ՍԱԼԱՄ ԿԸ ՄԱՂԹԷ ՈՐ ՆՈՐԸՆՏԻՐ ՆԱԽԱԳԱՀԸ ԿՐԷ ԱԶԳԱՅԻՆ ՏԱՐԱԶ

0
128

Չորեքշաբթի  օրուան խորհրդարանի նիստին  ճակատագիրը կը մնայ անորոշ:    Նախագահական  ընտրութեան  վերաբերեալ  քաղաքական   հոսանքներուն կեցուածքները անփոփոխ   մնալու պատճառով, վաղուան նիստը կրնայ   չապահովել իր օրինականութիւնը  երաշխաւորող  անհրաժեշտ մեծամասնութիւնը:  Ուաշինկթըն եւ Վատիկան նախանձախնդիր կը մնան  սահմանադրականօրէն   ճշդուած  ժամանակամիջոցին  ընտրելու  Լիբանանի  նոր նախագահը: Այդ ուղղութեամբ, Ուաշինկթըն  քուլիսային   խորհրդակցութիւններ կ’ունենայ  Սէուտական Արաբիոյ   եւ լիբանանեան  տարբեր խմբաւորումներու հետ: Քաղաքական  մեկնաբաններ  անտրամաբանական կը  նկատեն   նախագահական գործընթացը Սուրիոյ  եւ  Իրաքի նախագահական  ընտրութիւններուն հետ պայմանաւորելու ոմանց   միտումը, դիտել  տալով որ  խնդրոյ առարկայ երկիրներուն   տագնապը երկարատեւ  ըլլալով,  Լիբանան որեւէ  շահ պիտի  չապահովէ  սոյն ռազմավարութենէն: 

Մարտ  14-ի աղբիւրներ հաւաստեցին, թէ  ընտրական գործընթացէն ներս  յատկանշական որեւէ  յառաջընթաց  տեղի  չէր   ունեցած շաբաթավերջին: Մուսթաքպալ Հոսանքը եւ Մարտ  14-ը ներկայացնող  երեսփոխանները   յայտնեցին, թէ պիտի մասնակցին Չորեքշաբթի օրուան խորհրդարանի նիստին: Երեսփոխան Ժան Օղասապեան զգուշացուց նախագահական  դիրքին վրայ   պարապութեան  հետեւանքներէն:  Ան   հաստատեց,  թէ Սամիր  Ժաաժա կը մնայ  Մարտ  14-ի ուժերուն  թեկնածուն:  Օղասապեան  հերքեց  Սաատ Հարիրիի եւ Միշէլ Աունի միջեւ  համաձայնութեան մասին    շրջող տեղեկութիւնները: Փաղանգաւոր  Կուսակցութեան  քաղաքական  դիւանի անդամ, նախկին նախարար Սելիմ Սայէղ նոյնպէս  նշեց, թէ կուսակցութիւնը պիտի  շարունակէ  զօրավիգ մնալ  Ժաաժայի  թեկնածութեան:

Մուսթաքպալ Հոսանքի տարբեր աղբիւրներ    կտրականապէս  հերքեցին  Միշէլ Աունին զօրակցելու  մասին  տեղեկութիւնները: Մուսթաքպալ  Հոսանքի անունով   խօսնակներ  յայտնեցին, թէ սոյն կեցուածքը պաշտօնապէս քանիցս փոխանցուած է   արտաքին գործոց նախարար Ժըպրան Պասիլին:

Խորհրդարանի նախագահ Նեպիհ Պըրրի  իր այցելուներուն  յայտնեց, թէ  ցարդ  դասական  եղանակով  կը վերաբերի  նախագահական  գործընթացին, սակայն  կացութիւնը անփոփոխ  մնալու պարագային, ստիպուած պիտի  ըլլայ   փոխել   իր կեցուածքը:  Պըրրի, Այն էլ Թինէի մէջ  ընդունեց նախկին նախարար Իլիաս Մըրը  եւ  քննարկեց  լիբանանեան  բեմի վերջին զարգացումները: Ան նաեւ ընդունեց նախկին նախարար Նազէմ Խուրին:  

Քուէյթեան «Ալ  Քապաս» օրաթերթին այսօրուան  համարով  լոյս ընծայուող   հարցազրոյցի մը մէջ,  վարչապետ Թամամ Սալամ  կը մաղթէ,որ   Լիբանանի  նորընտիր  նախագահը կրէ  ազգային տարազ:

LEAVE A REPLY

Please enter your comment!
Please enter your name here