ԸՆՏՐԱԿԱՆ ԽԱՌՆԻՃԱՂԱՆՃԸ ԿԸ ՍՊԱՍԷ ԻՐ ԼՈՒԾՈՒՄԻՆ

0
138

Նոր նախագահի ընտրութեան սահմանադրականօրէն   ճշդուած ժամանակամիջոցը   սկսած է սեղմուիլ: Ընտրական գործընթացը կը գտնուի փակուղիի առջեւ: Նախագահի ընտրութեան երրրորդ նիստին յաջողութիւնը կը մնայ լուրջ հարցականի տակ: Այս մտահոգութեամբ, յառաջիկայ   օրերուն Լիբանանի մօտ Միացեալ Նահանգներու դեսպան Տէյվիտ Հէյլ   եւ Լիբանանի մօտ ՄԱԿ-ի ընդհանուր քարտուղարի անձնական ներկայացուցիչ Տերէք Փլամլի պիտի քննարկեն նախագահական գործընթացը: Արեւմտեան դէտերու կարծիքով, նախագահական դիրքին վրայ պարապութիւնը ծանր հարուած մը պիտի ըլլայ Լիբանանի քրիստոնէութեան: Այսուհանդերձ, քաղաքական   կողմերը վճռական կը մնան իրենց դիրքերու վրայ, իսկ համախոհական   թեկնածուի տարբերակը անհրաժեշտ գետին չի գտներ այսօրուան դրութեամբ: Խորհրդարանի նախագահ Նեպիհ Պըրրի իր այցելուներուն յայտնեց, թէ   տակաւին կը մնայ լաւատես, այն ակնկալութեամբ որ   երկիրը նոր նախագահ մը ընտրած պիտի ըլլայ մինչեւ 25 Մայիս: Մուսթաքպալ Հոսանքի պետ Ֆուատ Սինիորա հաւաստեց, թէ իր գլխաւորած պլոքը պիտի մասնակցի Հինգշաբթի օրուան   նիստին:

Մարտ 14-ի ուժերուն մօտ այն համոզումը կը տիրէ, թէ Հըզպալլա իր թեկնածուն կը փորձէ պարտադրել,այլապէս պիտի   չարտօնէ ընտրել նախագահ եւ պարապութիւն պիտի ստեղծէ նախագահութեան դիրքին վրայ: Լիբանանեան Ուժեր Կուսակցութեան թեկնածու Սամիր Ժաաժա աստիճանաբար կը համոզուի, թէ Պաապտայի պալատ հասնելու յոյսերը հետզհետէ սկսած են նուազիլ: Նոյն իրականութեան առջեւ պիտի գտնուի Միշէլ Աունը, երբ Սաատ Հարիրի, յառաջիկայ քանի մը օրերուն պաշտօնապէս փոխանցէ, անոր թեկնածութեան զօրակցելու անկարելութիւնը: Ժաաժա պատրաստակամութիւն յայտնեց   յետս կոչելու իր թեկնածութիւնը եթէ Մարտ 14-ի ուժերը որդեգրեն այլ թեկնածու մը: Վարչական բարեկարգութիւններու նախարար Նեպիլ Տը Ֆրէյժ   նշեց, թէ Սամիր Ժաաժա կը մերժէ նախագահական դիրքի վրայ պարապութիւնը: Միւս կողմէ, Մարտ 14-ի աղբիւրներ կը յայտնեն, թէ   նորութիւ չկայ Աուն- Հարիրի բանակցային ճակատին վրայ:

Փաղանգաւոր Կուսակցութեան պետ Ամին Ճեմայէլ յայտնեց, թէ նախագահութեան դիրքը փրկելու նախաձեռնութիւնը առնչութիւն չունի իր թեկնածութեան հետ եւ ունեցած հանդիպումներուն ընթացքին չի քննարկեր այդ թղթածրարը: Ճեմայէլ երէկ առաւօտեան այցելեց Պքերքէ եւ հանդիպում մը ունեցաւ   գարտինալ Ռայիի հետ: Սոյն հանդիպումին միացաւ Նատէր Հարիրին: Հանդիպումը աւարտելէ ետք, Ամին Ճեմայէլ զգուշացուց, որ նախագահական   ընտրութիւնը հաւաքական պատասխանատուութիւն է, իսկ  նախագահութեան դիրքին վրայ պարապութիւնը ծանր հետեւանքներ պիտի ունենայ Լիբանանի ապագային վրայ: Միւս կողմէ, երեսփոխան Սամի Ճեմայէլ   Փարիզի մէջ հանդիպում մը ունեցաւ նախկին վարչապետ Սաատ Հարիրիին հետ:

Ընտրական մթնոլորտին մէջ մնալով, Սամի Ճեմայէլ եւ Թէյմուր Ճոմպլաթ մնայուն կը հաղորդակցին մինչեւ 25 Մայիս նախագահ ընտրելու կարելիութիւններուն շուրջ: Ի դէպ, Մարտ 8-ը եւ 14-ը ներկայացնող բազմաթիւ աղբիւրներ կը յայտնեն, թէ մտավախութիւն չունին մինչեւ  25 Մայիս նոր նախագահ չընտրելու հետեւանքներէն, որովհետեւ Թամամ Սալամի կառավարութիւնը ի վիճակի է վարելու երկիրը: Սակայն մարոնիներու Պշարա Ռայի գարտինալը տարբեր տեսակէտ ունի այս գործընթացին շուրջ.« Նախագահութեան դիրքի վրայ պարապութիւնը երկիրը անգլուխ պահելու համազօր քայլ մը պիտի ըլլայ: Կը մերժենք որեւէ ձեւով կամ՝պատճառով, նոյնիսկ մէկ վայրկեանի համար անգլուխ պահել երկիրը». զգուշացուց Ռայի: Պքերքէ նաեւ հերքեց նախագահ Միշէլ Սըլէյանի պաշտօնավարութեան պայմանաժամը երկարաձգելու մասին   տեղեկութիւնները: Սակայն լրատուական աղբիւրներ կը   հաղորդեն, թէ նոր նախագահի   ընտրութիւնը ձախողելու պարագային, Ռայի պիտի ծանրանայ նախագահ Սըլէյմանի պաշտօնավարութեան երկարաձգումին: Մուսթաքպալ Հոսանքի անդամ, երեսփոխան Ահմէտ Ֆաթֆաթ բացառեց երկարաձգումի տարբերակը, դիտել տալով որ նախագահի ընտրութիւնը աւելի նախընտրելի քայլ մը պիտի ըլլայ, քան՝  սահմանադրութեան փոփոխութիւնը:

Ընկերվարական Կուսակցութեան աղբիւրներ կը յայտնեն, թէ Ուալիտ Ճոմպլաթ կ’աշխատի մօտեցնելու հակադիր խմբաւորումներուն   կեցուածքները: Ան ընդունեց Ժամաա Իսլամիյէն ներկայացնող պատուիրակութիւն մը:

LEAVE A REPLY

Please enter your comment!
Please enter your name here