ՄԵԾԱՄԱՍՆՈՒԹԻՒՆ ՉԳՈՅԱՆԱԼՈՒ ՊԱՏՃԱՌՈՎ, ՊԸՐՐԻ 7 ՄԱՅԻՍԻՆ ՅԵՏԱՅԳԵՑ ՆԱԽԱԳԱՀԻ ԸՆՏՐՈՒԹԵԱՆ ՆԻՍՏԸ

0
109

  Նախագահի ընտրութեան երկրորդ  նիստը  ընթացաւ նախատեսուած  սենարիոյով: Արդարեւ, Մարտ  8-ի ուժերը ներկայացնող երեսփոխանները  ժամանեցին  խորհրդարան, սակայն   մուտք չգործեցին  ժողովասրահ:  Նիստը նախատեսուած էր  կէսօրուան ժամը 12.00-ին:  Խորհրդարանի նախագահ Նեպիհ Պըրրի կէս  ժամով  առկախեց նիստը, առաւելագոյն  չափով  ներկայութիւն ապահովելու ակնկալութեամբ: Սակայն  խորհրդարան ժամանած  76  երեսփոխաններէն շատեր( 13)   մնացին սրահէն դուրս, որուն  հետեւանքով  Պըրրի   7  Մայիսին   յետաձգեց   նախագահ  ընտրելու  յաջորդ նիստը :

 Նիստը  փակուած   յայտարարելէ ետք,  Նեպիհ Պըրրի  իր  գրասենեակին մէջ ընդունեց Մուսթաքպալ Հոսանքի պետ Ֆուատ Սինիորան,  վարչապետ  Թամամ Սալամը,  Լիբանանեան Ուժերու երեսփոխան  Ժորժ Ատուանը,  երեսփոխան Ուալիտ Ճոմպլաթը,որուն կ’ընկերակցէր առողջապահութեան նախարար Ուայէլ Ապու Ֆաուրը: Մուսթաքպալ Հոսանքը եւ Մարտ  14-ը ներկայացնող  երեսփոխաններ յայտարարեցին, թէ պիտի շարունակեն զօրակցիլ Սամիր  Ժաաժայի թեկնածութեան: Երեսփոխան Ժան Օղասապեան  ըսաւ, թէ Սամիր Ժաաժայէն  բացի այլ տարբերակ գոյութիւն  չունի , առ այսօր:  Երեսփոխան Մարուան Համատէ  յայտարարեց, թէ թեկնածուներու  վերաբերեալ վերջնական  ընտրանքներ  գոյութիւն չունին առ այժմ:

Լիբանանեան Ուժեր Կուսակցութեան գործադիր խորհուրդի  պետ Սամիր Ժաժաա կնքեց մամլոյ ասուլիս մը  եւ  դիտել տուաւ, թէ  միտումնաւոր կերպով  խորհրդարանի նիստերը  յետաձգելու  նկրտումները կը ձգտին նոր 7  Մայիսով մը հարուածել երկիրը: Ժաաժա  զարմանք   յայտնեց, որ   մեծամասնութիւն չվայելող  խմբաւորում մը  խորհրդարանը անելի կը մատնէ, որպէսզի երեսփոխանները  ընտրեն  անոր  առաջադրած  թեկնածուն,այլապէս՝  պիտի խանգարէ   ընտրական գործընթացը:  Ժաաժա  յայտնեց, թէ    տեղի ունեցածը ժողովրդավարութեան իրաւունքներուն հակասող  հակասահմանադրական  քայլ մըն է:  Ան  նշեց, թէ   կարգ մը խմբաւորումներ կ’ոտնահարեն՝  ընտրութիւնները   սահմանադրականօրէն  նշուած ժամանակամիջոցին  կայացնելու Պքերքէի  Յայտարարութիւնը:

 

Լրատուական աղբիւրներ  կը գրեն, թէ  Ուալիտ Ճոմպլաթ եւ Նեպիհ Պըրրի   լրջօրէն մտահոգուած  են Աուն – Հարիրի    փոխհասկացողութեան մը հետեւանքներէն: Մուսթաքպալ  օրաթերթը  կը գրէ, թէ  Սաատ Հարիրի  եւ  արտաքին գործոց նախարար Ժըպրան Պասիլ համաձայնած են  խուսափիլ նախագահական  դիրքին վրայ  պարապութեան  վտանգէն եւ որոշած են շարունակել  խորհրդակցութիւնները: Պասիլ,  յայտարարեց, թէ  Միշէլ Աունի  թեկնածութիւնը պայմանաւորուած է  Սաատ Հարիրիի հետ բանակցութիւններու արդիւնքէն: Սակայն, քուէյթեան « Ալ Ռայ» օրաթերթին կարծիքով,   Միշէլ Աուն եւ Մարտ  8-ի ուժերը ներքին տագնապ կը  դիմագրաւեն՝ Աունի թեկնածութեան  պատճառով: Վերջինս   չի  հրաժարիր իր  թեկնածութենէն եւ կը խանգարէ  համախոհական թեկնածու  մը   որդեգրելու    կարելիութիւնները: Սաատ Հարիրիի  աղբիւրներ   իր  դաշնակիցներուն   փոխանցած են,  ան   տեղի պիտի չտայ  նախագահութեան հասնելու Աունի ցանկութիւններուն: Ըստ Մարտ  14-ի  աղբիւրներուն, Միշէլ  Աուն  կը  փորձէ  բախել Սէուտական Արաբիոյ   դուռերը:

Երեսփոխան Շանթ Չինչենան յայտարարեց,թէ  Մարտ  14-ի ուժերը  ծունկի պիտի  չգան  Մարտ  8-ի ուժերուն  ճնշումներուն առջեւ  եւ պիտի շարունակեն  զօրակցիլ Սամիր Ժաաժայի թեկնածութեան:

Հանրապետութեան նախագահ Միշէլ Սըլէյման Պաապտայի պալատին մէջ  ընդունեց վարչապետ Թամամ Սալամը եւ  քննարկեց   ներլիբանանեան բեմի  վերջին զարգացումները: Վարչապետ Թամամ Սալամ աշխատաւորները  շնորհաւորեց  իրենց   տօնին առիթով, արմատական  բարենորոգութիւններ մաղթելով, տնտեսական,  ընկերային  մարզերուն մէջ:

Նախկին վարչապետ Սաատ Հարիրի Փարիզի մէջ  հանդիպում մը ունեցաւ մարոնիներու Պշարա Ռայի   գարտինալին  հետ եւ քննարկեց ընտրական գործընթացը:

LEAVE A REPLY

Please enter your comment!
Please enter your name here