ՆԱԽԱԳԱՀԱԿԱՆ ՃԵՐՄԱԿ ԾՈՒԽԸ Կ’ՈՒՇԱՆԱՅ

0
137

Սկզբունքով այսօր՝ Հինգշաբթի, լիբանանեան խորհրդարանը հրաւիրուած է ընտրելու երկրի նոր նախագահը: Սակայն, ըստ երեւոյթին, սպասուող   «ճերմակ ծուխ»ին հասնելու ճիգերը բաւական երկար ճանապարհ ունի հատելիք:

Պքերքէի մօտիկ շրջանակներ մարոնի ղեկավարներու նոր հանդիպում մը կը նախատեսեն նախքան   25 Մայիսը: Խորհրդարանի նախագահ Նեպիհ Պըրրի յայտնեց, թէ Միշէլ Աունի կողմնակիցներէն կարգ մը լաւատեսական նախանշաններ լսած է վերջին ժամերուն: Պըրրի մաղթեց, որ քաղաքական հոսանքները բազամացնեն խորհրդակցութիւնները եւ փոխհասկացութեան հասնին նախքան խորհրդարան ժամանելը: Պըրրի երէկ առաւօտեան ընդունեց Մուսթաքպալ Հոսանքի պետ Ֆուատ Սինիորան եւ երեսփոխան Ժորժ Ատուանը: Ան նաեւ հեռաձայնային հաղորդակցութիւն մը ունեցաւ վարչապետ Թամամ Սալամի հետ եւ քննարկեց աշխատավարձերու յաւելման օրինագիծը: Մուսթաքպալ Հոսանքի անդամ, երեսփոխան Ամմար Հուրի դիտել տուաւ, թէ տուեալները այնքան ալ յուսադրիչ չեն նոր նախագահի ընտրութեան համար:

Ոմանց կրծիքով, կացութենէն դուրս գալու   կարելիութիւններէն ամենահաւանականը պիտի ըլլայ նախագահ Սըլէյմանի պաշտօնավարութեան երկարաձգումը:  Այլընտրանքներու բացակայութիւնը եւ սակաւութիւնը կը ստիպէ լրջօրէն խորհիլ երկարաձգումի տարբերակին մասին:  Ընկերվարական Յառաջդիմական Կուսակցութեան պետ Ուալիտ Ճոմպլաթ յայտնեց, թէ արգելք մը չի տեսներ   երկարաձգումի կարելիութեան դէմ: Սակայն նախագահական պալատ այցելուներ կը յայտնեն, թէ Սըլէյման առաջին իսկ օրէն մերժած է երկարաձգելու   ընտրանքը եւ տակաւին կը մնայ   իր տեսակէտին վրայ: Լրատուական կարգ մը աղբիւրներ   կը հաղորդեն, թէ Մուսթաքպալ Հոսանքը հետզհետէ սկսած է համոզուիլ, թէ երկարաձգումը լաւագոյն ընտրանքը պիտի ըլլայ ներկայ հանգրուանին: Լոնտոնի մէջ լոյս տեսնող «Ալ Հայեաթ» օրաթերթը կը գրէ, թէ նախագահ Սըլէյման իր անմիջական մօտիկներէն խնդրած է վերջ դնել երկարաձգումի խօսակցութիւններուն: Միւս կողմէ, «Ալ Մուսթաքպալ» օրաթերթը իր տեղեկութիւնները Լիբանանի մօտ Միացեալ Նահանգներու դեսպանէն քաղելով կը գրէ, թէ արգելք մը չի տեսներ մինչեւ նոր նախագահի ընտրութիւնը, նախագահութեան դիրքին  վրայ Միշէլ Սըլէյմանի   ներկայութեան: Վարչական բարեկարգութիւններու նախարար Նեպիլ Տը Ֆրէյժ յայտնեց, թէ Մուսթաքպալ Հոսանքը կողմնակից է նոր նախագահի մը ընտրութեան եւ կը մերժէ   փոփոխութեան ենթարկել սահմանադրութիւնը:

LEAVE A REPLY

Please enter your comment!
Please enter your name here