ՄԱՆՉԵՍԹԸՐ ՍԻԹԻ ՇԱՀԵՑԱՒ ԱՆԳԼԻՈՅ ՖՈՒԹՊՈԼԻ ԱԽՈՅԵԱՆՈՒԹԵԱՆ ՏԻՏՂՈՍԸ

0
164

Մանչեսթըր Սիթի շահեցաւ Անգլիոյ ֆութպոլի ախոյեանութեան տիտղոսը: Սիթիի յաջողութիւնը   երկրորդն էր՝ վերջին երեք տարիներուն ընթացքին: Արդարեւ, ախոյեանութեան   38-րդ   եւ վերջին օրուան   հանդիպումներուն,   Սիթի սեփական դաշտին մէջ   ընդունեց Ուեսթ Համ Եունայթըտը եւ երկու անպատասխան գնդակ զետեղեց անոր բերդին մէջ:  Սամիր Նասրի եւ Վինսէնթ Գոմփանի նշանակեցին « Սիթիզընզ»ներուն կոլերը: Սիթիի անմիջական մրցակիցը՝ Լիվըրփուլ,   Էնֆիլտ Ռոտի մէջ 2-1 արդիւնքով պարտութեան մատնեց Նիուքասլ Եունայթտը: Ակէր եւ Սթարիճ   նշանակեցին «Կարմիրներ»ուն կոլերը: Չելսի գրաւեց երրորդ   դիրքը: Նորուիչ, Ֆուլամ եւ Գարտիֆ Սիթի հրաժեշտ տուին Փըրըմիյէր Լիկ-ին: Լիվըրփուլի յարձակող Լուիս Սուարէզ՝ 31 կոլով դարձաւ ախոյեանութեան ամենաշատ կոլ նշանակող ֆութպոլիստը:

ԸՆԴՀԱՆՈՒՐ ԴԱՍԱՒՈՐՈՒՄ

1-     Մանչեսթըր Սիթի՝ 38 մրց. 86 կէտ

2-     Լիվըրփուլ՝ 38 մրց. 84 կէտ

3-     Չելսի՝   38 մրց. 82 կէտ

4-     Արսենալ՝ 38 մրց. 79 կէտ

5-     Էվըրթըն՝ 38 մրց. 72 կէտ

6-     Թոթենհամ՝ 38 մրց.   69 կէտ

 

Սպանիոյ ֆութպոլի ախոյեանութեան նախավերջին՝ 37-րդ հանգրուանի հանդիպումներուն, Աթլեթիքօ Մատրիտ սեփական դաշտին մէջ 1-1 արդիւնքով հաւասարութիւն մը արձանագրեց Մալակայի դէմ: Ռէալ Մատրիտ՝ 2-0 արդիւնքով պարտութիւն մը կրեց   Չելթա Վիկոյի դէմ, իսկ Պարչելոնա՝ 0-0 հաւասարութեամբ գոհացաւ   Էլչէի դէմ: Սոյն պարտութենէն ետք, Ռէալ Մատրիտ կորսնցուց տիտղոսը շահելու յոյսերը: Ռէալ Մատրիտի յարձակող Քարիմ Պենզեմա վնասուածքի   հետեւանքով բացակայեցաւ մրցումէն: Պենզեմա նաեւ պիտի բացակայի Եւրոպայի Ախոյեան Ակումբներու Ախոյեանութեան «Չեմինզ Լիկ» բաժակի աւարտական մրցումէն: Այժմ տիտղոսը պիտի վճռուի Պարչելոնայի եւ Աթլեթիքօ Մատրիտի միջեւ: Պարչելոնայի մարզիչ Ճեռարտօ Մարթինօ ըսաւ, թէ շաբաթավերջին՝ Աթլեթիքօ Մատրիտի դէմ վճռական հանդիպումին անհրաժեշտ է ունենալ   համակիրներուն զօրակցութիւնը: Նշենք, թէ տիտղոսը պահպանելու համար, Պարչելոնա պայման է որ իր վերջին մրցումին պարտութեան մատնէ Աթլեթիքօ Մատրիտը, այլապէս վերջինս պիտի շահի տիտղոսը: Պարչելոնայի խմբապետ Գարլէս Փույոթ պաշտօնապէս յայտարարեց, թէ եղանակի աւարտին   վերջակէտ պիտի դնէ ֆութպոլային ասպարէզին: Վիլառէալ չորս անպատասխան գնդակ զետեղեց Ռայօ Վալեքանոյի բերդին մէջ:

 

Ռէալի յարձակող եւ Փորթուգալի հաւաքականի խմբապետ Քրիսթիանօ Ռօնալտոյի կարծիքով, Պրազիլ եւ Սպանիա պիտի   ըլլան Մոնտիալ 2014-ի տիտղոսին գլխաւոր յաւակնորդները:

ԸՆԴՀԱՆՈՒՐ ԴԱՍԱՒՈՐՈՒՄ

1-     Աթլեթիքօ Մատրիտ՝ 37 մրց. 89 կէտ

2-     Պարչելոնա՝ 37 մրց. 86 կէտ

3-     Ռէալ Մատրիտ՝ 37 մրց.   84 կէտ

Գերմանիոյ ֆութպոլի ախոյեանութեան 34-րդ հանգրուանի մրցումներուն, Պայերն Միւնիխ՝   1-0 արդիւնքով   պարտութեան մատնեց Շթութկարթը: Գլաուտիօ Փիզարօ՝ 92-րդ վայրկեանին նշանակեց պաւարիական խումբին կոլերը: Շթութկարթի դէմ յաղթանակէն ետք, մարզասէրներու ներկայութեան տեղի ունեցաւ ախոյեանութեան տիտղոսի եւ մետալներու յանձնման պաշտօնական արարողութիւն: Պայերնի   գլխաւոր մարզիչ Խօսէպ Կուարտիոլա յայտարարեց, թէ հպարտ էր իր խումբով: Կուարտիոլա մտահոգութիւն յայտնեց միջնապահ Պասթիան Շուայնշթայկրի բացակայութեան, մաղթելով որ վերջինս ապաքինած կ’ըլլայ մինչեւ բաժակի աւարտականի հանդիպումը:

Միւս կողմէ, Պորուսիա Տորթմունտ մրցակիցի դաշտին մէջ 4-0 արդիւնքով պարտութեան մատնեց Հերթա Պերլինը: Ռոպերթ Լեւանտովսքի (2), Միլոշ Եոյիչ եւ Հենրիխ Մխիիթարեան նշանակեցին հիւրերուն կոլերը: Պորուսիա Տորթմունտի յարձակող Ռոպէրթ Լեւանտովսքի գլխաւորեց   ընթացիկ տարուան ախոյեանութեան գլխաւոր ռմբարկուներու ընդհանուր դասաւորումը: Յառաջիկայ մարզաշրջանին Պայերն Միւնիխին փոխանցուած   25-ամեայ յարձակողը քսան կոլ նշանակած է մրցակից խումբերու բերդին մէջ: Այս առիթով նշենք, թէ Հայաստանի հաւաքականի եւ Պորուսիա Տորթմունտի միջնապահ Հենրիխ Մխիթարեան ինը կոլ նշանակեց ախոյեանութեան մրցումներուն ընթացքին:

ԸՆԴՀԱՆՈՒՐ ԴԱՍԱՒՈՐՈՒՄ

1-     Պայերն Միւնիխ՝ 34 մրց. 90 կէտ

2-     Պորուսիա Տորթմունտ՝ 34 մրց. 71 կէտ

3-     Շալքէ 04՝ 34 մրց.   64 կէտ

Իտալիոյ ախոյեանութեան 37-րդ հանգրուանի մրցումներուն, կեդրոնական հանդիպումը անկասկած Ռոմայի եւ Եուվենթուսի միջեւ ճակատումն էր: Հետաքրքրական այս հանդիպումը վերջ գտաւ Եուվէի յաղթանակով՝ 1-0: Յաղթանակի կոլը նշանակեց Փապլօ Օսուալտօ, մրցումի   94-րդ վայրկեանին:

Աթալանթա՝ 2-1 արդիւնքով յաղթեց Ա.Սէ. Միլանին: Աթալանթայի յաղթանակի կոլը նշանակեց Ֆրանքօ Պրիենցան՝   հանդիպման 96-րդ վայրկեանին…:  Ինթէր Միլան   4-1 արդիւնքով ծանր պարտութեան մատնեց Լացիոյին: Ռոտրիկօ Փալասիօ (2), Մաուրօ Իքարտի եւ Հեռնանտէզ նշանակեցին Ինթէրի կոլերը: Ինթէրի խմբապետ Խաւիյէ Զանեթի   իր վերջին մրցումը կատարեց ակումբին շապիկով: 40-ամեայ արժանթինցին, 1995-էն ի վեր կրած է Ինթէրի շապիկը: Ինթէր Միլան ներկայիս 60 կէտով կը գրաւէ ընդհանուր դասաւորման 5-րդ կէտը: Նափոլի, մրցակիցի դաշտին մէջ   5-2 արդիւնքով պարտութեան մատնեց Սամփտորիային: Լիվորնօ, Պոլոնիա եւ Գաթանիա ինկան բ. դասակարգ:

Լրագրողները հրապարակեցին ընթացիկ ախոյեանութեան Իտալիոյ խորհրդանշական հաւաքականը.բերդապահ՝ Մաթիա Պերի (Ճենովա), յետսապահներ՝ Մեհտի Պենաթիա (Ռոմա), Լէանտրօ   Քասթան (Ռոմա), Ճորճօ Չելինի (Եուվենթուս), միջնապահներ՝ Խուան Քուարտատօ (Ֆիորենթինա), Արթուրօ Վիտալ (Եուվենթուս), Պորխա Վալերօ (Ֆիրոենթինա), Ալեսիօ Չերչի (Թորինօ), յարձակողներ՝ Գարլոս Թեվէզ(Եուվենթուս), Լուքա Թոնի (Վերոնա), Ճիրօ Իմոպլէ (Թորինօ):

ԸՆԴՀԱՆՈՒՐ ԴԱՍԱՒՈՐՈՒՄ

1-     Եուվենթուս՝ 37 մրց.   99 կէտ

2-     Ռոմա՝   37 մրց. 85 կէտ

3-     Նափոլի՝ 37 մրց.   75 կէտ

Ֆրանսայի մէջ տեղի ունեցան ախոյեանութեան նախավերջին՝ 37-րդ հանգրուանի հանդիպումները: Ախոյեանութեան տիտղոսակիր Փարի Սէն Ժերմէն՝   3-1 արդիւնքով պարտութեան մատնեց Լիլը: Մարքինիոս, Մոուրա եւ Մաթիութի նշանակեցին մայրաքաղաքի խումբին կոլերը: Սէն Ժերմէն, հաւաքած կէտերուն թիւը   բարձրացուց 86-ի՝ բարելաւելով 2005-06 տարեշրջանին Լիոնի մրցանիշը՝ 84 կէտ: Մոնաքօ՝ 2-1 արդիւնքով պարտութեան մատնեց Վալենսիէնը: Միշէլ Տէր Զաքարեանի մարզած Նանթը սեփական դաշտին մէջ 3-1 արդիւնքով խոնարհեցաւ Սէն Թեթիէնի առջեւ: Նանթ կը գրաւէ 11-րդ դիրքը: Այաքսիօ եւ Վալենսիէն ինկան բ.   դասակարգ:

Պորտօ ակումբին տնօրէնութիւնը՝ գլխաւոր մարզիչի պաշտօնին համար պաշտօնական առաջարկ մը ներկայացուց Զինէտտին Զիտան: 43-ամեայ Զիտան, 1992-1996 կրած է Պորտոյի շապիկը: Միւս կողմէ, մարզիչ փնտռող Մոնաքօ ակումբին տնռրէնութիւնը Լիզպոնի մէջ հանդիպում մը ունեցաւ Պենֆիքայի մարզիչ Խորխէ Ճեզուզի հետ, անոր ներկայացնելով ֆրանսական խումբը ստանձնելու առաջարկ մը:

ԸՆԴՀԱՆՈՒՐ ԴԱՍԱՒՈՐՈՒՄ

1-     Փարի Սէն Ժերմէն՝ 37 մրց. 86 կէտ

2-     Մոնաքօ՝ 37 մրց.   79 կէտ

3-     Լիլ՝ 37 մրց. 68 կէտ

 

Ռուսիոյ ախոյեանութեան 28-րդ հանգրուանի մրցումներուն, Զենիթ – Տինամօ Մոսկուա հանդիպումը 84-րդ վայրկեանին կիսատ մնաց, մրցակից խումբերուն համակիրներուն միջեւ ծայր առած բախումներուն պատճառով: Տինամօ կը պահէր 4-2 արդիւնքով   առաւելութիւն մը: Ռուսիոյ ֆութպոլի ֆետերասիոնը շատ հաւանաար թեքնիքական պարտութիւն արձանագրէ Զենիթին: Մոսկուայի Բանակայինները ( ԲԿՄԱ) 2-0 արդիւնքով պարտութեան մատնեցին Տոմին եւ սկսան գլխաւորել ընդհանուր դասաւորումը: Լոքոմոթիվ Մոսկուա՝ 2-0 արդիւնքով պարտութիւն մը կրեց Ռոստովէն: Շնորհիւ Եուրա Մովսիսեանի նշանակած կոլին, Մոսկուայի Սպարտակը՝ 1-0 արդիւնքով պարտութեան մատնեց Ամքարին: Սպարտակ ներկայիս կը գրաւէ ընդհանուր դասաւորման 5-րդ դիրքը: Անժի՝ 1-0 արդիւնքով պարտութիւն մը կրեց Քրասնոտարէն եւ հեռացաւ Փըրըմիյէր Լիկ-էն:

Տոնեցքի Շախտիորը   հինգերորդ տարին անընդմէջ   շահեցաւ Ուքրանիոյ ֆութպոլի ախոյեանութեան տիտղոսը:

Բանանց շահեցաւ Հայաստանի ֆութպոլի ախոյեանութեան տիտղոսը: Հայաստանի ֆութպոլի ախոյեանութեան 25-րդ՝ նախավերջին օրուան հանդիպումներուն, Բանանց՝ 2-1 արդիւնքով   պարտութեան մատնեց Փիւնիկին եւ անհասանելի դարձաւ իր մրցակիցներուն համար: Երեւանի Արարատը, Կապանի մէջ՝ 2-1 արդիւնքով պարտութիւն մը կրեց Գանձասարէն: Շիրակ՝ 2-1 արիւնքով պարտութեան մատնեց Ուլիսին: Միքան 1-1 արդիւնքով հաւասարութիւն մը արձանագրեց Ալաշկերտի դէմ: Այսպիսով, Միքա իր կէտերուն թիւը բարձրացուց 44-ի եւ գրաւեց ընդհանուր դասաւորման երրորդ դիրքը:

LEAVE A REPLY

Please enter your comment!
Please enter your name here