ԱԹԼԵԹԻՔՕ ՄԱՏՐԻՏ ՇԱՀԵՑԱՒ ՍՊԱՆԻՈՅ ՖՈՒԹՊՈԼԻ ԱԽՈՅԵԱՆՈՒԹԻՒՆԸ

0
140

Սպանիոյ ֆութպոլի ախոյեանութիւնը աւարտեցաւ Աթլեթիքօ Մատրիտի յաղթանակով: Մատրիտցիները Գաթալոնիայի մէջ 1-1 արդիւնքով հաւասարութիւն մը արձանագրեցին Պարչելոնայի դէմ եւ  1995-96էն ետք առաջին անգամ ըլլալով տիրացան ախոյեանութեան տիտղոսին: Մատրիտցիները իրենց պատմութեան մէջ 10-րդ անգամ ըլլալով կը շահէին Սպանիոյ ֆութպոլի ախոյեանութիւնը: Մրցումին առաջին կիսախաղը ընթացաւ հաւասար պայքարով: Ի դէպ, Աթլեթիքոյի երկու բանալի ֆութպոլիստներ՝ Տիէկօ Գոսթա եւ   Արտա Թուրան   վնասուածքի հետեւանքով չկրցան շարունակել հանդիպումը: Մրցումի 33-րդ վայրկեանին Ալքսիս Սանչէս յառաջ մղեց գաթալոնական կազմը եւ առաջին կիսախաղը վերջ գտաւ 1-0՝ Պարչելոնայի առաւելութեամբ: Երկրորդ կիսախաղի չորրորդ վայրկեանին, Աթլեթիքոյի ուրուկուէյցի պաշտպան Տիէկօ Քոթին   գլխու հարուածով հաւասարեցուց հաշիւը: Սոյն կոլէն ետք, դաշտին մէջ ծաւալեցաւ յամառ պայքար: Պարչելոնա չկրցաւ ճեղքել Աթլեթիքոյի պաշտպանութիւնը, իսկ Աթլեթիքօ վտանգաւոր պահեր ստեղծեց Պարչելոնայի բերդին առջեւ: Աթլեթքօ ախոյեանութիւնը աւարտեց 90 կէտով, Պարչելոնա՝ 87:

Աթլեթիքոյի գլխաւոր մարզիչ Տիէկօ Սիմէոնէ յայտարարեց, թէ չի կրնար նկարագրել իր ուրախութիւնը: Ան ըսաւ,թէ յաղթանակը կառուցուեցաւ իր ֆութպոլիստներուն կատարած աշխատանքին շնորհիւ:

Պարչելոնայի մարզիչ Ճեռարտօ Մարթինօ պաշտօնապէս յայտարարեց, թէ կը հեռանայ զբաղեցուցած պաշտօնէն: Ան, 2013- ի ամրան սկսած էր գլխաւորելու Պարչելոնան: Պէտք է ընդունիլ, որ գաթալոնական խումբը տարբեր մակարդակներու վրայ բոլորեց ձախող տարի մը  եւ միայն շահեցաւ Սպանիոյ «Սուփըր Բաժակ»:ը

Ռէալ Մատրիտ յաղթանակով աւարտեց ախոյեանութեան մարզաշրջանը, երբ 3-1 արդիւնքով պարտութեան մատնեց Էսփանիոլը: Կարէթ Պէյլ եւ Ալվարօ Մորաթա (2) նշանակեցին մատրիտեան խումբին կոլերը:

Միւս կողմէ, սինկափուրցի գործարար Փիթըր Լիմ   ձեռք բերաւ Վալենսիա ակումբի   բաժնետոմսերուն   70 առ հարիւրը: Ան դարձաւ Վալեսնսիայի նոր նախագահը: Լիմ խոստացաւ վճարել 310 միլիոն եուրօ գնահատուող Վալենսիայի պարտքը: Նախապէս, ան փորձած էր գնել իտալական Ա.Սէ. Միլան եւ անգլիական Լիվըրփուլ ակումբներուն բաժնետոմսերը:

ԸՆԴՀԱՆՈՒՐ ԴԱՍԱՒՈՐՈՒՄ

1-     Աթլեթիքօ Մատրիտ՝   38 մրց.   90 կէտ

2-     Պարչելոնա՝ 38 մրց. 87 կէտ

3-     Ռէալ Մատրիտ՝   38 մրց.   87 կէտ

LEAVE A REPLY

Please enter your comment!
Please enter your name here