ՅԱՒԵՐԺ ՓԱՌՔ ՄԱՅԻՍ 9-Ը ԿԵՐՏՈՂ ՀԱՅ ԺՈՂՈՎՈՒՐԴԻ ԶԱՒԱԿՆԵՐՈՒՆ

0
143

Մայիս ամիսը մեր ժողովուրդի հաւաքական յիշողութեան մէջ  դարձած է յաղթանակներու, հայրենասիրութեան եւ հաւատարմութեան   խորհրդանիշը՝ Աւարայրէն փոխանցելով   մինչեւ Պերլին եւ Շուշի: Հայ ժողովուրդը Մայիս 9-ին կը տօնէ Երկրորդ Համաշխարհային ֆաշիզմի դէմ յաղթանակը եւ Շուշիի ազատագրութիւնը:

Հայ ժողովուրդը այսօր, երախտագիտութեան զգացումով կը խոնարհի այն քաջորդիներուն յիշատակին առջեւ, որոնք Հայրենական Մեծ պատերազմի եւ Արցախեան   հերոսամարտի տարիներուն զոհաբերեցին իրենց կեանքը՝ յանուն, ազատ անկախ եւ արժանապատիւ կեանքով ապրելու իրաւունքին: Տօնական այս օրուան խորհուրդը միայն յաղթանակներու եւ   հայ ժողովուրդի   ռազմական տաղանդի դրսեւորման, հայրենիքի սիրոյ ու սխրագործութիւններու հաստատումը չէ միայն: Մայիս 9-ը միաժամանակ հայ ժողովուրդին ազատութեան, անկախութեան եւ խաղաղ կեանքի իրաւունքի հաստատումն է: Ճիշդ այս իմաստով,անհրաժեշտ է հաւաքական ճիգերով, միասնութեամբ եւ համախմբուածութեամբ պահպանել այնքան սուղ գինով ձեռք բերուած խաղաղութիւնը:

Պատերազմը երկու պարագաներուն ալ պարտադրուեցաւ մեր ժողովուրդին: Խորհրդային բանակին հետ Պերլին մտած հայկական զօրամասերը կերտեցին մեր ժողովուրդին ապագայ յաղթանակները: Ազատութեան պայքարը եւ խաղաղութեան երազը իրենց նախնիներէն   ժառանգած մեր ժողովուրդի զաւակները համոզուած էին, թէ այլ ելք չկար: Պարտաւոր էին յաղթելու   ֆաշիզմին, ինչպէս՝ ազերիական բանակին:

Ազատատենչ հայ ժողովուրդը թոյլ   չտուաւ, որ ֆաշիզմի սեւ ամպը մթագնէ մեր հայրենիքը: Հիթլերեան բանակին պարտութիւնը միաժամանակ թրքական բանակին պարտութիւնն էր, որովհետեւ թրքական բանակը   յարմար առիթը կը սպասէր ներխուժելու Արաքսի արեւելեան շրջանները…: Անհրաժեշտ է նոր սերունդին բացատրել   ներխուժման ունենալիք հետեւանքները հայ ժողովուրդին վրայ:

Մենք՝ այն ժողովուրդի զաւակներն ենք, որ իր յաղթարշաւը Խրիմի, Ստալինկրատի մէջ սկսելով, պատերազմի աւարտին մտաւ ֆաշիզմի որջը՝ Պերլին: Այսօր, նաեւ օրն է յիշելու այն հայորդիները, որոնք Երկրորդ համաշխարհային պատերազմի ընթացքին տարբեր ճակատներու վրայ միացան Իտալիոյ, Ֆրանսայի, Պուլկարիոյ, Յունաստանի եւ այլուր Դիմադրութեան շարժումներուն: Խիզախութեան հրաշալի օրինակներ տուին Միսաք Մանուշեանը՝ Ֆրանսայի մէջ, Մկրտիչ Դաշտոյեանը, Գէորգ   Քոլոզեանը՝ Իտալիոյ մէջ, Արտեմ Պետրոսեանը՝ Չեխոսլովաքիոյ մէջ: Սփիւոքահայութեան մասնակցութիւնը դրսեւորուեցաւ գաղափարական եւ զինեալ պայքարի եւ այլ եղանակներով:

Երկրորդ Համաշխարհային պատերազմը ոտքի   հանեց Սփիւռքը: Սփիւռքի   հանգանակութեամբ ստեղծուեցան «Սասունցի Դաւիթ» եւ «Զօրավար Բաղրամեան» հրետանային   շարասիւնները:

Մեծ Հայրենականը կրկնակի յաղթանակ էր հայ ժողովուրդին համար. Առաջինը՝ ահեղ թշնամիին դէմ, երկրորդը ներքին, հոգեբանական՝ մեր վրայէն   ջնջելով   կոտորուող ժողովուրդի խարանը: Մեր ժողովուրդը   ապացուցեց, թէ ոչ միայն կրնար կռուիլ, այլեւ՝   յաղթել: Հայ ազատամարտիկները Հայրենական պատերազմի յաղթանակները իրենց   ուսերուն վրայ կրելով մասնակցեցան Շուշիի ազատագրութեան եւ Արցախեան հերոսամարտին:

Մեծ   Հայրենականէն   քառասուն եւ եօթ տարիներ   ետք,   հայ ժողովուրդը կրկնակի տօնի վերածեց Մայիս 9-ը, ազատագրելով 1920-ին սուրի եւ հուրի միջոցով բռնախլուած, հայաթափուած Շուշին: Շուշիի ազատագրութիւնը ոչ միայն չէզոքացուց թշնամիին մահաբեր կրակները այլեւ` խաղաղութեան ազդանշան դարձաւ տարածաշրջանին մէջ: Շուշիի ազատագրութեամբ վճռուեցաւ   պատերազմին ելքը եւ   դադրեցաւ թշնամիին կրակը: Շուշիի ազատագրութիւնը անձնազոհութեան, սխրանքի, ազգային միասնութեան վառ արգասիք էր:

Զինուորական յաղթանակը դարձաւ  հոգեւոր եւ մշակութային զարթօնքի մեկնակէտ: Մայրենի լեզուի եւ   հայ եկեղեցւոյ հոգեւոր գործունէութեան մասին խօսիլ անհնար էր ազերիական ժամանակաշրջանին: Այսօր, Արցախը դարձած է հայախօս՝ իր կրթական օճախներով, մշակոյթով, եկեղեցիներով: Յաղթանակի այս բաժինը նոյնքան կարեւոր է, որքան՝ ռազմականը: Յիշողութեան, յաղթանակի եւ յարգանքի այս խորհուրդները անհրաժեշտ է գաղափարախօսութեան վերածել   եւ իբրեւ սրբութիւն փոխանցել գալիք սերունդներուն:

Մեր հայրենիքին հզօրացումը մեծապէս կախեալ է Արցախեան   հերոսամարտը արժեւորելու   կարողութենէն: Այս իրողութեան տակ, ոգեւորութիւն եւ հրամայական կը դառնայ Արցախի մէջ տնտեսական եւ ժողովրդագրական աճ արձանագրելու անհրաժեշտութիւնը:

Մայիս 9-ը մեր   ժողովուրդի պատմութեան մէջ խաղաղութեան, ազատ ապրելու խորհուրդի օրն է: Արտագաղթի դէմ պայքարելու, հայրենի հողը կառուցելու ուխտի օրը:

Յաւերժ փառք եւ պատիւ Մեծ Հայրենականին եւ Արցախեան ազատամարտին նահատակ   հայորդիներուն: Խոնարհինք Հայրենական Մեծ պատերազմին եւ Շուշիի ազատագրութեան զոհուած մարտիկներու   շիրիմներուն:

Պատիւ՝ Մայիս 9-ը կերտող   պատերազմի վեթերաններուն, հերոս ազատամարտիկներուն, մեր հայրենիքի սահմանները թուրք-ազերիական   հորդաներուն դէմ պահպանող քաջարի   հայ սահմանապահներուն, Հայոց Բանակին:

Փառք յաղթանակներու կերտիչ ազատատենչ հայ ժողովուրդի զաւակներուն:

ԱՀԱՐՈՆ ՇԽՐՏԸՄԵԱՆ

 

LEAVE A REPLY

Please enter your comment!
Please enter your name here