ՎԱՐՉԱՊԵՏ ՅՈՎԻԿ ԱԲՐԱՀԱՄԵԱՆ ԽՈՍՏԱՑԱՒ ԼՈՒԾՈՒՄՆԵՐ ԳՏՆԵԼ ԿՈՒՏԱԿԱՅԻՆԻ ՀԱՐՑՈՎ

0
107

Հայաստանի նորանշանակ վարչապետ Յովիկ Աբրահամեանի եւ տեղեկատուական արհեստագիտութեան ներկայացուցիչներու միջեւ կայացած հանդիպումին ընթացքին ներկայացուեցաւ «Ինֆորմացիոն տեխնոլոգիաների ձեռնարկութիւնների միութեան» այն տեսակէտը, որ «կուտակային»ի վերաբերեալ Սահմանադրական դատարանի որոշումէն ետք հաստատուած այս «երկչոտ» վիճակին մէջ, եթէ յանկարծ պետութիւնը որոշէ դիմել կոշտ մեթոտներու, ապա անիկա պատճառ պիտի ըլլայ, որ Հայաստանէն կարգ մը ձեռնարկութիւններ դուրս փոխադրեն իրենց աշխատանքները։ Այս դիտարկման ի պատասխան՝ Յովիկ Աբրահամեան խոստացաւ լուծումներ առաջարկել, աւելցնելով թէ որոշուած է «կուտակային»ի հետ կապուած հարցերը քննարկել «երկրորդ ռաունտով»:
Այս մասին յայտնեց «Ինֆորմացիոն տեխնոլոգիաների ձեռնարկութիւնների միութեան» գործադիր տնօրէն Կարէն Վարդանեան. «Նկարագրեցինք այս վիճակը, վարչապետն ասաց, որ ինքը դեռ մի շարք հանդիպումներ պէտք է անցկացնի, ասաց, որ շուտով կառավարութիւն կը ձեւաւորուի, եւ ինքը կը փորձի լուծումներ առաջարկել: Եւ պիտի երկրորդ «ռաունդը» քննարկենք»:
Յիշեցնենք, որ Յովիկ Աբրահամեան իր վարչապետութեան երրորդ աշխատանքային օրը հանդիպում ունեցած էր ոլորտի ներկայացուցիչներուն հետ, յայտարարած է, որ իր մօտեցումը պիտի ըլլայ գործնական եւ աւելցուց. «Ոչ միայն այս ոլորտի, այլեւ բոլոր ոլորտների հետ մեր բոլոր պայմանաւորուածութիւնները լինելու են խօսք եւ պատասխանատուութիւն: Ակնկալում եմ ձեր ակտիւ մասնակցութիւնը եւ առաջարկութիւնները»։
Ի պատասխան այն հարցումի, թէ ի՞նչ էր «կուտակային»ին նկատմամբ Յովիկ Աբրահամեանի մօտեցումը՝ Կարէն Վարդանեան ըսաւ. «Ես կարծում եմ՝ աւելի մօտ էր դրականի։ Մեր հանդիպումն աւելի շատ ծանօթացման հանդիպում էր, մենք մեր դիրքորոշումն ենք ասել, ինքն էլ ասել է՝ կը մտածեմ: Ինքը ինչ որ շատ կտրուկ դիրքորոշումներ չի արտայայտել, մենք ասել ենք մեր դիրքորոշումը»:
Տեղեկատուական արհեստագիտութեան մասնագէտը նշեց, որ իրենք պատրաստակամութիւն յայտնած են մասնակցելու «պարտադիր»ի գծով օրէնքի նոր մշակման:
Յիշեցնենք, որ նախագահ Սերժ Սարգսեան յայտարարած էր, որ վարչապետը կը շարունակէ այն բարեփոխումները, որոնք ընթացքի մէջ են եւ ի լրումն այս ծրագիրներուն՝ առանձնացուցած է պարտադիր կուտակային համակարգը:
Այս յայտարարութեան առնչութեամբ Կարէն Վարդանեան ըսաւ. «Կարծում եմ՝ նախագահը խորը թիւրիմացութեան մէջ է, եւ կարծում եմ, որ եթէ նորմալ քննարկումներ լինեն, եւ նախագահը պատկերացնի, թէ ինչ պրոբլեմներ են ստեղծւում, ապա նախագահը, մարդ է, կարծիք է արտայայտել, կարող է իր կարծիքը փոխել»:
Աւելին՝ Կարէն Վարդանեան բառախաղով ընդգծեց. «Չեմ կարծում, որ նախագահը «կուտակայինի»ի վրայ է երդուել, ինքը երդուել է Սահմանադրութեան վրայ: Եւ միակ բանը, որ պիտի չխախտի՝ Սահմանադրութիւնն է: Իսկ «կուտակային»ի վերաբերեալ կարծիքը, որ յայտնել է, կարող է փոխել»:
Ըստ անոր՝ քննարկուած են նաեւ բնագաւառի զարգացման հարցեր՝ արհեստագիտութեան հասանելիութիւն, կրթութիւն, ոլորտի կառավարման համակարգ:
«Ինկուբատոր հիմնադրամ»ի տնօրէն Բագրատ Ենգիբարեան, որ հանդիպումին մասնակիցներէն էր, նշեց, թէ վարչապետին հետ քննարկած են այն, որ պէտք է տարբեր աշխատանքային խումբեր ստեղծել, որպէսզի կարելի ըլլայ հասկնալ, թէ ի՛նչ փոփոխութիւններ պէտք է կատարուին օրէնքին մէջ:

 

LEAVE A REPLY

Please enter your comment!
Please enter your name here