ԽՈՐՀՐԴԱՐԱՆԸ ՆԱԽԱԳԱՀԱԿԱՆ ԸՆՏՐՈՒԹԵԱՆ ՆԻՍՏԻ ՀՐԱՒԻՐՈՒԱԾ Է ՉՈՐԵՔՇԱԲԹԻ ՕՐ

0
105

  Լիբանանեան խորհրդարանը սկզբունքով ՝ Չորեքշաբթի,  կէսօրուան  ժամը  12.00-ին հրաւիրուած  է  նախագահական   ընտրութեան նիստի մը: Նիստին նախօրէին,  հանրապետութեան նախագահ Միշէլ Սըլէյման մաղթեց գոյացնել անհրաժեշտ  ներկայութիւնը,  ապահովելու՝ նիստին  օրինականութիւնը  եւ   ընտրելու արժանաւորը:  

Լրագրողներու հետ  կարճ   զրոյցի մը ընթացքին,վարչապետ   Թամամ Սալամ հաւաստեց, թէ  ընտրական գործընթացը ցարդ զերծ  կը մնայ  արտաքին  միջամտութիւններէն, սակայն ոչ ոք  կրնայ հերքել արտաքին ազդեցութիւններու առկայութիւնը: Սալամ  շեշտեց, թէ իր  գլխաւորած  կառավարութիւնը չի   վարեր  տագնապը, այլ՝ կը կառավարէ երկիրը: Սալամ  ընդգծեց, թէ Դիմադրութեան  մասին  տարակարծութիւնը անոր  զէնքին  կը  վերաբերի  եւ ոչ՝ սկզբունքին:

Վերադառնալով  նախագահական  ընտրութիւններուն, քաղաքական  դէտերու կարծիքով,  այսօրուան նիստը  շատ  հաւանաբար  ապահովէ  անհրաժեշտ   մեծամասնութիւնը:  Սալամ, վարչապետարանին մէջ  ընդունեց Աւստրալիոյ արտաքին գործոց  նախարար  Ճիւլի  Պիշոփը:

Խորհրդարանի նախագահ Նեպիհ Պըրրի   Այն Էլ Թինէի մէջ  ընդունեց   երեսփոխան Միշէլ Մըրը:  Հանդիպումէն  ետք, Մըր յայտարարեց թէ  Նէյլա Թուէյնիի հետ  ներկայ  պիտի  գտնուի այսօրուան  նիստին:  Պըրրի  նաեւ  ընդունեց  Լիբանանի Դեմոկրատական Կուսակցութեան պետ  Թալալ Արսլանը,ինչպէս նաեւ   առողջապահութեան նախարար  Ուայէլ Ապու Ֆաուրը եւ Լիբանանեան Ուժերը    ներկայացնող պատուիրակութիւն  մը, որ փոխանցեց Սամիր Ժաաժայի   ընտրական ծրագիրը:

Նախկին  նախարար  Տեմիանոս  Ղաթթար  իր  թեկնածութիւնը  յայտարարեց   նախագահութեան:  Աշխատանքի  նախարար  Սըժաան  Ղազի  յայտարարեց,թէ Ամին Ճեմայէլ  յարմարագոյն պահուն պիտի  յայտարարէ նախագահութեան իր  թեկնածութիւնը: Միւս կողմէ,   հաղորդակցութեան նախարար Պութրոս  Հարպ   հեռաձայնային զրոյց  մը ունեցաւ Լիբանանեան Ուժեր Կուսակցութեան գործադիր խորհրուրդի պետ  Սամիր Ժաաժայի հետ  եւ  զօրակցութիւնը  յայտնեց անոր  թեկնածութեան:  Վարչական  բարեկարգութիւններու  նախարար Նեպիլ Տը Ֆրէյժ  յայտարարեց, թէ Մուսթաքպալ Հոսանքը յօգուտ  Սամիր Ժաաժային պիտի  քուէարկէ այսօրուան նիստին:  Տը Ֆրէյժ   դիտել տուաւ, որ Ազգային Ազատ Հոսանքի  հետ  մերձեցումը   տեղի ունեցած էր  վերջնիս խնդրանքով:  Զբօսաշրջութեան նախարար Միշէլ Ֆարաոն հաւաստեց, թէ  Մարտ  14-ի ուժերուն հետ   համաձայնութին  գոյացած  է Սամիր Ժաաժայի  անուան շուրջ:  Երեսփոխան Զիատ  Ղատըրի  յայտնեց, թէ   Մարտ 14-ի ուժերը  միացեալ  թեկնածու մը  առաջադրեն նախագահական  ընտրութիւններուն:

Լիբանանի մօտ Ռուսիոյ դեսպան  Ալեքսանտր Զասփիքին  մաղթեց սահմանադրականօրէն    նշուած  ժամկէտին  իրագործել  նախագահական  ընտրութիւնները:

LEAVE A REPLY

Please enter your comment!
Please enter your name here