՆԱԿՑՈՒԹԵԱՆ

0
140

Բողոքի հաւաքներու, նստացոյցերու,  դասադուլի, ընկերային եւ  տնտեսական  տարբեր  բնոյթի    պահանջներու ահազանգին տակ,  խորհրդարանը երէկ առաւօտեան շարունակեց   օրէնսդիր   նիստերը: Խորհրդարանին առջեւ ներկայացուած  էր 14 յօդուածներէ  բաղկացած օրակարգ մը: Երկար քննարկումներէ ետք, խորհրդարանը  վաւերացուց քաղաքային  պաշտպանութեան մէջ  ծառայողներուն կարգավիճակը հաստատող օրինագիծը:  Պըրրի  փակեց նիստը ,  նշելով, թէ յաջորդ նիստը  պիտի  կայանայ այսօր՝ Հինգշաբթի   յետմիջօրէին: Ան շեշտեց, թէ  սեղանի վրայ  ներկայացուած  պահանջները  իրականացնելու  յաջողութիւնը   կը կարօտի  բոլորին գործակցութեան:

Սենտիքաներու համակարգող խորհուրդի  նախագահ Հաննա Ղարիպ  դարձեալ մերժեց յաւելուած տուրքերու (Թէ.Վէ.Ա) եւ կամ  տուրքերու   հաշւոյն կատարել աշխատավարձերու  յաւելումը:  Ղարիպ միասնականութեան կոչ ուղղեց  սենտիքաներուն: Ուսուցիչները,քաղաքային  պաշտպանութեան ծառայողներ   նստացոյց  մը կատարեցին Ռիատ Սոլհ հրապարակին մէջ  եւ  վերահաստատեցին իրենց  պահանջները:   Լիբանանի  Կեդրոնական Դրամատան ընդհանուր կառավարիչ Ռիատ Սալամէ  շեշտեց, թէ առանց  բարեկարգութիւններու իրագործման,  պետական գանձը  չի կրնար  հանդուրժել   նմանօրինակ  յաւելում մը:

Սեփական վարժարաններու մէջ  ծառայող  ուսուցիչներու սենտիքայի   նախագահ  Նաամէ Մահֆուտ  յայտարարեց, թէ նստացոյցերը պիտի դադրին մինչեւ Երկուշաբթի: Ան  աւելցուց, թէ խորհրդարանի նախագահ Նեպիհ Պըրրի  խոստացած է մինչեւ  Երկուշաբթի լուծում մը գտնել աշխատավարձերու  յաւելման  թղթածրարին:   

Նախագահական    ընտրութիւններու   ծիրէն ներս, խորհրդարանի նախագահ Նեպիհ Պըրրի  երէկ  յայտնեց,թէ   մինչեւ ամսագլուխ՝ նախագահ ընտրելու նիստի պիտի հրաւիրէ խորհրդարանը: Քաղաքական  մեկնաբաններու կարծիքով,  քաղաքական  հոսանքներու  մեծամասնութիւնը  պիտի  ընդառաջէ  Պըրրիի հրաւէրին:    

Վարչապետ  Թամամ Սալամ   գլխաւորեց   նաւթի եւ  կազի արտահանման պայմանները  ուսումնասիրող  կառավարական յանձնախումբի նիստին,որուն մասնակցեցան փոխվարչապետ  Սամիր Մուքպէլը, Ալի Հասան Խալիլը,  Ուայէլ Ապու Ֆաուրը,  Մուհամմէտ Մաշնուքը, Արթուր Նազարեանը,  Ալէն Հաքիմը,  Նեպիլ Տը Ֆրէյժը, Ղազի Զըայթէրը, եւ արտաքին  գործոց նախարարի ներկայացուցիչ Սեզար  Ապի Խալիլը  եւ այլ անձնաւորութիւններ:  Յանձնախումբը իր  յաջորդ նիստը պիտի գումարէ 23 Ապրիլին:

LEAVE A REPLY

Please enter your comment!
Please enter your name here