ՀԱՅ ԺՈՂՈՎՈՒՐԴԸ ՎԵՐԱՆՈՐՈԳԵՑ ՊԱՀԱՆՋԱՏԻՐԱԿԱՆ ՊԱՅՔԱՐԸ ՇԱՐՈՒՆԱԿԵԼՈՒ ՈՒԽՏԸ

0
121

Աշխարհի  տարբեր ափերու  վրայ   գտնուող  հայ   ժողովուրդի  զաւակները, զանազան միջոցառումներով   ոգեկոչեցին  Հայոց Ցեղասպանութեան  99-րդ  տարելիցը :  Մայր հարենիքէն  մինչեւ  սփիւռքի  տարբեր  ոստանները, հայ  ժողովուրդը   անգամ մը եւս  դատապարտեց   քսաներորդ դարու առաջին  ցեղասպանութիւնը եւ վերահաստատեց  պահանջատիրական  պայքարը  շարունակելու  իր   վճռակամութիւնը:

Մայր  հայերնիքին մէջ, Հայաստանի նախագահ Սերժ Սարգսեան, վարչապետ  Յովիկ Աբրահամեան, Ամենայն հայոց  Ն.Ս.Օ.Տ.Տ. Գարեգին Բ.  Կաթողիկոսը,    իշխանութեն,  քաղաքական   հոսանքներ, Հայաստանի  տարբեր   շրջաններէն  ժամանող  հայորդիներ այցելեցին  Ծիծեռնակաբերդ՝  յարգանքի   տուրքը կատարելու  Հայոց  Ցեղասպանութեան   զոհերուն  յիշատակին:  Մայր Աթոռ  Սուրբ  Էջմիածնոյ մէջ, Ամենայն Հայոց  Կաթողիկոս Գարեգին  Բ. Կաթողիկոս  նախագահեց  Ցեղասպանութեան զոհերու  յիշատակին   Հոգեհանգստեան պաշտօնին:

 Եւրոպայի, Միջին Արեւելքի, Ծայրագոյն Ասիոյ,  Աւստրալիոյ, Հիւսիսային եւ Հարաւային  Ամերիկաներու մէջ,  տեղի ունեցան  նահատակներու  յիշատակին  ոգեկոչման արարողութիւններ:

Իսթանպուլի Թաքսիմ  հրապարակին  մէջ,  ապահովական  խիստ  միջոցառումներու  տակ, տեղի ունեցաւ  Հայոց Ցեղասպանութեան  99-րդ տարելիցին  նուիրուած    սգոյ   հաւաք:  Սգոյ  հաւաքին մասնակցեցան պոլսահայեր, ինչպէս  նաեւ  Եւրոպայէն ժամանած հակացեղապաշտական կազմակերպութիւններու անդամներ, Սփիւռքի տարբեր  կառոյցներէն ժամանած ներկայացուցիչներ:  Հաւաքին մասնակիցները բարձրացուցին  հայերէնով,  անգլերէնով, թրքերէնով պաստառներ: Նշենք, թէ  Թուրքիոյ  շարք մը   քաղաքներու մէջ  եւս տեղի ունեցան Ապրիլ 24-ի  յիշատակին սգահաւաքներ:

Մեծ Եղեռնի ոգեկոչման 99-ամեակին առթիւ, Հռոմի քաղաքապետը փրօֆ. Ինիացցիօ Մարինօ,  նամակ մը յղեց  Հռոմի Հայ Համայնքի Խորհուրդի նախագահ՝ Տիկին Նուարդ Գրիգորեանին որով իր մօտիկութիւնը յայտնեց հայ ժողովուրդին,  հաստատելով որ քաղաքապետարանը կը շարունակէ իր յանձնառումը՝ Յիշատակելու հայոց «Մեծ Եղեռնը»։

Իր նամակին մէջ, քաղաքապետը   իր եւ քաղաքապետարանի անձնակազմի անունով  ողջունելէ ետք՝  Հռոմի Հայ Համայնքը «Ապրիլեան նահատակաց» օրուան առիթով.  կ՝ընդգծէ  թէ՝ միայն հիմնուելով՝  «ժողովուրդներու միջեւ խաղաղ համակեցութեան» վրայ, կարելի է կառուցել  «լաւագոյն ապագայ» մը բոլորին համար։

Քաղաքապետ՝ Ինիացցիօ Մարինօ, կը քաջալերէ  ձեռնարկները, որոնք վառ կը պահեն «Եղեռնի զոհերու յիշատակը»  որպէսզի նման ողբերգութիւններ այլեւս չկրկնուին ։

Յայտնենք որ Հռոմի քաղաքապետարանը 2000-ին քուէարկած էր բանաձեւ մը որով կ’ընդունէր Մեծ Եղեռնի պատմական իրողութիւնը. իսկ 2006-ին, համագործակցութեամբ՝  Հռոմի Հայ Համայնքի Խորհուրդին, Հռոմի կեդրոնական հրապարակի վրայ զետեղած էր քաղաքապետարանի ստորագրութիւնը կրող «1915-ի  Ցեղասպանութիւնը ոգեկոչող» յուշաքար մը. մինչ  2010-ին, ընդառաջելով Հռոմի Հայ Համայնքի Խորհուրդի խնդրանքին, մայրաքաղաքի փոքր այգի մը անուանած էր «Հայոց Ցեղասպանութեան զոհերու այգի» ուր, 24 Ապրիլ 2014-ի առաւօտեան տեղի ունեցաւ  ոգեկոչումի արարողութիւն։

Միացեալ Նահանգներու Հրէական  Խորհուրդը ( Էյ. Ճէյ. Սի)  յարգանքի տուրք    մատուցեց   Հայոց Ցեղասպանութեան զոհերուն  յիշատակին: Միացեալ Նահանգներու պետական  քարտուղար Ճոն Քերրի  յայտարարեց .« Այսօր իմ միտքերը եւ աղօթքները հայերուն  հետ են»:

Թեհրանի, Լոս Անճելոսի, Մոսկուայի  մէջ  բողոքի   ցոյցեր տեղի ունեցան  Թուրքիոյ  դեսպանատուներուն,  հիւպատոսարաններուն առջեւ:

Հայաստանի մէջ դիւանագիտական ծառայութիւններու ներկայացուցիչներ այցելեցին  Ծիծեռնակաբերդ եւ  ծաղկեպսակ  զետեղեցին  նահատկներու  յուշարձանին առջեւ:

 

LEAVE A REPLY

Please enter your comment!
Please enter your name here