ԼՈՒՍԱՐՁԱԿՆԵՐԸ ԿԵԴՐՈՆԱՑԱԾ ԵՆ ՆԱԽԱԳԱՀԱԿԱՆ ԸՆՏՐՈՒԹԻՒՆՆԵՐՈՒՆ ՎՐԱՅ

0
105

Լուսարձակները  ներկայիս   կեդրոնացած են   Չորեքշաբթի,  30  Ապրիլին  կայանալիք նախագահական  ընտրութեան նիստին վրայ:ՄԱԿ-ի ընդհանուր  քարտուղար Պան  Քի Մուն շեշտեց  նախագահական ընտրութիւնները   նշուած  ժամանակամիջոցին մէջ կայացնելու անհրաժեշտութիւնը: Քի Մուն   ընդգծեց, թէ  Հըզպալլայի   եւ կարգ մը  միլիսներու զէնքը կը   հակասէ ազատ եւ  թափանցիկ  ընտրութիւններ կայացնելու սկզբունքին:  Խորհրդարանի նախագահ Նեպիհ Պըրրի    դիտել տուաւ, թէ անցնող Չորեքշաբթի  օրուան  նիստէն ետք,   Լիբանան  թեւակոխած է  նախագահական  ընտրութիւններու  լուրջ   հանգրուանը: Անոր կարծիքով,  նախորդ  Չորեքշաբթի օրուան   ընտրութիւնը    բազկերակները  շօշափելու փորձ մըն էր:  Պըրրի  նաեւ ընդգծեց, թէ   համախոհական նախագահ մը  ընտրելու  Պշարա Ռայի գարտինալին  խօսքը  ուղեցոյց    պիտի  ծառայէ   քաղաքական հոսանքներուն: Մուսթաքպալ Հոսանքի պետ  Ֆուատ Սինիորա հաւաստեց,թէ    իր  պլոքը պիտի  մասնակցի   յառաջիկայ Չորեքշաբթի օրուան նիստին:  Սինիորա, խորհրդակցութիւններու  շարք մը  սկսաւ ունենալ Մարտ 14-ի ներկայացուցիչներուն հետ:  Մարտ  14-ի աղբիւրներ կը հաւաստեն, թէ Սամիր Ժաաժա կը  շարունակէ մնալ իրենց միակ   թեկնածուն:  Երեսփոխան    Անթուան  Զահրա նշեց, թէ  Ժաաժայի թեկնածութիւնը անվերանայելի է Լիբանանեան Ուժերուն  համար:

Երեսփոխան Հանրի Հելու  դարձեալ շեշտեց,թէ պիտի  շարունակէ  ընտրապայքարը:  Մուսթաքպալ Հոսանքի  անդամ, երեսփոխան Խալէտ  Զահրեման  փարատեց   յառաջիկայ  Չորեքշաբթի  օրուան  նիստին  մեծամասնութիւն  չգոյանալու մասին  տարաձայնութիւնները,  յայտարարելով  թէ Մուսթաքպալ Հոսանքը  իր բոլոր երեսփոխաններով պիտի մասնակցի նիստին:  Երեսփոխան Սամիր Ճըսր  ըսաւ, թէ  Մուսթաքպալ Հոսանքը  յանձնառու պիտի մնայ Մարտ 14-ի ուժերուն ներկայացուցած  թեկնածուին:

Հաղորդակցութեան նախարար Պութրոս Հարպ   քննադատեց  Միշէլ Աունը համախոհական  թեկնածու ներկայացնելու  ոմանց փորձերը,   ընդգծելով թէ  վերջինիս  քաղաքական  ասպարէզը  առճակատում եղած է միայն:

Ընտրական սակարանին մէջ,կ’ըսուի թէ  համախոհական  թեկնածուներուն  պարագային, բանակի  ընդհանուր հրամանատար, զօրավար Ժան Քահուաճի կը  վայելէ  յաղթելու  մեծագոյն կարելիութիւնները,  սակայն  անոր  անուան շուրջ  համաձայնութիւն  չգոյանալու պարագային,  Ժան Օպէյտը   կը նկատուի   լաւագոյն   ընտրանքը:

Մարոնիներու  Պշարա Ռայի  գարտինալը  Հռոմի մէջ  վերահաստատեց  ներկայի  պայմաններուն համապատասխանող   նախագահ մը  ընտրելու  անհրաժեշտութիւնը: Միւս  կողմէ,  Լիբանանի մօտ Սէուտական Արաբիոյ  դեսպան  Ալի Աուատ Օսէյրի  ըսաւ, թէ  իր  երկիրը  նախընտրութիւններ պիտի  չունենայ   թեկնածուներու  միջեւ, որովհետեւ  Սէուտական Արաբիա միշտ ալ  դատապարտած է  Լիբանանի  ներքին  գործերուն  միջամտութիւնները:

Կ’արժէ նշել, որ  65  երեսփոխաններու ներկայութիւնը բաւարար  պիտի  ըլլայ  ապահովելու  յառաջիկայ Չորեքշաբթի օրուան նիստին օրինականութիւնը:

LEAVE A REPLY

Please enter your comment!
Please enter your name here