ԱՇԽԱՏԱՎԱՐՁԵՐՈՒ ՅԱՒԵԼՄԱՆ ՕՐԻՆԱԳԻԾԸ ՈՒՍՈՒՄՆԱՍԻՐՈՒԹԻՒՆՆԵՐՈՒ ԿԸ ԿԱՐՕՏԻ

0
109

Լիբանանեան   խորհրդարանը երէկ առաւօտեան եւ յետմիօրէին, երկու   նիստերու ընթացքին  քննարկեց  աշխատավարձերու յաւելման թղթածրարը: Նախքան նիստը, սենտիքայական խորհուրդը ներկայացնող պատուիրակութիւն մը խորհրդարանի  քարտուղարութեան փոխանցեց  յուշագիր  մը:

Նիստի ընթացքին խորհրդարանի նախագահ Նեպիհ Պըրրի դիտել տուաւ, թէ  աշխատավարձերու  յաւելման պահանջը արդար է,  որուն  դէմ ոչ ոք  կրնայ առարկել: Պըրրի  նկատել տուաւ, որ յաւելումին  զուգահեռ  անհրաժեշտ է   հաշուի առնել պետութեան  պիւտճէական կացութիւնը: Պըրրի  ընդգծեց, թէ  յաւելման  որոշումը եւ  մնայուն միջոցներ հայթայթելու մտահոգութիւնը   իրենց ազդեցութիւնը  պիտի ունենան երկրին ընկերային կայունութեան  վրայ:  Քննարկումներու  ընթացքին, խորհրդարանը մերժեց  սոյն  օրակարգին քննարկումները   գաղտնի  կատարելու  Անթուան Զահրայի  առաջարկը:Խորհրդարանին մէջ երկփեղկումը  զգայլի  էր   երեսփոխաններուն  արտայայտութիւններուն  ընդմէջէն:   Մուսթաքպալ Հոսանքի պետ Ֆուատ   Սինիորա  պահանջեց  խորհրդարանական  յանձնախումբ մը կազմել, քննարկելու  միջոցներ հայթայթելու  կարելիութիւնները: Լիբանանի Կեդրոնական Դրամատան  ընդհանուր կառավարիչ  ՌիատՍալամէ   պահանջեց   թղթածրարը  վերադարձնել կառավարութեան եւ  վերանայիլ, որպէսզի աւելի առարկայական ուսումնասիրութիւն մը կատարուի յաւելումներու ընդհանուր  գումարին շուրջ:

Այն պահուն երբ խորհրդարանը  կը կատարէր յաւելումի օրակարգին քննարկումը, սենտիքայաքական խորհուրդի անդամ Նաամէ Մահֆուզ՝  ժողովրդային  յեղափոխութենէ մը զգուշացուց,  աշխատավարձերու   յաւելումի   օրինագիծը  չվաւերացուելու պարագային: Իսկ  համակարգումի խորհուրդի  նախագահ  Հաննա Ղարիպ  յայտարարեց, թէ  սուտ  են  բոլոր այն արտայայտութիւնները, որոնք տնտեսական  փլուզումէ կը զգուշացնեն աշխատավարձերու  յաւելման  պարագային:

LEAVE A REPLY

Please enter your comment!
Please enter your name here