ԼԱՒՐՈՎ՝ ՀԱԿԱՌՈՒՍԱԿԱՆ ՏՐԱՄԱԴՐՈՒԹԻՒՆՆԵՐԸ ԺԽՏԱԿԱՆ ՀԵՏԵՒԱՆՔ ԿՐՆԱՆ ՈՒՆԵՆԱԼ ԵՒՐՈՊԱՅԻ ԿԱՅՈՒՆՈՒԹԵԱՆ ՎՐԱՅ

0
120

«ՃԻ -7»  անդամ  պետութիւններու  ելեւմտական նախարարները Ուաշինկթընի մէջ քննարկեցին Ուքրանիոյ   տնտեսական  օժանդակութիւն  ցուցաբերելու  հարցը: Հանդիպման  ընթացքին քննարկուեցաւ  Մոսկուայի դէմ  լրացուցիչ պատժամիջոցներու հարցը: Միացեալ Նահանգներու  Զարգացման   Գործակալութիւնը Ուքրանիոյ մէջ  բարեկարգութիւններ իրականացնելու  նպատակով  13.5   միլիոն տոլարի օժանդակութիւն մը խոստացաւ Քիեւի  կառավարութեան:  Իր կարգին, Հունգարիա խոստացաւ  որոշ   քանակութեամբ  բնական  կազ   մատակարարել:

Ռուսիոյ արտաքին  գործոց նախարար Սերկէյ  Լաւրով պատրաստակամութիւն յայտնեց մասնակցելու  Ուքրանիոյ տագնապը  քննարկելու  նպատակով, Երկուշաբթի, 14  Ապրիլին կայնալիք  Եւրոպական Միութիւն,  Ուքրանիա, Միացեալ  Նահանգներ   հանդիպումին:  Լաւրով ըսաւ, թէ Արեւելեան  Գործընկերութեան ծրագիրը նախատեսուած էր զերոյական արդիւնքով  խաղի  համար եւ կը կիրառուէր Ռուսիան դիմակայելու նպատակով.« հակառուսական տրամադրութիւնները  պիտի սպառնան  Եւրոպայի  ապակայունութեան». զգուշացուց ան: 

Միւս կողմէ, Ռուսիոյ նախագահի մամլոյ   քարտուղար  Տիմիթրի Պեսքով  յայտնեց, թէ   Մոսկուա  ներկայիս  մտադրութիւն չունի Ուքրանիայէն պահանջելու  անոր պարտքերը, որոնք կը   գնահատուին 35  միլիառ տոլար:

Ռուսիոյ   ընդհանուր դատախազ Եուրի Չայքա  մերժեց Ուքրանիոյ նախագահ Վիքթոր Եանուքովիչը յանձնել Քիեւի նոր  իշխանութիւններուն,  ընդգծելով որ Եանուքովիչ կը մնայ Ուքրանիոյ  օրինաւոր նախագահը:

Խրիմի   խորհրդարանը երէկ առաւօտեան միաձայնութեամբ   վաւերացուց նոր  սահմանադրութիւնը: Սահմանադրութիւնը   հանրապետութիւն կը  յայտարարէ  Խրիմը,  Սիմֆերոփոլը՝  մայրաքաղաք: Խրիմի թաթարներու  ղեկավար  Ռեֆաթ Չուրպարով  անընդունելի նկատեց սահմանադրութիւնը: Ան նշեց, թէ  սահմանադրութիւնը չի ցոլացներ  թաթարներուն իրաւունքներուն  վերաբերող  կարգ մը դրոյթներ:

 ՄԱԿ-ի մօտ Ռուսիոյ մնայուն ներկայացուցիչ Ալեքսի Պորոտաֆքին յայտնեց, թէ Ուքրանիոյ   տագնապը  որեւէ ազդեցութիւն չէր  ունեցած  Սուրիոյ հակամարտութեան  վերաբերեալ ռուս-ամերիկեան  համագործակցութեան վրայ:

Գետնի  վրայ,  Ուքրանիոյ  տարբեր շրջաններու  մէջ   բախումներ  տեղի կ’ունենան ռուսամէտներու եւ նոր  իշխանութիւններու կողմնակիցներուն միջեւ:

LEAVE A REPLY

Please enter your comment!
Please enter your name here