«ԱՌԱՋԻՆ ԱՇԽԱՐՀԱՄԱՐՏԻ ՔՕՂԻ ՏԱԿ ԻՐԱԿԱՆԱՑՈՒԵՑ 20-ՐԴ ԴԱՐԻ ԱՌԱՋԻՆ ՑԵՂԱՍՊԱՆՈՒԹԻՒՆԸ» . ՄԻՋԱԶԳԱՅԻՆ ԳԻՏԱԺՈՂՈՎ ԵՐԵՒԱՆԻ ՄԷՋ

0
139

ԵՐԵՒԱՆ, «Արմէնփրէս».– «Առաջին Համաշխարհային պատերազմի Կովկասեան ճակատը. ցեղասպանութիւն, փախստականներ եւ մարդասիրական օգնութիւն» խորագիրը կրող գիտաժողովը 21 Ապրիլին Հայոց Ցեղասպանութեան թանգարան-հիմնարկի նորաբաց գիտաժողովներու սրահին մէջ համախմբեց առաջատար մասնագէտներ՝ Ռուսիայէն, Իտալիայէն, Քանատայէն, Ֆրանսայէն, Հունգարիայէն, Միացեալ Նահանգներէն եւ Թուրքիայէն։
Երկօրեայ գիտաժողովի ծիրին մէջ անդրադարձ պիտի կատարուի Առաջին Համաշխարհային պատերազմի տարիներուն Օսմանեան կայսրութեան մէջ կազմակերպուած հայերու զօրակոչին, անոնց զինաթափման, երիտթուրքերու կառավարութեան կողմէ հայ ժողովուրդի ցեղասպանութեան:
«Առաջին Աշխարհամարտի քօղին տակ իրականացուեց 20րդ դարի առաջին ցեղասպանութիւնը, առաջին ոճրագործութիւնը: Առաջին աշխարհամարտը ստեղծեց առիթը, ժամանակը եւ հնարաւորութիւնը կանխամտածուած յանցագործութիւնն ի կատար ածելու համար այն ակնկալիքով, որ այն անպատժելի է մնալու», իր խօսքին մէջ նշեց Հայոց Ցեղասպանութեան թանգարան-հիմնարկի տնօրէն Հայկ Դեմոյեան՝ աւելցնելով, որ պատերազմական շարք մը գործողութիւններ խորքին մէջ ցեղասպանական գործողութիւններ էին: Անոնց կարգին է շուրջ 4000 մուսալեռցիներու տարհանումը: Դեմոյեանի համաձայն՝ ուսումնասիրութեան արժանի է Առաջին Համաշխարհային պատերազմի իւրաքանչիւր դրուագ:
Ռուսիոյ Գիտութիւններու ակադեմիոյ Միջազգային տնտեսութեան եւ միջազգային յարաբերութիւններու հիմնարկի ներկայացուցիչ Վիքթոր Նատէին Ռայեւսքին՝ «Կովկասի մէջ փանթրքական գործակալական ցանցի գործունէութիւնն Առաջին Աշխարհամարտի տարիներուն» զեկոյցին մէջ շեշտեց, որ պէտք է ներկայացնել իրական ճշմարտութիւնը եւ պատմութիւնը գործիք չդարձնել: «Հայոց Ցեղասպանութիւնը 20րդ դարու առաջին ոճրագործութիւնն է, բայց ցաւօք ոչ միակը», յայտնեց ան։
Երեւանի պետական համալսարանի Միջազգային յարաբերութիւններու եւ դիւանագիտութեան ամպիոնի փրոֆեսէօր Արսէն Աւագեան «Թեշքիլատը Մահսուսայի» գործունէութիւնը Կովկասեան ճակատում» թեման ներկայացնելու ատեն յայտնեց, որ Թուրքիոյ մէջ շարք մը արժէքաւոր աշխատութիւններ լոյս տեսած են եւ «Թեշքիլատը Մահսուսայի» գործունէութիւնը հանգամանալից լուսաբանուած է, ինչ որ շարք մը առարկայական եւ ենթակայական գործօններով պայմանաւորուած է։
Մասնագիտական քննարկման ընթացքին միջազգային գիտաժողովի մասնակիցները անդրադարձ կատարեցին փանթրքական ցանցի գործունէութեան, օտար լրագրողներու գործունէութեան, հայերու ինքնապաշտպանական մարտերու, պատերազմող երկիրներու դիւանագիտութեան դերակատարութեան։
«Առաջին Համաշխարհային պատերազմի Կովկասեան ճակատը. Ցեղասպանութիւն, փախստականներ եւ մարդասիրական օգնութիւն» գիտաժողովէն անմասն չեն մնայ նաեւ վկայութիւններու, հայ կամաւորական շարժման, հայ գաղթականութեան եւ վերապրողներուն առնչուող հարցերը: Գիտաժողովը իր արդիւնքները պիտի ամփոփէ 22 Ապրիլին։

LEAVE A REPLY

Please enter your comment!
Please enter your name here