ՆԱԽԱԳԱՀԻ ԸՆՏՐՈՒԹԵԱՆ ՆԻՍՏԸ ԴԱՐՁԵԱԼ ՅԵՏԱՁԳՈՒԵՑԱՒ

0
127

Երկրին նոր նախագահ ընտրելու խորհրդարանի նիստը անգամ մը եւս ձախողեցաւ երէկ: Մարտ 8-ի եւ 14-ի ուժերուն միջեւ տարակարծութիւններու հովիտը կ’ընդլայնի, հաւանաբար սպասելով   շրջանային եւ արեւմտեան պետութիւններու վճռական միջամտութեան: Վերադառնանք երէկուան ժամանակագրութեան. նախքան խորհրդարանի նիստը, խորհրդարանի նախագահ Նեպիհ Պըրրի կարճ խորհրդակցութիւններ ունեցաւ երեսփոխան Իպրահիմ Քանաանը եւ Ուալիտ Ճոմպլաթի հետ: Ժամը   12.30-ին, Պըրրի խորհրդարանի ժողովասրահ հրաւիրեց ժամանած երեսփոխանները: Այդ պահուն ընդամէնը 73  երեսփոխաններ ժամանած էին խորհրդարան: սԱնոնցմէ շատեր մուտք չէին գործած ժողովասրահ: Այս կացութեան լոյսին տակ,Պըրրի յետաձգեց նիստը եւ նախագահի ընտրութեան նոր թուական մը   ճշդեց՝   յառաջիկայ Հինգշաբթի, 22 Մայիս, կէսօրուան ժամը   12-ին: Նիստը փակուած յայտարարելէ ետք, Պըրրի ընդունեց Մուսթաքպալ Հոսանքի պետ Ֆուատ Սինիորան եւ վարչապետ Թամամ Սալամը: Երեսփոխան Սամի Ճեմայէլ քննադատեց խորհրդարանական նիստերը խանգարող   երեսփոխանները:

Ոմանց կարծիքով, Ռիատ – Թեհրան  յարբերութիւններուն մեղմացումը կրնայ դրական ազդեցութիւն ունենալ լիբանանեան բեմին վրայ: Սակայն, «Ան Նահար» օրաթերթին կարծիքով, նսվստեսուող սէուտական-իրանեան խորհրդաժողովը, տեղի ունենալու պարագային, սեղանի վրայ պիտի չունենայ լիբանանեան օրակարգը:

«Ան Նահար» օրաթերթը կը գրէ, թէ արտաքին գործոց նախարար Ժըպրան Պասիլ խորհրդակցական երկրորդ   հանդիպում մը ունեցած է Սաատ Հարիրիի հետ, Սէուտական Արաբիոյ մէջ: Պասիլ նաեւ հանդիպած է արտաքին գործոց նախարար Սէուտ Ֆայսալի հետ, սակայն սոյն հանդիպումին եւ անոր արդիւնքներուն մասին կը տիրէ լռութիւն: Փոփոխութիւն եւ Բարեկարգում խորհրդարանական խմբաւորումի պետ Միշէլ Աուն, իր թեկնածութեան առնչութեամբ կը սպասէ Սաատ Հարիրիի պատասխանին: Մուսթաքպալ Հոսանքի անդամ, երեսփոխան Ահմէտ Ֆաթֆաթ ակնարկելով Միշէլ Աունի ակնկալութիւններուն, յայտնեց, թէ պատասխանը նոյնիսկ քալելով ճամբայ ելած ըլլալու պարագային, հասած պիտի ըլլար մինչեւ հիմա: Այսուհանդերձ, Ազգային Ազատ Հոսանքի աղբիւր մը լաւատեսօրէն յայտարարեց,թէ Լիբանան նոր նախագահ մը պիտի ունենայ յառաջիկայ շաբթուան ընթացքին:

Երեսփոխան Ամին Ուահպէ   դիտել տուաւ, թէ Մուսթաքպալ Հոսանքը կը մերժէ   նախագահական դիրքին վրայ պարապութիւնը:

Լիբանանեան Ուժեր Կուսակցութեան գործադիր խորհուրդի պետ Սամիր Ժաաժա պահանջեց   փոփոխութեան ենթարկել սահմանադրութիւնը, որպէսզի ոչ ոք կարենայ խանգարել սահմանադրական գործընթացը: Ան ըսաւ .« Իսկական նախագահ կը պահանջենք Պաապտայի պալատին մէջ եւ ոչ՝ պահակ». ըսաւ Ժաաժա:

Նախագահութեան   թեկնածու Հենրի Հելու ըսաւ, թէ պիտի շարունակէ ընտրապայքարը: Հելու՝ համախոհութեան կոչ ուղղեց կողմերուն:

LEAVE A REPLY

Please enter your comment!
Please enter your name here