Թուրք Դեսպանը Հայերուն Հատուցում Տալու Կարելիութիւն Չի Տեսներ

0
137

 Հայկական Հարցին վերաբերեալ շարք մը ապշեցնող յայտարարութիւններով հանդէս եկած է թուրք նախկին դեսպան Վոլքան Վուրալը, պնդելով, որ հայերուն հասցէագրուած ցաւակցական ուղերձին կողքին այլ քայլերու եւս կարելի է ձեռնարկել: Ըստ «Պուկիւն»ի՝ Վուրալ նշած է, թէ զոհերու թոռներուն քաղաքացիութիւն տալու գործընթացը կարելի է դիւրացնել, սակայն հատուցման մասին խօսիլ իսկ կարելի չէ: «Իմ կարծիքով՝ հատուցման խնդիր պիտի չյառաջանայ: Որմէ՞ պիտի պահանջեն: Կ՛ըսեն, որ եթէ «ցեղասպանութիւն» ըսենք, հողային հարց մէջտեղ պիտի գայ: Այսօր աշխարհի մէջ ո՞ր պետութիւնը միւսին հող յանձնած է: Այսինքն՝ ո՞վ Թուրքիոյ հողը Թուրքիայէն պիտի պահանջէ: Նման բան չի կրնար ըլլալ», ըսած է ան ու ամենայն «լրջութեամբ» աւելցուցած. «Եթէ զոհերու թոռիկները փափաք ունենան հաստատուելու հոն, ապա բնակարանաշինութեան նախարարութիւնը կրնայ դիւրութեամբ տուներ յատկացնել անոնց: Նման քայլ մը կրնայ չբաւարարել հայկական Սփիւռքի պահանջները, բայց գոնէ կրնանք շահիլ անոնց՝ սփիւռքահայերուն, սիրտերը: Վերջապէս, երբեք պիտի չըսեն, որ «Թուրքիան իր լաւագոյնը կ՛ընէ»:
Վուրալ նաեւ «դրական եւ ճիշդ քայլ» համարած է հայերուն ուղղուած վարչապետ Ռեչեփ Թայիփ Էրտողանի ցաւակցական ուղերձը: Ըստ թրքական լրատուամիջոցներուն՝ Վուրալ եղած է առաջին թուրք դիւանագէտը, որ կոչ ըրած է Թուրքիոյ՝ հայերէն ներողութիւն խնդրելու:

LEAVE A REPLY

Please enter your comment!
Please enter your name here