ԼԱՎՐՈՎ ՝ ՏՈՆԵՑՔԻ ԵՒ ԼՈՒԿԱՆՍՔԻ ՀԱՆՐԱՔՈՒԷՆԵՐԸ ՔԻԵՒԻ ՎԱՐԱԾ ՔԱՂԱՔԱԿԱՆՈՒԹԵԱՆ ՀԵՏԵՒԱՆՔ ԵՆ

0
114

Մեկնաբանելով արեւելեան Ուքրանիոյ Տոնեցքի եւ Լուկանսքի մարզերուն մէջ տեղի ունեցած հանրաքուէները, Ռուսիոյ արտաքին գործոց նախարար Սերկէյ Լաւրով յայտնեց, թէ անոնք Քիեւի վարած քաղաքականութեան եւ ցուցաբերած անտարբերութեան հետեւանք են:

Տոնեցքի ժողովրդական   հանրապետութեան կառավարութեան համանախագահ Տենիս   Փուշիլին Ռուսիոյ դիմեց՝ Լուկանսքի   ժողովրդական   հանրապետութեան հետ   միաւորուելու մտադրութեան համար:

Միացեալ Նահանգներ, Եւրոպական Միութիւնը եւ Ուքրանիոյ նոր իշխանութիւնները հաւանութիւն տուին Ուքրանիոյ քաղաքական ճգնաժամը   յաղթահարելու նպատակով ԵԱՀԿ առաջարկած   ճանապարհային քարտէսին: ԵԱՀԿ նախագահ, Զուիցերիոյ արտաքին   գործոց նախարար Տիտիէ   Պուրկհալթըր   հեռաձայնային հաղորդակցութիւն մը ունեցաւ նախագահ Վլատիմիր Փութինի հետ: Փութին   հաւանութիւն տուաւ ԵԱՀԿ   ճանապարհային քարտէսին:

Միւս կողմէ, Եւրոպական Միութիւնը նոր պատժամիջոցներ հաստատեց Ռուսիոյ դէմ: Պատժամիջոցները՝ նախորդին նման ուղղուած են   անձնաւորութիւններու դէմ: Թիւով 61 անձեր ընդգրկուած են պատժացուցակին մէջ: Գանատա եւս նոր պատժամիջոցներ հաստատեց ռւոս անձնաւորութիւններու հետ: Գերմանիոյ արտաքին գործոց նախարար Ուալթէր Շթայնմայէր ժամանեց Քիեւ եւ հանդիպումներու շարք մը ունեցաւ   նոր իշխանութիւններուն հետ: Նախարարը նաեւ զգուշացուց Եւրոպայի տնտեսութեան վրայ Ռուսիոյ դէմ տնտեսական պատժամիջոցներուն հետեանքներէն:

Ուքրանիոյ խորհրդարանի (Ռատա) նախագահի պաշտօնակատար Ալեքսանտր Թուրչինովը Եւրոպական Խորհուրդի նախագահ Հերման   Վան Ռոմպէյի հետ քննարկեց Ուքրանիոյ իրավիճակը:   Թուրչինով   ըսաւ, թէ Ուքրանիա պատրաստ է իր կարելին ընելու՝   Եւրոպական ընտանիքին արժանի անդամ դառնալու համար: Ռոմպէյ՝ 1.6   միլիառ   եուրոյի   չափով     օգնութիւն մը խոստացաւ Ուքրանիոյ:

LEAVE A REPLY

Please enter your comment!
Please enter your name here