ՌԷԱԼ ՄԱՏՐԻՏ ՀԱՍԱՒ «ՉԵՄՓԻԸՆԶ ԼԻԿ»Ի ԱՒԱՐՏԱԿԱՆԻՆ

0
193

Եւրոպայի Ախոյեան Ակումբներու Ախոյեանութեան «Չեմփիընզ Լիկ» մրցաշարքի  կիսաւարտական հանգրուանի դարձի մրցումին,Ռէալ Մատրիտ յարձակողական ֆութպոլի գեղեցիկ դաս մը տուաւ Պայերն Միւնիխին, երբ  Ալիանս Արենա մարզադաշտին մէջ,   68  հազար  մարզասէրներու ներկայութեան  4-0 արդիւնքով  ծանր պարտութեան մատնեց պաւարիական խումբին, (կիսախաղ՝  3-0): :  Պայերնի  ֆութպոլիստները   միջոց  չունէին   հակադարձելու Ռէալի խաղաոճին: Սերժիօ Ռամոս (2)  եւ   Քրիսթիանօ Ռոնալտօ (2) նշանակեցին  Ռէալի   կոլերը:  Երթի  հանդիպումը Մատրիտի մէջ  վերջ գտած էր  սպանական խումբին  յաղթանակով՝  1-0: Այսպիսով,  Ռէալ  Մատրիտ   քայլ մը եւս առաւ  իր  պատմութեան մէջ  10-րդ անգամ շահելու եւրոպական ակումբներու մեծագոյն  մրցաշարքը:

Արքայական  ակումբը՝ մրցանիշային 17-րդ անգամ  ըլլալով հասաւ  համանուն բաժակի աւարտականին, հաւասարելով  Պարչելոնայի մրցանիշին: Մրցումի   ընթացքին Ռէալի  յարձակող  Քրիսթիանօ  Ռոնալտօ  հաստատեց անձնական  երկու մրցանիշ:  Արդարեւ,  Քրիսթիանօ   Ռոնալտօ   ընթացիկ   տարեշրջանին, «Չեմփիընզ Լիկ»  մրցաշարքին գծով  նշանակեց  իր 15-րդ  կոլը, կրկնելով՝ 1962-63  մարզաշրջանին, Ա.Սէ.  Միլանի  յարձակող  Ժոզէ  Ալթաֆինիի մրցանիշը, միաժամանակ գերազանցելով  2011-12  մրցաշրջանին,  Լիոնէլ  Մեսիի  նշանակած  14  կոլերուն:  Կ’արժէ   նշել, որ  28-ամեայ  փորթուգալացին, «Չեմփիընզ Լիկ»  մրցաշարքին  գծով  կատարած  50  մրցումներուն ընթացքին նշանակած է  50  կոլ:

Մրցումէն ետք, Ռէալի մարզիչ Գառլօ  Անճելոթի  շնորհաւորեց իր  ֆութպոլիստները՝ ցուցադրած  հիանալի խաղին  առիթով, աւելցնելով թէ  12  տարուան սպասումէն  ետք Ռէալ Մատրիտ պիտի  խաղայ «Չեմփիընզ Լիկ»  աւարտական մրցումին: Պայերնի մարզիչ  Խօսեփ  Կուարտիոլա  խոստովանեցաւ, թէ իր խումբը  ծանր պարտութիւն մը կրեց:  Ան նաեւ  նշեց, թէ  իր  խումբը թոյլ խաղ  ցուցադրեց:

«Չեմփիընզ Լիկ» մրցաշարքի  եզրափակիչ  հանդիպումը պիտի կայանայ   24  Մայիսին, Լիզպոնի  մէջ:  Սոյն  մրցումին, Ռէալի կազմէն պիտի  բացակայի  միջնապահ  Զապի Ալոնզօն՝   մրցաշարքի  ընթացքին  երրորդ դեղին տոմսը ստանալու պատճառով:

LEAVE A REPLY

Please enter your comment!
Please enter your name here