Ցեղասպանութեան Զոհերու Յիշատակին Նուիրուած Մոմավառութիւն

0
110

Լոս Անճելըսի Պոլսահայ միութեան կազմակերպութեամբ, Ուրբաթ, Ապրիլ 25ին, երեկոյեան ժամը 8ին պիտի կատարուի մոմավառութիւն, Հայկական Ցեղասպանութեան մէկուկէս միլիոն նահատակներու հոգւոյն:

Ձեռնարկի գլխաւոր բանախօսն է Կոստանդնուպոլսոյ պատրիարքական Կրօնական ժողովի ատենապետ Թաթուլ Ծ. վրդ. Անուշեան, որ մանրամասնօրէն պիտի խօսի պոլսահայ համայնքի բարեգործական հաստատութիւններուն բռնագրաւուած կալուածներու վերադարձին մասին, ներառեալ՝ եկեղեցիները, որբանոցներն ու հիւանդանոցները, ինչպէս նաեւ Վագըֆլը գիւղ ապաստանած քեսապահայերուն ներկայ իրավիճակին մասին:
Հիւր բանախօսն է իրաւաբան Կարօ Ղազարեան, որ Հայ իրաւաբանական միութեան ատենապետն է եւ համաատենապետը՝ Հայոց Ցեղասպանութեան հարիւրամեակի յանձնախումբին: Ան պիտի խօսի վերջին իրադարձութեանց եւ յատկապէս Պէյրութ եւ Պեքաա հովիտ ապաստանած քեսապցի գաղթականներուն մասին, որոնց ինք անձամբ հանդիպած է իր վերջին ուղեւորութեան ընթացքին:

Սրտի խօսք պիտի արտասանէ Պոլսահայ միութեան երիտասարդաց յանձնախումբի նախկին անդամ Ալեք Ակինեան (անգլերէնով):
Ձեռնարկը տեղի պիտի ունենայ միութեան «Գրիգոր եւ Աւետ Քիւրքչիւօղլու» սրահը (19726 Sherman Way, Winnetka, CA, 91306): Մուտքը ազատ է ու պիտի գործադրուի գեղարուեստական յայտագիր:

 

LEAVE A REPLY

Please enter your comment!
Please enter your name here