ԼԻԲԱՆԱՆԵԱՆ ԿԱՐՃ ԼՈՒՐԵՐ

0
115

– Լիբանանեան խորհրդարանը երէկ առաւօտեան օրէնսդիր նիստ մը գումարեց եւ քննարկեց կարգ մը օրինագիծեր, որոնց մէջ՝ աշխատավարձերու յաւելման թղթածրարը: Նիստը սկսելէ առաջ, խորհրդարանի նախագահ Նեպիհ Պըրրի կրթութեան նախարար Իլիաս Պուսաապէն պահանջեց հաղորդակցութեան մէջ մտել Սենտիքայական Համակարգումի Խորհուրդի անդամ Հաննա Ղարիպի հետ, որպէսզի վերջինս ներողամտութիւն խնդրէ երեսփոխաններուն հասցէին կատարած վիրաւորանքներուն: Պըրրի յայտարարեց, թէ խորհրդարանը ոչ մէկ օրինագիծ պիտի վաւերացնէ սպառնալիքի եւ ճնշումներու տակ:  Ղարիպ պաշտօնապէս ներողութիւն յայտնեց իր արտայայտութիւններուն համար: Քանի մը ընդմիջումներով նիստը   շարունակուեցաւ մինչեւ ուշ գիշեր:   Թերթը մամուլի   յանձնելու պահուն քննարկումը կը շարունակուէր տակաւին:

-Այն Հելու գաղթակայանին մէջ սալաֆական   շարժումներու հետեւորդ զինեալներու հոսքը լարուած մթնոլորտ մը ստեղծած է   պաղեստինեան հատուածներու եւ ծայրայեղական կազմակերպութիւններու միջեւ:Կասկածներ կան, որ   ընդհատումով   բախումները ընդհանուր բռնկում մը յառաջացնեն գաղթակայանին մէջ, խախտելով տիրող ապահովական կայունութիւնը:

-Աշխատավարձերո յաւելման թղթածրարը մօտաւորապէս   1400 միլիառ լիբանանեան ոսկի գումար մը պիտի արժէ Լիբանանի պետական գանձին: Յաւելման շղթան քննարկող խորհրդարանական յանձնախումբը Յաւելեալ Արժէքի Տուրքի (Թէ, Վէ. Ա) մէկ առ հարիւրի   նոր յաւելում մը կ’առաջադրէ ներկայացուցած լուծումներուն մէջ:

-Կաթողիկէ վարժարաններու ընդհանուր քարտուղար հայր Պութրոս Ազար դիտել տուաւ, թէ ծնողներու կողմէ կրթաթոշակները   չվճարելու երեւոյթը   տնտեսական լուրջ տագնապ պիտի   յառաջացնէ կրթական հաստատութիւններուն մէջ, որուն հետեւանքով հաստատութիւնները պիտի չկարենան վճարել ուսուցիչներուն աշխատավարձերը:

– Ներքին գործոց նախարար Նիհատ Մաշնուք Յունիս ամսուան սկիզբը   շրջագայութիւն մը պիտի կատարէ դէպի Արաբական Ծոցի պետութիւններ:

– Սենտիքայական Համակարգումի խորհուրդին հրաւէրով Լիբանանի տարբեր շրջաններուն մէջ նստացոյցեր եւ   բողոքի հաւաքներ տեղի ունեցան երէկ: Ցուցարարները մերժեցին աշխատավարձերու յաւելումներուն վերաբերեալ խորհրդարանական յանձնախումբին պատրաստած օրինագիծը: Խորհուրդի նախագահ Հաննա Ղարիպ յայտարարեց, թէ   բողոքը պիտի շարունակուի մինչեւ պետական պաշտօնեաները եւ ուսուցիչները լիիրաւ կերպով ստանան իրենց իրաւունքները:

LEAVE A REPLY

Please enter your comment!
Please enter your name here