ՀՀ Սփիւռքի Նախարարի Պաշտօնակատար Հրանոյշ Յակոբեան Ընդունեց ՄԱԿ-ի Փախստականներու Հարցերով Գերագոյն Յանձնակատարի Հայաստանեան Գրասենեակի Ղեկավար Քրիստոֆ Պիերուիրթը

0
129

Ապրիլ 9-ին ՀՀ սփիւռքի նախարարի պաշտօնակատար Հրանոյշ Յակոբեան ընդունեց ՄԱԿ-ի Փախստականներու հարցերով գերագոյն յանձնակատարի հայաստանեան գրասենեակի ղեկավար Քրիստոֆ Պիերուիրթի գլխաւորած պատուիրակութիւնը: Հանդիպման ներկայ եղած էր նաեւ §Սուրիահայերու հիմնախնդիրները համակարգող կեդրոն» հասարակական կազմակերպութեան նախագահ Լենա Հալաճեան:

Հանդիպման ընթացքին քննարկուեցան Սուրիոյ Քեսապ քաղաքին մէջ տեղի ունեցած իրադարձութիւններն ու ատոնց հետեւանքները, Սուրիոյ քաղաքացիական պատերազմի հետեւանքով Հայաստան տեղափոխուած սուրիահայերու հիմնախնդիրները` անոնց կացարաններով ապահովելու եւ Նոր Հալէպ թաղամասի կառուցման առնչուող  շարք մը այլ հարցեր:

ՀՀ սփիւռքի նախարարի պաշտօնակատար Հրանոյշ Յակոբեան բարձր գնահատեց ՄԱԿ-ՓԳՀ գործակցութիւնը, Հայաստան տեղափոխուած սուրիահայերու հիմնախնդիրներու լուծման ուղղուած անոնց աշխոյժ գործունէութիւնն ու ՀՀ սփիւռքի նախարարութեան ծրագիրներուն ու ձեռնարկներուն Ք. Պիերուիրթի մասնակցութիւնը:

ՄԱԿ-ի Փախստականներու հարցերով գերագոյն յանձնակատարի հայաստանեան գրասենեակի ղեկավարը շնորհակալութիւն յայտնեց նախարարին կառուցողական քննարկումներու, առաջարկութիւններու եւ համագործակցութեան համար: Ան նշեց, որ ուշադիր կը հետեւի քեսապեան դէպքերուն, մշտապէս կապի մէջ է ՄԱԿ-ի համապատասխան ստորաբաժանումներուն հետ եւ հայ ժողովուրդի դիրքորոշումը փոխանցած է ՄԱԿ-ի գործընկերներուն: Ք. Պիերուիրթին իր խօսքին մէջ կարեւոր համարեց նաեւ Հայաստան ապրող սուրիահայերու հիմնախնդիրներուն վերաբերող հարցերը` յոյս յայտնելով, որ ատոնք շուտով կը ստանան իրենց լուծումները:

Հանդիպման աւարտին կողմերը պայմանաւորուեցին շարունակելու համատեղ աշխատանքները` ստեղծուած իրավիճակին մէջ սուրիահայերու հիմնախնդիրները լուծելու, յատկապէս` բնակարանաշինութեան եւ կացարաններով ապահովելու ուղղութեամբ ծրագիրները իրականացնելու համար:

LEAVE A REPLY

Please enter your comment!
Please enter your name here