ԼԻԲԱՆԱՆԵԱՆ ԿԱՐՃ ԼՈՒՐԵՐ

0
110

–         Ընկերվարական Յառաջդիմական Կուսակցութեան պետ Ուալիտ Ճոմպլաթ քաղաքական ասպարէզէն   հեռանալու մտադրութիւն մը արտայայտեց: Սակայն անմիջապէս աւելցուց, թէ  առնուազն երկու տարի տրամադիր է պահպանելու կուսակցապետի   դիրքը: Անդրադառնալով Սուրիոյ հակամարտութեան, Ճոմպլաթ յայտնեց, թէ Հոմսի անկումով փուլ եկած է   տագնապին   քաղաքական լուծում գտնելու վերջին առիթը: Անոր կարծիքով, Հոմսի անկումէն ետք, ռազմաճակատը պիտի փոխադրուի Տարաա: Ճոմպլաթ դիտել տուաւ, որ Հըզպալլա եւ Իրան մաս կը կազմեն Լիբանանի նախագահական ընտրութիւններու գլխաւոր «ընտրող»ներու ցանկին,աւելցնելով որ Հըզպալլա պարտութիւն չէր կրած Սուրիոյ մէջ: Ճոմպլաթ նշեց, թէ ընտրական անորոշութիւնը պիտի շարունակուի, արտաքին անակնկալի մը սպասումով: Ան նաեւ նշեց,թէ պատկերացում չունի թէ Միշէլ Աուն ինչպէս կրնայ հրաժարիլ նախագահութեան հասնելու իր   ձգտումներէն: Ճոմպլաթ մաղթեց,որ խորհրդարանը կ’ընտրէ չափաւորական եւ ոչ՝ առճակատումի նախագահ մը:

–         Լիբանանի մօտ Սէուտական Արաբիոյ դեսպան Ալի Աուատ Օսէյրի մաղթեց,որ Լիբանան դիմաւորէ զբօսաշրջիկներով հարուստ Ամառ մը:   Դեսպանը աւելցուց, թէ Ռիատ արգելք մը չունի սէուտցի զբօսաշրջիկներու Լիբանան այցելութեան դէմ:

–         Սաատ Հարիրի՝ չորս միլիոն ամերիկեան տոլար գումարի յատկացում մը խոստացաւ Պապ Թըպենէի Սուրիա փողոցին վերաշինութեան ծրագիրներուն:  Հարիրի իր խոստումը գրաւոր նամակով մը փոխանցած է արդարադատութեան նախարար Աշրաֆ Ռիֆիին: Վերջինս նամակը փոխանցած է վարչապետ Թամամ Սալամին: Սալամ յայտնած է, թէ նախքան ծրագիրին գործադրութիւնը, զայն պիտի ներկայացնէ կառավարութեան, ունենալու կառավարութեան հաւանութիւնը:

–         Հըզպալլայի աղբիւր մը յայտնեց, թէ մարոնիներու Պշարա Ռայի գարտինալին Երուսաղէմ այցելութիւնը, սիոնական պետութեան օրինականութիւն շնորհելու քայլ մը պիտի դառնայ:

–         Լիբանանեան կառավարութիւնը այսօր յետմիջօրէին Պաապտայի պալատին մէջ, հանրապետութեան նախագահ Միշէլ Սըլէյմանի գլխաւորութեամբ պիտի գումարէ ընթացիկ նիստ մը եւ քննարկէ 61   կէտերէ բաղկացած օրակարգ մը: Կ’ակնկալուի, որ նիստի ընթացքին ամբողջանայ նշանակումներու նոր փունջ մը:

–         Լիբանանի մօտ Միացեալ Նահանգներու դեսպան Տէյվիտ Հիլ   այցելութիւն մը տուաւ ելեւմտական հարցերու նախարար Ալի Հասան Խալիլին եւ քննարկեց ներլիբանանեան բեմի վերջին զարգացումները, ինչպէս նաեւ աշխատավարձերու   յաւելման   թղթածրարը:

LEAVE A REPLY

Please enter your comment!
Please enter your name here