Քերի Կը Խոստանայ Շարունակել Ասատի Ընդդիմադիրներուն Օժանդակութիւնը

0
115

Հինգշաբթի, Մայիս 15ին, Լոնտոնի մէջ կայացած «Սուրիոյ բարեկամներ»ու հերթական հանդիպումին ընթացքին, Միացեալ Նահանգներու արտաքին գործոց նախարար Ճան Քերի դարձեալ յայտարարեց, թէ Ուաշինկթըն եւ 10 այլ երկիրներու ներկայացուցիչներ համաձայնած են կարելի բոլոր օժանդակութիւնները տրամադրել՝ Սուրիոյ նախագահ Պաշշար Ասատի իշխանութիւնը տապալելու նպատակով պայքարող ընդդիմադիր ուժերուն, սակայն ամերիկեան ռազմական ուղղակի օժանդակութիւն տրամադրելու խոստում չկատարեց:
Քերի նաեւ քննադատեց Սուրիոյ մէջ Յունիս 3ին նախագահական ընտրութիւններ կատարելու որոշումը: Մէկ օր առաջ, Միացեալ Նահանգներու նախագահ Պարաք Օպամա յայտարարած էր. «Սուրիոյ նախագահ Պաշշար Ասատ իր օրինականութիւնը ամբողջովին կորսնցուց, եւ Սուրիոյ ապագային մէջ իրեն համար տեղ չկայ»: Ան այս յայտարարութիւնը կատարած էր սուրիական ընդդիմութեան Ազգային համաձայնական խորհուրդի նախագահ Ահմետ Ճարպայի հետ ունեցած հանդիպումին ընթացքին, ուր ան նաեւ դատապարտած էր «սուրիական վարչակազմի ուժերուն կողմէ քաղաքայինները թիրախ դարձնելը, մասնաւորաբար՝ պայթուցիկ տակառներով, ինչպէս նաեւ սուրիական տարբեր շրջաններու ժողովուրդը անօթութեան մատնելու եւ պաշարումի քաղաքականութեան օգտագործումը»:
Օպամա աւելցուցած էր. «Երկու կողմերը յանձնառու կը մնան քաղաքական լուծումի մը, որ ամբողջական լիազօրութիւններ ունեցող փոխանցման կառավարութեան մը կազմութիւնը կը պարունակէ, ինչպէս նաեւ՝ Սուրիոյ մէջ գործող ահաբեկչական տարբեր տարրերու դէմ պայքարելու անհրաժեշտութիւնը»:
Իր կարգին, Արաբական լիկայի ընդհանուր քարտուղար Նեպիլ Արապի յայտնեց, որ ՄԱԿի ընդհանուր քարտուղար Պան Քի Մուն տակաւին իրեն հետ չէ խօսած Սուրիոյ հարցով ՄԱԿի եւ Արաբական լիկայի յատուկ պատուիրակ Լախտար Իպրահիմիի յաջորդը նշանակելու հարցին մասին՝ նշելով, որ իրենք համաձայնած են «յառաջիկայ առաքելութեան շուրջ խորհրդակցութիւնները շարունակելու»:
Արապի ըսաւ, որ ինք համաձայն չէ այն պնդումին, որ Իպրահիմիի յաջորդը անպայման արաբ մը պէտք է ըլլայ՝ աւելցնելով, որ Քի Մուն զինք տեղեակ պահած է, թէ Իպրահիմի փափաք յայտնած է, որ զինք յաջորդողը ըլլայ նախկին նախագահ կամ վարչապետ մը, որպէսզի աւելի ազդեցիկ ըլլայ:
Արապի ըսաւ, որ Աւստրալիոյ վարչապետ Քեւըն Ռոտ, որուն անունը կը նշուի իբրեւ Իպրահիմիի յաջորդը, «միջազգային ճանաչում ունեցող յարգելի անձնաւորութիւն մըն է»: Ան նշեց. «Զինք անձնապէս կը ճանչնամ, կը յարգեմ զինք ու արաբներու նկատմամբ անոր դրական զգացումներուն ծանօթ եմ»՝ աւելցնելով, որ նոյնը կարելի է ըսել նաեւ սպանացի դիւանագէտ Հաւիէր Սոլանայի մասին, որուն անունը եւս շրջանառութեան մէջ դրուած է: Արաբական լիկայի ընդհանուր քարտուղարը Իպրահիմիի եւ անոր նախորդին‘ Քոֆի Անանի, առաքելութեանց ձախողութեան համար այպանեց ՄԱԿի Ապահովութեան խորհուրդը, որովհետեւ այդ մարմինը անպատասխան ձգած է պատուիրակներուն օժանդակութեան կոչերը:

LEAVE A REPLY

Please enter your comment!
Please enter your name here