ՀՈԼԱՆՏ՝ ՖՐԱՆՍԱ ՊԻՏԻ ՄՆԱՅ ՀԱՅԱՍՏԱՆԻ ԿՈՂՔԻՆ

0
118

Ֆրանսայի նախագահ Ֆրանսուա Հոլանտ Հայաստան կատարած այցելութեան երկորդ եւ   վերջին օրը կատարեց կարգ մը   ուշագրաւ յայտարարութիւններ:

Հայաստանի նախագահ Սերժ Սարգսեան եւ Ֆրանսայի նախագահ Ֆրանսուա Հոլանտ երէկ առաւօտեան ունեցան բանակցութիւններու նոր հանգրուան մը: Բանակցութիւնները աւարտելէ ետք, կողմերուն միջեւ տեղի ունեցաւ շարք մը համաձայնագիրներու ստորագրութիւն: Կողմերը ստորագրեցին ընդհանուր ութ փաստաթուղթ: Բանակցութիւններու արդիւնքները ամփոփուեցան համատեղ մամլոյ ասուլիսի մը մէջ:

Նախագահ Սարգսեան նշեց, թէ Հայաստանի եւ Ֆրանսայի շուրջ 35 քաղաքներու միջեւ   հաստատուած է   սերտ համագործակցութիւն: Ֆրանսայի կողմէ Հայաստանի մէջ իրագործուած են   շարք մը նախագիծեր: Սարգսեան նաեւ անդրադարձաւ Լեռնային Ղարաբաղի   հակամարտութեան եւ ըսաւ, թէ վերջնական կարգավիճակը պէտք է որոշուի իրաւական պարտադիր ուժ ունեցող՝ ժողովուրդի   կամարտայայտութեան միջոցով: Այս առիթով, նախագահ Սարգսեան ընդգծեց, թէ   Ճէյմս Ուորլիքի յայտարարութիւնը առանձնապէս   չէր ընդգրկեր որեւէ նորութիւն:   Նախագահ Սերժ Սարգսեան   մաղթեց,որ Եւրոպական Միութիւնը առանձնակի առաջարկութիւններով ներկայանար Հայաստանին:

Ֆրանսայի նախագահ Ֆրանսուա Հոլանտ անդրադարձաւ հայ-թրքական յարաբերութիւններուն եւ նշեց, թէ Թուրքիոյ կողմէ կայ միայն մէկ լուծում՝ Հայոց Ցեղասպանութեան ճանաչում: Մեկնաբանելով   վարչապետ Էրտողանի ելոյթը, Հոլանտ նշեց,թէ ինք արդէն տուած է իր գնահատականը .« Միշտ կը ցանկանանք տեսնել դրական, բայց կայ միայն մէկ լուծում՝ Ցեղասպանութեան   ճանաչումը». յայտարարեց Հոլանտ: Միւս կողմէ, Հոլանտ պատրաստակամութիւն յայտնեց ընդունելու Հայաստանի եւ Ատրպէյճանի նախագահները՝ Լեռնային Ղարբաղի   հակամարտութեան լուծում գտնելու եւ կողմերուն միջեւ փոխվստահութիւնը ամրապնդելու նպատակով:

Հոլանտ շօշափեց Եւրոպական Միութեան եւ Հայաստանի փոխյարաբերութիւնները.« Եւրոպական Միութիւնը պէտք է հասկնայ որ   Հայաստան կը գտնուի իւրայատուկ   աշխարհագրական պայմաններու տակ: Հայաստանի շահերը կը պահանջեն ամրապնդել Եւրոպական Միութեան հետ համագործակցութիւնը, բայց միւս կողմէ չեմ փափաքիր որ Հայաստան տնտեսական յարաբերութիւնները խզէ Ռուսիոյ հետ: Եւրոպական Միութեան պիտի   քաջալերեմ որ հասկնայ Հայաստանի   իւրայատուկ պայմանները». ընդգծեց Հոլանտ: Ֆրանսայի նախագահը իր խօսքի աւարտին նշեց,թէ Ֆրանսա միշտ պիտի ըլլայ Հայաստանի կողքին: Ան խոստացաւ յառաջիկայ Ապրիլին, ներկայ գտնուիլ Հայոց Ցեղասպանութեան 100-ամեակի ոգեկոչման հանդիսութիւններուն:

Հայաստանի նախագահ Սերժ Սարգսեան Փառքի շքանշանով պարգեւատրեց   նախագահ Ֆրանսուա Հոլանտը: Հոլանտի Հայաստան կատարած այցելութեան առիթով, Երեւանի կեդրոնը գտնուող Մաշտոց պողոտայի   պուրակը   վերանուանուեցաւ Ֆրանսայի ազգային հերոս, Դիմադրութեան շարժման մարտիկ Միսակ Մանուշեանի անունով: Նախագահ Հոլանտ յայտարարեց, թէ Միսակ Մանուշեան կը ներկայանայ իբրեւ հայ-ֆրանսական բարեկամութեան խորհրդանիշ:

Նախագահ Հոլանտի այցելութեան վերջին կայանը դարձաւ«Երեւան Մոլ» առեւտրական գօտիին մէջ կառուցուող ֆրանսական «Քարֆուր» կեդրոնը:

LEAVE A REPLY

Please enter your comment!
Please enter your name here