ՆԱԽԱԳԱՀԱԿԱՆ ԸՆՏՐՈՒԹԻՒՆՆԵՐՈՒ ԱՌԱՋԻՆ «ՌԱՈՒՆՏ». ՈՉ ՈՔ ԱՊԱՀՈՎԵՑ ՔՈՒԷՆԵՐՈՒ ԵՐԿՈՒ ԵՐՐՈՐԴԸ:

0
121

Լիբանանեան  խորհրդարանը  այսօր  կէսօրին  կարեւոր քայլ մը առաւ նախագահական   ընտրութիւններու  ուղղութեամբ: Արդարեւ, կէսօրուան  ժամը  12-ին,  124  երեսփոխաններու    ներկայութեան, խորհրդարանի նախագահ  Նեպիհ Պըրրի   բացուած  յայտարարեց նախագահ  ընտրելու նիստը:  Ան ըսաւ, թէ խորհրդարանը ապահոված էր  նիստին  օրինականութիւնը երաշխաւորող անհրաժեշտ   երկու  երրորդ  ներկայութիւնը (86  երեսփոխան): Սաատ  Հարիրի,   Օքապ Սաքր,  Էլի Աուն եւ   Խալէտ Տահեր կը  բացակայէին  նիստէն:  Պըրրի   հրաւիրեց    ընտրելու   նոր նախագահը:  Խորհրդարանի քուէախոյզ  յանձնախումբը եւ  դիւանը մէկ առ մէկ  ընթերցեցին քուէաթուղթերը:  Ընտրութեան արդիւնքը, յետ քուէարկութեան, պարզեց հետեւեալ  պատկերը. 52՝    քուէաթերթիկ ճերմակ, 48՝  Սամիր Ժաաժա,  16՝  Հանրի  Հելու, 1 ՝ Ամին Ճեմայէլ,  7՝  չեղեալ  նկատուած: Թեկնածուներէն  ոեւէ մէկը  ձայներու   երկու  երրորդը   չստանալու պատճառով, խորհրդարանի նախագահ Նեպիհ  Պըրրի՝  յառաջիկայ  Չորեքշաբթի օր  երկրորդ   նիստի  մը  հրաւիրեց  խորհրդարանը,  մաղթելով որ  թեկնածուներէն  ոեւէ մէկը  այս անգամ  կ’ապահովէ  անհրաժեշտ   65  քուէները:

Մարտ  14-ի ուժերու  զօրակցութիւնը  վայելող նախագահութեան  թեկնածու  Սամիր Ժաաժա ստացաւ   48  քուէ:  Ընտրութիւնը աւարտելէ անմիջապէս  ետք,անոր կողակիցը՝ Սթրիտա   Ժաաժա   կնքեց  մամլոյ ասուլիս  մը եւ  զարմանք  յայտնեց    ճերմակ   քուէներուն թիւին .«  Ին՞չ պատահեցաւ անոնց պահանջած  հզօր  թեկնածուին».հարցուց  Սթրիտա  Ժաաժա: 

  Մեկնաբանելով   ընտրութեան   ընթացքը, Լիբանանեան  Ուժեր կուսակցութեան   գործադիր խորհուրդի  պետ Սամիր Ժաաժա  յայտնեց, թէ ընտրութիւնները  կայացան  դեմոկրատական  չափանիշներու  համապատասխան  եւ  առաջին անգամ ըլլալով  կը  կրէին  զուտ լիբանանեան բնոյթ: Ան  ընդգծեց, թէ քուէարկող   խմբաւորում մը կը ներկայացնէ  պետականութիւն կառուցելու  ծրագիր,  իսկ այլ խմբաւորում մը՝ ոչ: Ժաաժա  մերժեց   փոխզիջումի  տարբերակը, աւելցնելով  թէ ընտրապայքարը   պիտի շարունակէ մինչեւ   վերջ:

Երեսփոխան   Էլի Քէյրուզ շեշտեց, թէ Ժաաժայի  թեկնածութիւնը  լուրջ է եւ  ոչ՝   ռազմավարութիւն:

Նախագահութեան թեկնածու Հանրի Հելու,  որ կը  վայելէ  Ընկերվարական Յառաջդիմական Կուսակցութեան եւ Ազգային  Պայքարի   Ճակատին  զօրակցութիւնը, յայտարարեց, թէ ինք կը  ներկայացնէ   չափաւորականութիւնը եւ պիտի շարունակէ  ընտրապայքարը:

Փոփոխութիւն եւ  Բարեկարգում խորհդարանական խմբաւորումի պետ Միշէլ Աուն յայտնեց, թէ Մարտ  8-ի ուժերը   պիտի աշխատին մեծամասնութիւն գոյացնել նախագահութեան   թեկնածուի  մը շուրջ: Աուն եւ Մարտ 8-ը ներկայացնող  մեծ թիւով  երեսփոխաններ, քուէաթերթիկները  հաշուելու պահուն  հեռացան խորհրդարանէն: Առ ի լուսաբանութիւն, Աուն   ըսաւ, թէ  խորհրդարանէն  հեռացած էր,  երբ համախոհութիւնը  անհնար դարձած էր ոեւէ   թեկնածուի անուան  շուրջ: Վարչական   բարեկարգութիւններու նախարար Նեպիլ Տը  Ֆրէյժ   դիտել տուաւ, թէ  Մարտ 8-ի ուժերը   խորհրդարանէն  հեռացած էին, որովհետեւ  կը  վախնային  իրենց    շահերուն  չհամապատասխանող  նախագահի մը  ընտրութենէն:

Վարչապետ  Թամամ Սալամ  դրուատեց  խորհրդարանէն ներս  տիրող   ընտրական առողջ  մթնոլորտը եւ  մաղթեց ընտրել  լիբանանցիներուն   մտահոգութիւններուն հետամուտ նախագահ մը:

Նշենք, թէ   նախագահ  Միշէլ Սըլէյմանի  պաշտօնավարութեան  պայմանաժամը կ’աւարտի 24  Մայիսին: Յաջորդ օրը ան հեռացած պիտի  ըլլայ Պաապտայի պալատէն:

Մուսթաքպալ  Հոսանքի աղբիւրներ յայտնեցին, թէ  ընտրական որեւէ խոստում  չէր  տրուած  Միշէլ Աունին:  Քուէյթեան «Ալ Ռայ» օրաթերթը կը գրէ,թէ Սէուտական Արաբիա  որոշած է զօրակցիլ Սամիր Ժաաժայի   թեկնածութեան:

LEAVE A REPLY

Please enter your comment!
Please enter your name here