ԲԱԶՄԱԿՈՂՄԱՆԻ ԲԱՆԱԿՑՈՒԹԻՒՆՆԵՐ ԱՅՍՕՐՈՒԱՆ ՆԻՍՏԻ ՆԱԽՕՐԷԻՆ

0
124

 Լիբանանեան խորհրդարանը այսօր հրաւիրուած է նախագահի  ընտրութեան երկրորդ  նիստին:  Քաղաքական բեմի վրայ  շրջող  հակասական   տեղեկութիւնները  աւելի  կը  դժուարացնեն ընտրական  հանգրուանին ծանօթ մթնոլորտը: Նիստը կրնայ  նաեւ վերջին  վայրկեանին  ձախողիլ՝  մեծամասնութիւն  չգոյանալու պատճառով:

 Քաղաքական  մեկնաբաններու կարծիքով, այսօրուան նիստը պիտի ունենայ  նախորդին  ճակատագիրը: Խորհրդարանի նախագահ Նեպիհ Պըրրի   յայտարարեց, թէ  իր գլխաւորած Բարգաւաճում եւ Ազատագրութիւն խմբաւորումը  ներկայ  պիտի  գտնուի այսօրուան նիստին:  Փոփոխութիւն եւ Բարեկարգում խմբաւորումը եւ  Հըզպալլան  ներկայացնող  երեսփոխանները կրնան  բացակայիլ: 

Լոնտոնի մէջ լոյս  տեսնող  «Ալ Շարք Ալ Աուսաթ» օրաթերթը կը գրէ, թէ   Մուսթաքպալ Հոսանքի եւ Հըզպալլայի միջեւ լուրջ  քննարկումներ  տեղի կ’ունենան  ընտրական  գործընթացին  շուրջ: Այս ծիրին  մէջ,  Ահմէտ  Հարիրի հանդիպում մը ունեցած է   նախարար Ալի  Հասան Խալիլի հետ: Միւս կողմէ, այլ   օրաթերթեր կը նշեն, թէ  յարաբերութիւնները  տակաւին  «չեն հասունցած» Աունի եւ Հարիրիի միջեւ: Երեսփոխան   Ժամալ Ժարահ  յայտնեց, թէ տակաւին կանուխ է խօսիլ Աունը  թեկնածու  որդեգրելու մասին, որովհետեւ  Աուն-Մուսթաքպալ  հանդիպումները կը գտնուին սկզբնական կէտին վրայ: Մուսթաքպալ Հոսանքի  քաղաքական  դիւանի անդամ  Մուսթաֆա Ալլուշ    դիտել տուաւ, թէ     սկզբունքային լուրջ   տարակարծութիւններ  գոյութին ունին  Հըզպալլայի հետ:    Խորհրդարանի փոխնախագահ Ֆարիտ Մաքարի բացառեց Միշէլ Աունի անուան շուրջ  համաձայնութիւն մը՝   Մուսթաքպալ Հոսանքի եւ   Ազգային Ազատ Հոսանքին միջեւ:  Քաղաքական  մեկնաբաններու  կարծիքով,  Միշէլ Աուն՝  Հարիրիի  օրհնութիւնը չստանալու պարագային շատ հաւանաբար  պոյքոթի  ենթարկէ այսօրուան նիստը: Մարտ  8-ի շրջանակներ կը հաւաստեն, թէ Սաատ Հարիրի  կառչած պիտի մնայ  Մարտ  14-ի ուժերուն առաջադրած  թեկնածուին եւ  Աունի հետ քննարկումները պիտի  ըլլան ապարդիւն: Աուն- Մուսթաքպալ Հոսանք  յարաբերութիւններու    սերտացումը   Թեհրան- Ռիատ  փոխհասկացութեան մը   արդիւնք կրնայ  ըլլալ, այն ինչ  գոյութիւն  չունի ներկայիս: Սէուտական Արաբիոյ մէջ լոյս    տեսնող  «Ալ Ուաթան» օրաթերթը կը գրէ, թէ  Հըզպալլա կը  փնտռէ   իրեն  ենթարկուող   թոյլ  նախագահ մը:

 

Մարտ 14-ի ուժերը  կառչած կը մնան Լիբանանեան Ուժեր Կուսակցութեան  գործադիր խորհուրդի  պետ Սամիր Ժաաժայի  թեկնածութեան: Այլ գետնի վրայ, Մարտ  14-ի աղբիւրներ,  «Ալ Տիար»  օրաթերթին   փոխանցած են, թէ պիտի  մերժեն Ամին Ճեմայէլի թեկնածութիւնը, որովհետեւ վերջինս  աղէտալի  վիճակի մատնած է Լիբանանը  1988-ին: Սակայն  երեսփոխան Էլի Մարոնի նշեց, թէ Ամին Ճեմայէլ  ինքնաբերաբերար   թեկնածու է նախագահութեան  եւ  հաւանական է, որ   մասնակցի   ընտրապյքարին:

Վարչական  բարեկարգութիւններու նախարար Նեպիլ Տը Ֆրէյժ   դիտել տուաւ, թէ  Միշէլ Աունի  քաղաքական   ճանապարհը  չի ներշնչեր համախոհութիւն:

Ուալիտ Ճոմպլաթի   մօտիկ  շրջանականեր քուէյթեան «Ալ Քապաս» օրաթերթին յայտնած են, թէ  Սամիր Ժաժաայի եւ  Միշէլ Աունի    հեռացումը   նախագահութեան  ընտրապայքարէն,  մեծապէս պիտի դիւրացնէ  ընտրական  գործընթացէն ներս  ծագած  տագնապը: Ուալիտ Ճոմպլաթի  կարծիքով, Միշէլ Աուն  չի կրնար   ներկայանալ իբրեւ համախոհական  թեկնածու:

 

Միւս կողմէ, արտաքին գործոց նախարար Ժըպրան Պասիլ աւարտելէ ետք Հռոմ կատարած  այցելութիւնը  մեկնեցաւ  Փարիզ, այն ակնկալութեամբ որ հանդիպում մը կրնայ ունենալ  նախկին  վարչապետ  Սաատ Հարիրիի հետ: Նախագահական  ընտրութիւններու  ծիրին մէջ, մարոնիներու Պշարա  Ռայի  գարտինալը Փարիզի մէջ   հանդիպում մը նախատեսուած է որ ունենայ Սաատ Հաիրիի  հետ:

Առողջապահութեան նախարար Ուայէլ Ապու Ֆաուր երկու  յաջորդական այցելութիւններ կատարեց  Սէուտական Արաբիա՝ Սաատ Հարիրիի եւ  իշխան Սէուտ Ֆայսալի հետ   խորհրդակցելու նախագահական  թղթածրարին շուրջ: 

 

Լիբանանի մօտ Միացեալ Նահանգներու դեսպան  Տէյվիտ Հէյլ  յայտարարեց, թէ  Ուաշինկթըն   նախընտրութիւն  չունի առաջարկուած   անուններուն   միջեւ,այլ  շահագրգռուած է    ընտրութիւնները   սահմանադրականօրէն   ճշդուած  ժամանակամիջոցին  կայացնելու մտահոգութեամբ:  Հէյլ,  շաբաթավերջին  լուսարձակներէ հեռու այցելութիւն մը  տուաւ  Փարիզ եւ  ֆրանսացի պաշտօնակատարներու հետ քննարկեց  նախագահական   գործընթացը:

LEAVE A REPLY

Please enter your comment!
Please enter your name here