Անդրանիկ Օզանեանի Ձեռագիրները Ամփոփուեցան Հայաստանի Մէջ

0
115

ԵՐԵՒԱՆ, «Արմէնփրէս».– Հայ ազատագրական շարժման խորհրդանիշներէն մէկուն՝ Անդրանիկ Օզանեանի 65 էջնոց ձեռագիրներուն բնօրինակները ամփոփուեցան Հայաստանի պատմութեան թանգարանին մէջ: Երկար դեգերումներով տարբեր երկիրներէ անցած մասունքները 22 Ապրիլին թանգարանին յանձնեց բրիտանահայ դոկտոր Հրաչ Գույումճեանը: Զօրավար Անդրանիկի ծննդեան 150ամեակի եւ Հայոց Ցեղասպանութեան 100ամեակի նախաշեմին ասիկա Գույումճեանի փոքրիկ ներդրումն է՝ այս տարելիցներուն ընդառաջ:
Անդրանիկ Օզանեանը 1921 թուականին 65 էջերէ բաղկացած ձեռագիրները տպագրութեան համար ուղարկած է Փարիզի «Ապագայ» ամսագիրի գլխաւոր խմբագիր Յովհաննէս Պօղոսեանին: «1960ական թուականներուն Յ. Պօղոսեան ձեռագիրները յանձնած է հօրս՝ Համբարձում Գույումճեանին՝ կարելի եղած ատեն զանոնք Հայաստան փոխանցելու համար: 1988 թուականին՝ մահէն երեք տարի առաջ, հայրս ձեռագիրները յանձնեց ինծի», յայտնած է Հրաչ Գույումճեան:
Զօրավարին ձեռագիրները բաւական երկար ճամբայ կտրած են՝ Միացեալ Թագաւորութիւններէն փոխադրուած են Ֆրանսա, այնուհետեւ Լիբանան, Յունաստան եւ կրկին վերադարձուած Անգլիա:
Հայաստանի պատմութեան թանգարանի տնօրէն Անելկա Գրիգորեանի կարծիքով՝ ասիկա թանգարանին համար արժանայիշատակ օր է: «Կան ձեռքբերումներ, որոնք հայ ժողովրդի պատմութեան հետ ամենախիստ առնչութիւնն ունեն: Այսօր մենք ստանում ենք Անդրանիկ Զօրավարի յուշագրութիւնների ձեռագրերը՝ 65էջանոց բացառիկ մի երեւոյթ: Անդրանիկ Զօրավարը սրբացած, առասպելացած մարդ է, որի մասունքները մենք ունենք թանգարանում՝ սուրը, ստացած մարտական պարգեւները, բայց կայ մի բան, որ մարդու մասին խօսում է աւելին, քան իրեն պատկանող իրերը: Դա իր ձեռագիրն է: Այս էջերում կը տեսնենք հոգեկան ապրումներ, յուզմունք, մարդկային տառապանքներ, որ կրել է նա», ընդգծած է Գրիգորեան:

 

LEAVE A REPLY

Please enter your comment!
Please enter your name here