Սերժ Սարգսեան Ընդունած Է «Թուիթըր»ի Փոխնախագահը

0
104

ԵՐԵՒԱՆ, «Ազատութիւն».– Հայաստանի նախագահ Սերժ Սարգսեան 17 Ապրիլին ընդունած է «ԹՈՒՄՕ» ստեղծարար արհեստագիտութիւններու կեդրոնի հրաւէրով Հայաստան գտնուող «ԹՈՒՄՕ»ի խորհուրդի անդամ, «Թուիթըր»ի փոխնախագահ Րաֆֆի Գրիգորեանը:
Նախագահը ողջունած է հիւրը եւ կարեւոր նկատած անոր այցելութիւնը, որուն նպատակն է ծանօթանալ «ԹՈՒՄՕ»ի կրթական ծրագիրին, աջակցիլ կեդրոնի կրթական բովանդակութեան մշակման ծրագրաւորման, ինչպէս նաեւ Հայաստանի մէջ տեղեկատուական արհեստագիտութեան ոլորտի մասնագէտներուն հետ քննարկել այս բնագաւառի զարգացման համաշխարհային միտումներն ու հայկական ոլորտը յուզող մարտահրաւէրները:
Ընդգծելով, որ տեղեկատուական արհեստագիտութեան ոլորտի զարգացումը Հայաստանի տնտեսութեան առաջնահերթութիւններէն է՝ Սերժ Սարգսեան այս բնագաւառին մէջ հայրենակիցներուն յաջողութիւնները ուրախալի ու երիտասարդ սերունդին համար ուղենշային նկատած է: Ան կարեւոր սեպած է Հայաստանի տեղեկատուական արհեստագիտութեան ոլորտի մասնագէտներուն հետ սերտ համագործակցութեան զարգացումը, փորձառութեան փոխանակումն ու խորհրդատուութիւնը:
Հանդիպումին ընթացքին Րաֆֆի Գրիգորեան ներկայացուցած է իր այցելութեան ծիրին մէջ ունեցած հանդիպումները, որոնց կարգին՝ տեղեկատուական արհեստագիտութեան ոլորտի մասնագէտներուն հետ: Անոր համաձայն՝ այդ տեսակցութիւնները մեծ յոյս կը ներշնչեն, քանի որ կան ոլորտի զարգացման առնչուած ոգեւորիչ օրինակներ, որոնք հեռանկարային կը դարձնեն այս բնագաւառի զարգացումը Հայաստանի մէջ:

 

LEAVE A REPLY

Please enter your comment!
Please enter your name here