ԵՒՐՈՊԱ ԿԸ ՍՊԱՌՆԱՅ ԱՏՐՊԷՅՃԱՆԱԿԱՆՈՎ ՓՈԽԱՐԻՆԵԼ ՌՈՒՍԱԿԱՆ ԿԱԶԸ

0
102

Պուլկարական «Նովինայթ» գործակալութիւնը կը հաղորդէ, որ Եւրոպական Յանձնաժողովի նախագահ Ժոզէ Մանուէլ Պարոսօ, Պուլկարիա իր այցելութեան ընթացքին յայտարարած է, որ Եւրոպան նախապատուութիւն չի տար «Հարաւային հոսք» կազատարի նախագիծին, որովհետեւ անոր մատակարարը նոյնն է՝ ռուսական «Կազփրոմ»ը: Պարոսօ նշած է, որ հրաժարելով «Հարաւային Հոսք»էն՝ Եւրոպան կրնայ նախապատուութիւն տալ Իտալիոյ տարածքով ատրպէյճանական կազի ներածման, եթէ «Ատրպէյճան յաջողի դիմակայել Ռուսիոյ ճնշումը»: Ան Պուլկարիոյ խորհուրդ տուած է զգոյշ ըլլալ Ռուսիոյ հետ կազային նախագիծերուն հարցով, որպէսզի անոնք վնաս չհասցնեն այլ նախագիծերու, որոնք կրնան Պուլկարիոյ ուժանիւթի աղբիւրներուն այլազանութիւն ապահովել:
«Հարաւային Հոսք»ը ռուս-իտալա-ֆրանս-գերմանական նախագիծ մըն է, որ պիտի երկարի Սեւ ծովու յատակէն մինչեւ Պուլկարիոյ Վառնա նաւահանգիստը, ուրկէ անոր երկու ճիւղերը պիտի անցնին Պալքանեան թերակղզիէն՝ հասնելով Իտալիա եւ Աւստրիա: 16 միլիառ եուրօ արժող կազատարին կառուցումը սկսած է 2012-ին, իսկ աւարտը նախատեսուած է 2015-ին: Անոր նպատակն է ռուսական կազը Եւրոպա հասցնելու նոր ուղիներ ստեղծել, Ուքրանիայէն եւ Թուրքիայէն կախուածութիւնը նուազեցնելու համար:

LEAVE A REPLY

Please enter your comment!
Please enter your name here