ՌԷԱԼ ՄԱՏՐԻՏ ՇԱՀԵՑԱՒ ՍՊԱՆԻՈՅ ԹԱԳԱՒՈՐԱԿԱՆ ԲԱԺԱԿԸ

0
134

Ռէալ Մատրիտ իր պատմութեան մէջ  19-րդ  անգամ ըլլալով շահեցաւ Սպանիոյ Թագաւորական բաժակը: Աւարտական մրցումին արքայական ակումբը   2-1 արդիւնքով  պարտութեան մատնեց  իր վաղեմի մրցակին  Պարչելոնային:  Ճակատումը կայացաւ   Վալենսիայի   Մեսթալիա  մարզադաշտին մէջ:  Ռէալի կազմէն  կը  բացակայէր  Քրիսթիանօ Ռոնալտօն:  Անխէլ Տի Մարիա՝ 11-րդ  եւ Կարէթ Պէյլ՝ 85-րդ  վայրկեաններուն նշանակեցին Ռէալի կոլերը:  Մարք   Պարթրա՝ Պարչելոնայի:

Մրցումէն ետք,  Ռէալ մարզիչ Գառլօ Անճելոթի  յայտարարեց, թէ երջանիկ է  բաժակը շահելու  առիթով.« Պարչելոնա կը փորձէր  ճեղքել մեր պաշտպանութիւնը, սակայն մենք գիտէինք, թէ  ինչպէս պէտք է պաշտպանուինք: Ռէալը արժանի էր այս   յաղթանակիւն».ըսաւ Անճելոթի: Պարչելոնայի մարզիչ  Ճեռարտօ  Մարթինօ ըսաւ, թէ  շատ կը ցաւի  համակիրներուն համար, որոնք  ճաշակեցին այս պարտութիւնը:  Ան  հաւաստեց, թէ իր  ապագան  կախեալ  չէ այս մրցումէն:  

Պարչելոնայի նախկին  մարզիկներէն Խրիսթօ Սթոյչքով  քննադատեց  գաթալոնական ակումբին   փոխանցումային քաղաքականութիւնը, իսկ   Եոհան Քրոյֆ  պահանջեց,որ Պարչելոնայի  տնօրէնութիւնը  մարզիչի պարտականութեան վերստին հրաւիրէ Խօսեփ Կուարտիոլան:

Սպանիոյ ֆութպոլի ախոյեանութեան  գծով, Ուրբաթ  երեկոյեան, Աթլեթիքօ Մատրիտ պիտի  ընդունի  Էլչէն:  Հանդիպումը պիտի սկսի Պէյրութի  ժամով՝  21.30-ին:

 Անգլիոյ  ֆութպոլի ախոյեանութեան   յետաձգուած  մրցումի մը  գծով, Մանչեսթր Սիթի, սեփական դաշտին մէջ 2-2 արդիւնքով   հաւասարութիւն մը արձանագրեց  ընդհանուր դասաւորման  վերջին դիրքը գրաւող Սանտերլանտի դէմ:   Ֆերնանտինիօ եւ Սամիր Նասրի  նշանակեցին Սիթիի կոլերը,   Գոնըր  Ուիքհամ՝  Սանտերլանտի:  Սոյն  հաւասարութիւնը  ծանր  հարուած մըն էր  ախոյեանութեան տիտղոսին տիրանալու Մանչեսթըր Սիթիի  յոյսերուն:

Ախոյեանութեան գծով այլ  հանդիպումի մը    ընթացքին,  Գրիսթալ Փալաս 3-2 արդիւնքով  պարտութեան մատնեց  Էվըրթընին, այս  վերջնոյն դաշտին մէջ:

ԸՆՀԴԱՆՈՒՐ  ԴԱՍԱՒՈՐՈՒՄ

1-      Լիվըրփուլ՝   34  մրց. 77 կէտ

2-     Չելսի՝ 34  մրց.  75  կէտ

3-      Մանչեսթըր Սիթի՝ 33  մրց՝  71  կէտ

4-     Արսենալ՝  34  մրց.   67 կէտ

Գերմանիոյ  ֆութպոլի  բաժակի  եզրափակիչ  հանդիպումը  իրարու դէմ պիտի հանէ  Պայերն Միւնիխը եւ  Պորուսիա  Տորթմունտը:  Կիսաեզրափակիչի առաջին  հանդիպումին,   Պայերն Միւնիխ՝   5-1 արդիւնքով  պարտութեան մատնեց  Քայզերսլոթերնը:   Շուայնշթայկըր,  Քրոս,  Միւլըր, Մանչուկիչ  եւ  Կէոցէ նշանակեցին պաւարիական խումբին կոլերը:  Կիսաւարտականի   երկրորդ  մրցումին,  Պորուսիա Տորթմունտ 2-0 արդիւնքով  պարտութեան մատնեց  Վոլֆսպուրկը:  Տորթմունտի  կոլերը նշանակեցին  Հենրիխ Մխիթարեանը եւ  Ռոպերթ Լեվանտովսքին:

Գերմանիոյ բաժակի աւարտականը   տեղի պիտի ունենայ  17  Մայիսին:

  Հայաստանի Ֆութպոլի  բաժակի աւարտական հանդիպումը  իրարու դէմ պիտի հանէ  Փիւնիկը եւ   Գանձասարը:  Կիսաւարտականի հանդիպումներուն,  Փիւնիկ  պարտութեան մատնեց Միկային,իսկ   Գանձասարը՝  Բանանցին:

LEAVE A REPLY

Please enter your comment!
Please enter your name here