ԷՐՏՈՂԱՆ՝ ՄՕՏ ՕՐԷՆ ԴԻՒԱՆԱԳԻՏԱԿԱՆ ՅԱՐԱԲԵՐՈՒԹԻՒՆՆԵՐԸ ՊԻՏԻ ՎԵՐԱԿԱՆԳՆԵՆՔ ԻՍՐԱՅԷԼԻ ՀԵՏ

0
105

Վարչապետ Ռեճէպ Թայիփ Էրտողան  յայտարարեց, թէ  չորս  տարուան խզումէն ետք,  յառաջիկայ  շաբաթներուն  ընթացքին դիւանագիտական  յարաբերութիւնները  պիտի  վերականգնին Իսրայէլի հետ:  Ան հաւաստեց, թէ  իսրայէլեան կառավարութիւնը  նիւթական  հատուցում խոստացած է     «Մավի Մարմարա» նաւուն զոհերուն: Ըստ Էրտողանի,  Իսրայէլ  պիտի արտօնէ, որ   Թուրքիա մարդասիրական   օժանդակութիւն  հայթայթէ  պաղեստինցիներուն:  Էրտողան  շնորհակալութիւն յայտնեց  նախագահ  Պարաք Օպամային՝   թուրք-իսրայէլեան  հաշտութեան մէջ ստանձնած  դերակատարութեան համար:

Միւս կողմէ,  Միացեալ Նահանգներու պետական  քարտուղարութիւնը  յայտարարեց, թէ  դադրեցուցած է  Պաղեստինեան Իշխանութիւններուն տրամադրուող   տնտեսական  օժանդակութիւնները:  Քարտուղարութեան խօսնակ Ճէն Փսաքի   ըսաւ, թէ  Ուաշինթըն պիտի մերժէ  Համասի մասնակցութեամբ պաղեստինեան  որեւէ կառավարութիւն: ՄԱԿ-ի մօտ Իսրայէլի  դեսպան Ռոն  Փրոսոր  յայտարարեց, թէ  բանակցութիւնները  խզուած  են  Պաղեստինեան  Իշխանութեան հետ:   

Իսրայէլեան  կառավարութիւնը  երէկ  ձեռնարկեց  արեւելեան Երուսաղէմի եւ Արեւմտեան Ափին մէջ  բնակութեան նոր  ծրագիրներու  գործադրութեան:

LEAVE A REPLY

Please enter your comment!
Please enter your name here