Հալէպի Մէջ Պատերազմական Վիճակ

0
105

ՀԱԼԷՊ, «Գանձասար».- Հինգշաբթի, Ապրիլ 17ի վաղ առաւօտեան ժամերէն, Հալէպի շարք մը շրջաններու մէջ բոլորովին պատերազմական վիճակ կը տիրէր: Հայաբնակ կարգ մը շրջաններու մէջ, ինչպէս՝ Նոր Գիւղի եւ Սիւլէյմանիէի, գրեթէ ամայութիւն կը տիրէր:
Հիմնական բախումները տեղի ունեցած են Հալէպի Աղիօլ, Պապ Հատիտ եւ Սեքենեթ Հանանօ շրջաններուն մէջ: Յատկապէս բուռն բախումներ կ՛ընթանան սուրիական օրինական զօրքին եւ զինեալ խմբաւորումներուն միջեւ: «Սանա» լրատու գործակալութեան համաձայն՝ Ապրիլ 17ին հրթիռներու պայթումներուն հետեւանքով, Հալէպի մէջ զոհուած են 7 մանուկներ եւ արձանագրուած է աւելի քան երեսուն վիրաւոր: Վիրաւորներու շարքին կայ հայ մը՝ Կարօ Աւագեան (1966ի ծնունդ), որ վիրաւորուած է Ճապրիէի շրջանին մէջ:
Չորեքշաբթի երեկոյեան ուշ ժամերէն սկսեալ, զինեալ խմբաւորումներ տասնեակներով հրասանդեր արձակեցին Հալէպի Թելեֆոն Հաուայի, Սուլէյմանիէ, Ազիզիէ եւ Նոր Գիւղ շրջաններուն վրայ: Ուշ ժամերու հրաձգութեան, պայթումներու, հրասայլերու, ուղղաթիռներու, թնդանօթներու եւ բախումներու ձայները լարուած վիճակի մէջ պահած են Հալէպի բնակչութիւնը մինչեւ առաւօտ: Ապրիլ 17ի առաւօտեան, երկրաշարժի ուժգնութեամբ երեք պայթումներ ցնցած են քաղաքը: Լրատուամիջոցներ հաղորդած են, թէ այդ ցնցումները հետեւանք էին Սէյիտ Ալի, Սեքենեթ Հանանօ եւ Հին Հալէպ շրջաններուն մէջ եղած պայթումներուն:
Միւս կողմէ, «Մայատին» արբանեակային կայանը կը յայտնէ, թէ սուրիական զօրքը սպաննած է 12 զինեալներ Հալէպի Զահրաա շրջանին մէջ: Նոյն աղբիւրը կը յայտնէ, թէ Սուրիոյ խորհրդարանը Ապրիլ 21ը ճշդած է որպէս նախագահական ընտրութեանց թեկնածուներու արձանագրութեան մեկնարկի թուական:
Նաեւ, օժանդակութեան աշխատանքները կը շարունակուին, սննդամթերք եւ կենցաղային պիտոյքներու կողովներ կը բաժնուին, վիրաւորներ կը փոխադրուին հիւանդանոց եւ հիւանդանոցներու մէջ վիրաւորներու այցելութիւն կը կատարուի:
Նշենք, որ Ապրիլ 17ին, Սուրիոյ մէջ ֆրանսական տիրապետութենէն ազատագրուելու «Ճալաա» տօնը կը նշուի:

 

LEAVE A REPLY

Please enter your comment!
Please enter your name here