ՆԱԽԱԳԱՀ ՍԸԼԷՅՄԱՆ ԿԸ ՄԵՐԺԷ ԵՐԿԱՐԱՁԳՈՒՄԸ ԿԱՄ ՎԵՐԱՆՈՐՈԳՈՒՄԸ

0
115

Նախագահական ընտրութիւններու գործընթացը սահմանադրականօրէն նշուած ժամանակացոյցէն կը բաժնեն   եօթ օրեր: Նախագահ Սըլէյման կը մերժէ գէթ մէկ տարուան համար   երկարաձգել իր պաշտօնավարութեան ժամկէտը: Քաղաքական կողմերուն միջեւ կեցուածքները ցարդ կը մնան անփոփոխ: Համախոհական թեկնածուի ընտրանքը գետին գտնելով հանդերձ, չի յաջողիր ապահովել խորհրդարանական անհրաժեշտ մեծամասնութիւնը: Նախագահ Միշէլ Սըլէյման ակնարկելով Հըզպալլայի հետ փոխյարաբերութիւններուն, դիտել տուաւ, թէ Հըզպալլա դուրս եկած էր՝ Ժողովուրդ, Բանակ, Դիմադրութիւն կարգախօսէն, ինչպէս նաեւ ետդարձ կատարած էր Պաապտայի Յայտարարութենէն:

Հանրապետութեան նախագահ Միշէլ Սըլէյման իր պաշտօնավարութեան աւարտէն քանի մը օր առաջ,գարտինալ Պշարա Ռայիի ընկերակցութեամբ այցելեց Շուֆ: Այցելութիւնը կերպով մը վերյիշեցուց 2001-ին, Նասրալլա Սֆէյր պատրիարքին այցելութիւնը: Ժողովուրդային հոծ բազմութիւն մը   դիմաւորեց նախագահ Սըլէյմանը: Այցելութեան նախաձեռնութիւնը   ստաձնած էր   Ընկերվարական Յառաջդիմական Կուսակցութեան պետ Ուալիտ Ճոմպլաթը: Շուֆ ժամանելէ ետք, նախագահ Սըլէյման այցելեց Մուխթարա: Ի պատիւ Սըլէյմանի այցելութեան, արտասանած իր խօսքին մէջ Ուալիտ Ճոմպլաթ բարձր գնահատեց  նախագահ Սըլէյմանի վարած չափաւորական քաղաքականութիւնը, ինչպէս նաեւ շեշտեց չափաւորականութիւնը ապագային եւս պահպանելու անհրաժեշտութիւնը: Ճոմպլաթի խօսքը միաժամանակ երախտագիտութեան արտայայտութիւն մըն էր՝ Սըլէյմանի ծառայութիւններուն: Իր կարգին, Սըլէյման գոհունակութիւն յայտնեց, որ   քանի մը օր ետք պիտի աւարտէր իր պարտականութիւններ, շեշտելով որ յատկապէս ուրախ էր՝ երկարաձգումի եւ վերանորոգութեան ընտրանքները մերժելով:

Մուսթաքպալ Հոսանքի անդամ, երեսփոխան Ահմէտ Ֆաթֆաթ յայտնեց, թէ Սըլէյման կը մերժէ   երկարաձգումը, որովհետեւ կը փափաքի որ նոր նախագահ մը ունենայ երկիրը: Ֆաթֆաթ հաստատեց, թէ Ազգային Ազատ Հոսանքի հետ նոր կառավարութեան կազմութեան ընթացքին համագործակցութեան իրողութիւնը, սական ընդգծեց թէ նախագահութեան ընտրութիւններու վերաբերեալ համագործակցութիւնը պարտաւոր է, որ անցնի Մարտ 14-ի քրիստոնեայ ոժերէն:

Լիբանանեան Ուժեր Կուսակցութեան պետ եւ նախագահութեան թեկնածու Սամիր Ժաաժա Փարիզի մէջ հանդիպում մը ունեցաւ նախկին վարչապետ Սաատ Հարիրիի հետ եւ քննարկեց ընտրական գործընթացը:

Սէուտական Արաբիոյ մէջ լոյս տեսնող օրաթերթեր կը գրեն, թէ բանակի ընդհանուր հրամանատար զօրավար Ժան Քահուաճի, մինչեւ ամսագլուխ, զինուորական պատուիրակութեան մը գլխաւորութեամբ պաշտօնական այցելութիւն մը պիտի կատարէ Ռիատ: Լիբանանի մօտՄիացեալ Նահանգներու դեսպան Տէյվիտ Հէյլ   հերքեց Միշէլ Աունը նախագահութեան հասցնելու վերաբերեալ, իր հասցէին ուղղուած Մարտ 14-ի ուժերուն քննադատութիւնները: Դեսպանը նշեց, թէ Ուաշինկթըն ոչ մէկ միջամտութիւն կը կատարէ այս ուղղութեամբ: Սէուտական Արաբիոյ   դեսպան Ալի Աուատ Օսէյրան ըսաւ, թէ Ռիատ պիտի ողջունէ համախոհութեամբ ընտրուած ոեւէ նախագահ: Փարիզ, նոյնպէս յայտարարեց, թէ նախընտրութիւն չունի թեկնածուներու միջեւ:

LEAVE A REPLY

Please enter your comment!
Please enter your name here